Nɨ naji ɨ Timɔti kɨ nɨntɨ nɨŋ yi Nyɔ
2
Wɛnɛ Timɔti, nə wə lɨ, wə naji lə wə kɨ lɨmi fɛŋ buntaŋ bə shəŋ yi ndzeŋe yi Jisɔs Klistu lə yi yu donchə wə. 2 Kɨ dze fiɔŋ fi wə na ba wə kɨ woko nchanyɛ bənɨ kɨyɛŋ nəfiə, wə nya bənɨ bə diəŋ kaŋ bə kwətsə bə ntɨfiɛ bənɨ bədɔ. 3 Dzê tɨ wɔhɔ ŋgə nɨ miɨ wu dzoŋ wu diəŋ wu Jisɔs Klistu. 4 Miɨ wu dzoŋ jimiɛhɛ nɨŋ yihi ntɨŋ, yu chisə galə bufɨ biɔŋ bi bənɨ bəwa lə wɨ, ndzɨ fiɔŋ fi yu na galɨ bufɨ fi wɨ na lə yu fə ji fiɔŋ fi miɨ wuhu wubəŋ na se. 5 Na tɨ diəŋ nɨ naji ɨ miɨ wu na lətə kɨlɨtɨ lətə kə ba diə fiɔŋ, ɨji yu nlətə sɨŋ yu biəlɨ bilaŋ bi kɨlɨtɨ lə. 6 Miɨ wu kə wu na nɨntɨ buni naji lə yu sa fɔ fiɔŋ nə biɔŋ bi yu nə̀ tishɛ ntɨŋ. 7 Kɨ gɔmbiɛ tsukɔ biɔŋ bi mɨ nchanyɛ biŋ wɨ, Baba jiwa yu fə ɨ wə kkə bi bichi.8 Kɨ gɔmbiɛ Jisɔs Klistu. Yu nə̀ dzakɔ nə kkpə lɨ. Yu nə̀ ji miɨ nə kɨtsɔŋ kɨ Ŋkuŋ Dɛbi lə ntɨŋ. Na fiɔŋ fi nna ntɨdi shɔŋ yi ndzeŋe ya ntɨŋ. 9 Na ndzɨ shɔŋ yi ndzeŋe nyi yi nna ŋ'woko ŋgə, nji mfíaŋ wɨ nɨ miɨ wu' buŋɔ kɨlaŋ. Bəmanɨ, mɛfə nna nji mfíaŋ wɨ, diɛ yi Nyɔ na jimiɛhɛ mfíaŋ ntɨŋ. 10 Nɨ fi na ji manɨ, mɨ ŋkɨ ŋkansɨ shəŋ bə fiɔŋ fichi ndzɨ bənɨ bə Nyɔ sabiɛ, fə bɔ keŋkɛ tɨ mfɔ yi fo nə Jisɔs Klistu wɨ bə bubəŋ bu kəkaha. 11 Nchanyɛ nyi na yɛyi, yi ji lə:
Jilə kə' kkpə bə yu,
ɨ kə keŋkɛ tɨ kɨjimiɛ bə yu.
12 Ɨ kə kansɨ shəŋ,
ɨ kə ná kɨ sakɨ buŋkuŋ bə yu.
Ɨ kə nɨŋŋ yu,
ɨ yu ná nɨŋŋə tɨ bɨ.
13 Ɨ kə na lɨmiɛhɛ buntaŋ,
ɨ yu kətə kwa yu lɨmi buntaŋ,
ndzɨ naji ɨ yu nɨŋŋ gwɨ yihi kə.
