2
Nna nse lə mfə lə bəŋ bənɨ bə Kɔlɔsha kkə̂ nɨ nna mfunchi kɨtso ndzɨ bəŋ, bə ndzɨ bənɨ bə Lɔdɛsha bə bənɨ bə kɨmbɨŋ'ə bəchi bə kə ŋəŋkəhə mɨ bushi. 2 Mɨ mfə manɨ fə bəŋ bə bɔ bəchi kosɔ shəŋ yɛnɨ ba tɛshɛ kɨ ji kɨnse ntɨŋ, fə bə dzɛɛ tsa ba kkə biɔŋ bichi buni nɨ miɨ naji lə yu kkə, fə bə kkə tɨ fiɔŋ fi Nyɔ nyələ fi na ji Klistu kɨbɛɛ. 3 Nyɔ' nyələ kɨbə kɨ bufɨ buchi lə bə biɔŋ bi bənɨ naji lə bɔ kkə kɨhɨ, əji Klistu ntɨŋ. 4 Mɨ nchanyɛ fiŋ ndzɨ miɨ wudɔ tə kə dza ba ba bəŋ bə nchanyɛ yi bifuŋ bi ndzəŋgə ba lənə bə bəŋ. 5 Bə kkə̂ lə mɛfə nna nji chiŋ dzəbudə nə bəŋ wɨ mɛ, mɨ wa bə bəŋ kɨn'yɨntɨ ntɨŋ. Nna ŋ'woko buni nɨ nna ŋŋɨntɨ bə fɨtɨ biɔŋ dzə́ yi diəŋ ntɨŋ, bə galɨ shəŋ Klistu wɨ ŋkɨɨŋ.Bənɨ bə Klistu lə' fɔfo nə bilaŋ bi kɨlɔlɔ lə kaŋ
6 Nɨ bə ləkə Klistu Jisɔs lə yu na ji Baba, bə kə̂tə kwa bə ji yu wɨ manɨ. 7 Bə nû gaŋ yu wɨ ba kɨ ko yu ntɨŋ ba ləŋ kɨmbɨŋ kɛnɨ wɨ buntaŋ diəŋ nɨ bə́ nə̀ tɨfiə bəŋ, bə nyâ kɨmbafə bə Nyɔ kɨtso. 8 Bə dzê tsa miɨ tə kə dzɛɛ bufɨ bu sɛŋ koso bu kɨlɔlɔ lə bu buŋfukiɛ lə ba kwɨdi bəŋ bə bu ba chi bəŋ bəŋfia lɨ. Bufɨ buŋ na biəlɨ fiə wu miɨbəwəŋ'ə bə wu bin'yɨntɨ bi sakɨ mbi no ləª, ɨ jikə jimiɛ bu Klistu lə. 9 Bə kɨ kkɨ lə chi Klistu nə̀ tsɔ miɨbəwəŋ, fiɔŋ fi Nyɔ na ji fi lɨ fichi, fi fia yu wɨ. 10 Bə na keŋkɛ biɔŋ bichi chi bə na ji Klistu ntɨŋ. Na yu wu na ji fo wu biɔŋ bichi lə bi na keŋkɛ buŋga bə bi na sakɨ. 11 Nɨ bə nə̀ ji yu ntɨŋ manɨ, yu' sɔmbiɛ bəŋ dzɔ́. Nsɔmbiɛ yi dzɔ́ nyi jikə jimiɛ yi bə́ sɔmbiɛ bə kaŋ yi miɨbəwəŋ'ə. Nyi nsɔmbiɛ ji mfə yi Klistu lə yu kəmbɨ ba foso gwɨ́ yi bubiə lə. 12 Tsa yi bə́ nə̀ chɛsɛ bəŋ biɔ, bə́ nə̀ tɛshɛ ba di bəŋ bə Klistu. Nyɔ dzakɔ bəŋ ndzɨ shəŋ yi bə nə̀ galə Klistu wɨ lə naji ɨ Nyɔ dzakɔ tɨ bəŋ nə kkpə lɨ bə buŋga bu yu nə̀ dzakɔ Klistu nə kkpə lɨ. 13 Bə nə̀ kkpə kɨn'yɨntɨ ntɨŋ ndzɨ bilaŋ bi Nyɔ lə bi bə nə̀ gbosɔɔ, bə́ nə̀ kə sɔmbiɛ bəŋ dzɔ́ kwa ji lə bə́ kəmbɨ ji biɔŋ bi gwɨ́ yɛnɨ na se. Fɛŋ, Nyɔ' fə lə bə fichə ba tsu buwəŋ ntɨŋ ba tɛshɛ bəŋ bə Klistu. Yu' gufiɛ məmbiə maha mənchi. 14 Yu' shiŋkiɛ biɔŋ bi nə̀ kwɛɛ bɨ nə kɨŋwatɨ kɨ bilaŋ'ə ntɨŋ əji bə́ nə̀ bɔndɔ tsukɔ bɨ wɨ. Yu' dze biɔŋ biŋ ba bandɨ bi kɨtɨ kɨ ŋ'wa lə wɨ. 15 Klistu' ya buŋga bu biɔŋ bichi lə bi na keŋkɛ buŋga bə bi na sakɨ, yu foso bi, bi yinshi ŋgbooŋ, yu nya bi yaa ba ya bi kɨtɨ kɨ ŋ'wa lə wɨ.
