Bənɨ bə Klistu lə na keŋkɛ kɨjimiɛ kɨfa
3
Nɨ Nyɔ nə̀ dzakɔ bəŋ bə Klistu nə kkpə lɨ, bə gâ shəŋ yənɨ ji biɔŋ bi bɔ́ wɨ, dɨ wu Klistu na ji, ɨji Nyɔ' ga yu kɨbandə kɨhɨ kɨ nədiɨ wɨ. 2 Bə kɨ galɨ bufɨ bwɛnɨ biɔŋ bi bɔ́ wɨ. Bə kə kɨ galɨ bu biɔŋ bi mbi no lə wɨ, 3 ndzɨ bə' kkpə, kɨjimiɛ kɛnɨ fɛŋ na ji bunyələ bə Klistu Nyɔ ntɨŋ. 4 Tsa yi Klistu wu na ji kɨjimiɛ kɛnɨ ná lafɔ, ɨ bə ná lafɔ tɨ bə yu bubəŋ buhu ntɨŋ. 5 Fi na ji lə bə kkpɨ̂sɨ jimə biŋ biɔŋ bi mbi no lə nə bəŋ gwɨ. Biɔŋ biŋ na ndzenɛ bə kɨŋgɔmbiɛ kɨ kɨnyənə kɨ ndzenɛ lə, ma gwɨ yi na shi, ma bə ŋkeŋkɛ yi kɨŋgɔmbiə kɨ fənə biɔŋ bibiə, ma bə ŋga yi yəsɨ biɔŋ wɨ. Miɨ wu na galɨ yəsɨ biɔŋ wɨ, biɔŋ bia tsu yu lɨ nɨ nyɔ wudɔ. 6 Na ŋgwe yi biŋ biɔŋ bi jibia bi fə ɨ Nyɔ donchə bulo buhu bu kɨtso lə bə bənɨ bə na fɨtɨ bi. 7 Fiəfiə nə̀ ji bə fɨtɨ ŋgwe yi bia biɔŋ tsa yi bə nə̀ bambi ŋgwe yi ka kɨjimiɛ ntɨŋ. 8 Bəmanɨ, fɛŋ bə naji lə bə tɔ̂kaŋ nə bi bichi wɨ. Bə tɔ̂kaŋ nə bulo wɨ bə shəŋ yi funɔ ma shəŋ yi yii. Miɨ kə kɨ bɨsə yɨ wu miɨ wudɔ lə. Díɛ yibiə kə kɨ foto nə miɨ dze. 9 Miɨ kə kɨ fukiə wəmɛni. Bə na kkɨ lə bə' foso gwɨ yiko ya nə fiə wənɨ ntɨŋ 10 ba dɔŋ ji gwɨ yifa. Nyɔ na nachɛ gwɨ nyi tsá chi, yu yashənɨ yi, yi tsu yifa nɨ yu wu nə̀ fəə wa yi, fə bə kɨ kkɨ yu buni. 11 Kɨjimiɛ kɨfa kɨŋ ntɨŋ, miɨ wudɔ na jimiɛhɛ chichi nə wudɔ lɨ. Miɨ wudɔ na tsɔhɔ jimiɛ su lə na Miɨbəju, makə lə wudɔ kɨ ji miɨ Bəglek. Miɨ wudɔ na tsɔhɔ jimiə su wu naji lə bə́' sɔmbu yu dzɔ makə lə wudɔ kɨ ji wu na bambi dzɔ yintsu. Miɨ wudɔ na tsɔhɔ jimiɛ lə na miɨ wu ji. Miɨ wudɔ na tsɔhɔ jimiə lə yu na ji nyɛŋ yi kpa. Miɨ wudɔ na tsɔhɔ jimiə lə yu na ji mfia, wudɔ ji lə yu na jimiɛhɛ mfia. Klistu na ji fiɔŋ fichi bɔ lɨ, yu ji bɔ ntɨŋ bəchi. 