Miɨ wu nɨŋ wu Nyɔ bɨmiɛ
14 Kɨ sê bɔ kɨ biɔŋ biŋ'ə, wə chisə chanyɛ bə bɔ Nyɔ nəfiə lə bɔ shə̂ yímbiɛ yi na tsukɔ bənchanyɛ wɨ, ɨji yi nchitə sɨŋ miɨ, yi bɨsə kwa bənɨ bə na woko yi. 15 Dîɔ kɨtso lə wə tseyɛ gwɨ yɔhɔ Nyɔ nəfiə nɨ miɨ wu Nyɔ na ŋɨntɨ lə yu na ji diəŋ. Kɨ ji miɨ wu nɨŋ wu na keŋkɛhɛ fiɔŋ fi yu kɨ ji yaa yaa ndzɨ fi, wu na chiŋfi kɨyɛyi kɨ diɛ yi Nyɔ lə dzə yi diəŋ ntɨŋ. 16 Gâ gwɨ nə bənchanyɛ bə na keŋkɛhɛ fiɔŋ fi fənə tsukɔ Nyɔ wɨ, ndzɨ ba bənchanyɛ na fɨtɨ bənɨ jimi kɨjimiɛ kɨ Nyɔ na sɛhɛ bɔ gɨntɨ fiəfiə. 17 Bitɨfiə bibɔlə bia na ji kwa nɨ biasɨ yi na diɨ gwɨ yi miɨ yi gɨntɨ bə yi. Amenayus bə Filetus na bədɔ bənɨ bə na tɨfiə bia bitɨfiə. 18 Bɔ' shə dzə yi kɨyɛyi nɨ bɔ na kkpɨ kwa lə ndzakɔ nə kkpə lɨ' dze dɨ. Bɔ fə manɨ ba bɨsɨ kɨmbɨŋ kɨ bənɨ bədɔ lə. 19 Bəmanɨ, kɨchə kɨ na ji lə na mma yi Nyɔ kɨ, na kɨntaŋ, naji ɨ bə́ nɨkə kɨ kə. Kɨchə kɨŋ ji Nyɔ' bɔndu ndonchɛ yihi kɨ wɨ, yi ji lə, “Baba na kkɨ bənɨ bə na ji buhu,” yi ji tɨ lə, “Miɨ chi wu na bɨndɨ yɨ wu Baba lə, naji lə yu shə fiə wubiə.”
20 Tsɔŋ yibəŋ ntɨŋ jimiɛhɛ kwa ji bə fíu yi bə́ fəə bə ŋgusa. Yidɔ ba yi kɨ ji tɨ yi bə́ fəə bə bitɨ ma yi bə́ maa bə sha. Fiu yidɔ ba yi kɨ ji yi na keŋkɛ nɨŋ yi mbɨ, yidɔ ji yi na keŋkɛ nɨŋ yi kɨlɔlɔ. 21 Bəma, ɨ miɨ foso kaŋ yihi nə biɔŋ bi wa ntɨŋ, tə yu na ji nɨ fiɔŋ fi tsɔŋ fi naji ɨ bə́ dze fi ba fə nɨŋ yi mbɨ su, yu ji tɨ miɨ wu Nyɔ fəə lə na miɨ wuhu. Yu na ji miɨ wu na wokɔ miɨ wuhu wubəŋ lə yu dze yu ba kɨ fɨtɨ nɨŋ yi ndzeŋe yi la su. 22 Bəma, lə̂tə fiɔhɔ nə biɔŋ wɨ bi na fɨtɨ gwɨ shi beŋ butsɔ. Dîɔ yɔhɔ lə wə kɨ ji bə kɨjimiɛ kɨ diəŋ, wə kêŋkɛ kɨmbɨŋ bə kɨnse bə kɨjimiɛ kɨ budə lə diəŋ nɨ bənɨ bə na bɨndɨ yɨ wu Baba lə bə shəŋ yibɔlə yi ntsaaŋ na fɨtɨ. 23 Wə kə̂ keŋkɛ fiɔŋ fi fənə bə yímbiɛ yi mfidi bə yi kɨlɔlɔ lə, ndzɨ yi ba yi kɨ ba kwa ji bə bəŋkpanə. 24 Miɨ wu nɨŋ wu Baba na jimiɛhɛ lə yu kɨ kpanə bə bənɨ. Yu naji lə yu kɨ ji bə shəŋ yi ndzeŋe bə miɨ chi, yu kɨ ji miɨ wu na kkɨ ntɨfiə bənɨ, yu kkɨ tɨ ŋkansɨ shəŋ bə bənɨ. 25 Yu na ba yu kɨ lɨmə biɔŋ yəfu yəfu bə bənɨ bə na yimbiɛ yu. Yu gəŋ yu kɨ lɨmə manɨ bə kɨŋgɔmbiɛ kɨhɨ lə Nyɔ chitə bɔ, bɔ fichə shəŋ yibɔlə ba kkə fiɔŋ fi yɛyi, 26 ba dɨ bufɨ bubɔlə jiŋ, ba lətə fɔ nə ntasɨ wu tsə ntɨŋ wu yu kwɛɛ bɔ su, fə bɔ kɨ fɨtɨ ji fiɔŋ fi yu na se.