Kɨŋwatɨ kɨ tsá fiɛ bɨŋ kɨ Pɔl nə̀ bɔndɔ bə
Timɔti
1
Na mɨ Pɔl, nna nji wɛŋ wu faŋə wu Jisɔs nə kɨnse kɨ Nyɔ lə ntɨŋ. Fiŋ na ba nə bikaŋə bi na tsukɔ buwəŋ bu kəkaha wɨ, bu na ji Jisɔs Klistu wɨ.2 Nna mbondo kɨŋwatɨ kɨŋ bə wə wɛnɛ Timɔti. Wə na ji shəŋ yɛŋ.
Taa waha Nyɔ bə Jisɔs Klistu Baba waha dônchə wə shəŋ yi ndzeŋe ba kwese yaa bə wə ba nya wə budə.
Pɔl nya kɨmbafə bə Nyɔ ndzɨ Timɔti ba koso shəŋ yihi
3 Nna mba ŋgɔmbiɛ wə tsá chi bbutsu bə bbushə kɨntsɨsɨ kɛmɨ ntɨŋ, nnya kwa ji kɨmbafə bə Nyɔ wu nna nnɨntɨ yu lɨ, fiɔŋ jikə kɨ sakɨ mɨ shəŋ yɛmɨ ntɨŋ, diəŋ nɨ bətaa nə̀ nɨntɨ. 4 Nna mba ŋgɔmbiɛ tɨ məndəŋ mə wə nə̀ dzulɔ tsa yi kə nə̀ jɛɛ gwɨ, ŋkɨ ŋkeŋkɛ kɨgaŋ lə nchi ŋəŋə wə wɨ fə shəŋ yɛmɨ yisə bə kɨnlaŋ. 5 Nna mba ŋkɨ ŋgɔmbiɛ tɨ kɨmbɨŋ kɔhɔ kɨ yɛyi kɨ wə na ji bə kɨ. Kɨmbɨŋ kɨŋ na kɨ mbamba wɔhɔ Loys bə ma wɔhɔ Yunis nə̀ sa bɔ ji bə kɨ, nna ŋkkɨ lɨ, masə sɨŋ lə na kɨmbɨŋ kɨŋ kɨ wə na ji bə kɨ fɛŋ. 6 Na fiɔŋ fi nna ntɨ lə nse wə lə kɨnya kɨ Nyɔ nə̀ nya ka wə tsa yi nnə̀ ŋgalə kaŋ wə bɨŋ, wə gâ kɨ kətə kɨwəŋ. 7 Kkə̂ lə Nyɔ nə̀ kə nyaha bɨ kɨn'yɨntɨ ɨji kɨ naji lə kɨ kɨ fɨtɨ kə ji bə nyiŋ. Yu nə̀ nya bɨ ji kɨn'yɨntɨ kɨ buŋga lə bə kɨ kɨnse lə bə kɨ naji ɨ kɨ fə kə kɨ kkɨ nɨ naji lə kə kɨ tɨntɨ ŋkɨ bə gwɨ́ yaha.
8 Yaa kə kɨ kwete wə bə nchanyɛ bə bənɨ bədɔ tsukɔ Baba waha wɨ makə tsukɔ mɨ wu na ji no buŋfia ntɨŋ ndzɨ yu. Bəmanɨ tɛ̂shɛ mɨ kə kɨ woko ŋgə tɨ ndzɨ shɔŋ yi ndzeŋe nyi bə buŋga bu Nyɔ nya wə. 9 Na Nyɔ wu nə̀ fəə kə fɔfo, yu bəndɨ bɨ lə kə kɨ ji kɨjimiɛ kɨ ntsaaŋ ntɨŋ. Yu nə̀ kə fəkə fiŋ ɨji ndzɨ nɨŋ yidɔ yi kə nə̀ fəə. Nə̀ ndzɨ bikaŋə bihi bi yu nə̀ kaa bɨ, bə shəŋ yihi yi ndzeŋe yi yu nə̀ keŋkɛ bɨ wɨ, ə ba nə Jisɔs Klistu wɨ fə mbi tə kɨ gbo. 10 Fɛŋ Nyɔ' donchə bɨ shəŋ yihi yi ndzeŋe nɨ Nchitə waha Jisɔs Klistu nə̀ ba. Yu' buŋ buŋga bu kkpə lə ba donchɛ buwəŋ ŋgbooŋ lə miɨ tsukə kkpəhə. Yu fə fi fɔ ŋgbooŋ ɨji bə shɔŋ yi ndzeŋe. 11 Na ndzɨ shɔŋ yi ndzeŋe nyi yi Nyɔ sabiɛ mɨ lə ŋkɨ nji miɨ wu tɨdi diɛ yihi, nji tɨ wɛŋ wu faŋə wu Klistu nji tɨ miɨ wu bitɨfiə. 12 Na ndzɨ fiŋ fi nna ŋ'woko ŋgə wu nna ŋ'woko no mɛ. Bəmanɨ yaa na kwetɛhɛ mɨ ndzɨ nna ŋkkɨ miɨ wu mɨ ŋgalə shəŋ yu wɨ. Nna ŋkkɨ lɨ masə sɨŋ lə naji ɨ yu kɨ kɨki fiɔŋ fi mɨ nya fiŋ yu kaŋ,ª gəŋ fɔ díɔ yi nəjiŋ ntɨŋ. 13 Kɨ biəlɨ kwa dzə yi bitɨfiə bi diəŋ bi nnə̀ ntɨfiə bia wə. Nɨ wə na biəlɨ cha manɨ, kɨ galɨ kwa shəŋ Klistu wɨ, wə keŋkɛ kɨnse bə bənɨ, fiɔŋ fichi kɨ ji dzə yi bənɨ bə Jisɔs Klistu lə ntɨŋ. 14 Tɨ̂ŋkɨ bə bitɨfiɛ bi ndzeŋe bi bə́ nə̀ galə bia wə kaŋ. Kɨ tɨntɨ ŋkɨ bə buŋga bu Kɨn'yɨntɨ kɨ Ntsaaŋ'ə kɨ na ji bɨ ntɨŋ.
15 Wə na kkɨ lɨ lə bənɨ bəchi bə sha yi Ɛsha ntɨŋ nə̀ tɔfu mɨ, Fɛgɛlus bɔ bə Hamɔgɛnɛs ji tɨ bɔ ntɨŋ. 16 Nna nende lə Baba kwese yaa bə kɨtsɔŋ kɨ Ɔnesifɔlus lə. Yu nə̀ ba yu kɨ fɨtɨ tsá kɨyɛŋ shəŋ yɛŋ dɨ. Yaa nə̀ kwetɛhɛ yu lə mɨ wa tsɔŋ yi buŋfia ntɨŋ. 17 Tsa yi yu nə̀ fɔɔ sɛŋ Lom, yu nə̀ dze tsa ba nɔŋ mɛ yɛyi yɛyi, nəjiŋ wusu, yu ŋəŋ mɨ wɨ. 18 Nna ntsɨsə lə Baba fə, ɨ kɨ ji butsu bu nəjiŋ, Baba kwese yaa bə yu. Wə na kkɨ lɨ buni nɨŋ chi yi yu nə̀ nɨŋə mɨ lɨ kɨtuŋ kɨ Ɛfɛsɔ ntɨŋ.