12 Nɨ Nyɔ nə̀ sabiɛ bəŋ, bə kɨ ji ntsaaŋ, yu laŋkɨ bəŋ kɨtso, fi kɨ ji lə, bə kɨ kwesɛ yaa, bə fɨtɨ biɔŋ bindzeŋe. Bə dzê gwɨ́ yənɨ koso, bə kɨ ji bə kɨyəfu, bə kânsɨ shəŋ. 13 Bə kɨ dze miɨ chi nɨ yu na ji. Ɨ miɨ fə tɨmo ma la fi na lo miɨ, miɨ wa gûfiɛ yu. Nɨ Baba nə̀ gufiɛ bwɛnɨ bubiə, bə kɨ gufiɛ tɨ bu bənɨ bədɔ lə. 14 Chi bə na fɨtɨ biɔŋ biŋ bichi, bə kɨ galɨ kɨnse fiə. Kɨnse na fiɔŋ fi na tɛshɛ biɔŋ bichi bi kɨ ji fiɔŋ'ɨ fimo gəŋ tuŋ fəŋgbɨŋ. 15 Bə gâ budə bu na foto nə Klistu wɨ bu kɨ ji shəŋ yɛnɨ ntɨŋ bu donchɛ bəŋ dzə. Budə buŋ na bu Nyɔ nə̀ bəndə bəŋ lə bə kɨ ji bə bu nɨ bə na ji gwɨ miu. Bə kɨ nya tɨ kɨmbafə bə Nyɔ. 16 Bə gâ diɛ yi Klistu yi kɨ ji shəŋ yɛnɨ ntɨŋ buni, bə kɨ tɨfiə bə nyaa tɨ bitɨfiɛ bə gwɨ́ yɛnɨ bə bufɨ buchi. Bə kɨ tɨtɨ bə nyaa kɨmbafə bə Nyɔ shəŋ yɛnɨ ntɨŋ bə yɨ́mbɨ yi na foto nə Kɨŋwatɨ kɨ Kɨŋkuntə lə ntɨŋ, ma yɨ́mbɨ yidɔ yi kɨŋkuntə lə, ma bə yi Kɨn'yɨntɨ kɨhɨ na nya bənɨ. 17 Fiɔŋ fichi fi bə na fɨtɨ, fa nə nchanyɛ ntɨŋ lɛɛ, fa nə nɨŋ ntɨŋ lɛɛ, bə kɨ fɨtɨ yɨ wu Baba Jisɔs lə lɨ, bə nyaa kɨmbafə bə Taa waha Nyɔ bə chɛti yu ntɨŋ.Nɨ bənɨ bə Klistu lə naji lə bɔ kɨ ji tsɔ́ŋ yibɔlə ntɨŋ
18 Bəkansɨ, bə nyâ gwɨ́ yɛnɨ bə bənɨnsə bɛnɨ. Na fiɔŋ fi ndzeŋe lə bənɨ bə Baba Jisɔs lə kɨ fɨtɨ. 19 Bənɨnsə, bə kɨ laŋkɨ bəkansɨ bɛnɨ. Bə kə kɨ ji buntaŋ bə bɔ. 20 Beŋ, bə kɨ woko bə bəmaa bə bəchaa bɛnɨ fiɔŋ fichi ntɨŋ. Ɨ bə na fɨtɨ manɨ, ɨ fi kɨ ndzeŋe Baba lɨ. 21 Bəchɛ beŋ, bə kə kɨ fɨtɨ biɔŋ bi naji ɨ shəŋ yi beŋ bɛnɨ lə kɨ bɨfi. Ɨ bə na fɨtɨ ma, ɨ gwɨ kɨ kkpɨ bɔ. 22 Bəŋfia, bə kɨ woko bə bənɨ bɛnɨ bəbəŋ mbi no ntɨŋ nə biɔŋ bichi ntɨŋ. Bə kə kɨ nɨntɨ bɔ lɨ kwa tsa yi yəsɨ yibɔlə na ji bəŋ wɨ bə mfə lə gwɨ kɨ ndzeŋe bɔ bə bəŋ. Bə kɨ nɨntɨ bə shəŋ miu, bə lete ji Baba. 23 Fiɔŋ yɨla fi miɨ na nɨntɨ, yu kɨ nɨntɨ bə shəŋ yihi chi lə yu na nɨntɨ ji Baba lɨ, yu nɨŋ sɨŋ miɨ lɨ. 24 Bə kɨ kkɨ lə miɨ wa ná keŋkɛ fiɔŋ fi bə́ sə sesɛ ba ga lɨ, ɨji bikwəntsə bihi nə Baba lɨ. Na Baba Klistu wu miɨ wa na nɨntɨ yu lɨ. 25 Bəmanɨ, bə miɨ wu na fɨtɨ bubiə, Nyɔ ná sombo yu diəŋ bə bubiə buhu. Nyɔ na donchɛhɛ kɨchichi bə bənɨ.