Bənɨ bə Klistu lə kɨ woko ji fiɔŋ fi na ji ntə yihi
16 Bəma, bə kə kɨ bɨmi lə miɨ wudɔ kɨ sakɨ bəŋ tsukɔ biɔŋ bi bə na diɨ wɨ makə bi bə na mu, makə lə bə na diəhə bigbeyɛ fa ji bigbeyɛ bi fiəə wufa lə, makə bi butsu bu fufiɛ lə. 17 Bɔ nə̀ fɨtɨ biɔŋ biŋ ɨji kwa ndindi wu fiɔŋ fi nə̀ji lə fi ba, fiɔŋ fia kɨbɛɛ ji Klistu. 18 Bə kə̂ bɨmiə lə bənɨ bədɔ kɨ chisə bəŋ koso, bɔ tɨdi lə bə kə kwətsə. Bənɨ bɛŋ na tɨdi lə bə kɨ dze gwɨ́ yɛnɨ koso nɨ bɔ na dze ɨ jikə jimiɛ dzə́ yi diəŋ ntɨŋ, bɔ tɨdi tɨ lə bə kɨ kuntə bənchinda bə Nyɔ lə nɨ bɔ na kuntə. Bɔ tɨdi lə bɔ na kkɨ biɔŋ ndzɨ məndəŋfɨ na kwete bɔ. Bɔ dze gwɨ bə biɔŋ bi na ba bufɨ bubɔlə ntɨŋ, kɨnyi kɨsu jikə jimiɛ. 19 Bɛŋ bənɨ' jɛ gwɨ yibɔ nə Klistu wɨ, wu na ji Fo. Na Klistu wu na nya gwɨ yihi buŋga lə yi kɨ ko nɨ Nyɔ na se lə yi kɔ, ɨji kə' tɛshɛ mən'yele ntɨŋ bə jiŋfi nɨ gwɨ yi miɨ naji lə yi tɛshɛ ba tə kɨ nɨntɨ buni. 20 Nɨ bə kkpə tɨ bə Klistu dia wu bin'yɨntɨ bi na sakɨ mbi no lə, ə fə la lə bə kɨ chisə jimiɛ kɨjimiɛ diəŋ nɨ bənɨ bə mbi no lə? Bə chisə bɨmiə bə mbiə yi biŋ bilaŋ ndzɨ la? 21 Bə́ chɛŋ tɨ lə, “Miɨ kə̂ chiŋfiɛhɛ fiŋ fiɔŋ wɨ, miɨ kə̂ fɔkɔhɔ fihi yu dze, miɨ kə̂ bukɔ fiŋ wɨ.” 22 Biɔŋ biŋ bichi na bi bənɨ na fɨtɨ bi chɛti buchɛnɛ ndzɨ bɔ na biəlɨ ji bilaŋ bi na ji ŋga yi bənɨ bɔ biəlɨ nɨ bufɨ bubɔlə na donchɛ. 23 Bilaŋ biŋ na ba bi kɨ yinshi wələ bufɨ bwa bi ntɨŋ bə dzə́ yi bi na tombi bənɨ lə bɔ kɨ kuntə yi ntɨŋ nɨ bɔ na dze gwɨ koso ɨjikə jimiɛ dzə́ yi diəŋ ntɨŋ, bɔ nyaa gwɨ́ yibɔlə ŋgə. Bəmanɨ, biɔŋ biŋ naji ɨ bi chitə bə mfoso yi miɨ nə biɔŋ bibiə wɨ bi gwɨ na se kə.