Kɨŋwatɨ kɨ Pɔl nə̀ bɔndɔ bə ntɛshɛ yi
Kɔlɔsha
1
Na mɨ Pɔl, wɛŋ wu shɔŋ wu Jisɔs Klistu nə kɨnse kɨ Nyɔ lə ntɨŋ, bɨ bə Timɔti ŋgwɨŋ waha. 2 Kɨŋwatɨ kɨŋ na gɨntɨ bə bəŋ bəŋgwɨŋ baha bə Kɔlɔsha bə na ji bənɨ bə Nyɔ lə, bɔ lɨmi ŋkɨɨŋ Klistu wɨ. Taa waha Nyɔ dônchɛ bəŋ shəŋ yi ndzeŋe, ba nya bəŋ budə.Pɔl kɨ tsɨsə, yu nya kɨmbafə bə Nyɔ bə bənɨ bə Kɔlɔsha
3 Kə na tsɨsə bə bəŋ tsá chi, kə nya kɨmbafə bə Nyɔ Chɛ Baba waha Jisɔs Klistu, 4 ndzɨ kə' wɔ kɨ shəŋ yi bə galə Jisɔs Klistu wɨ bə kɨnse kɨ bə na keŋkɛ bənɨ bə Nyɔ lə wɨ bəchi. 5 Kə na kkɨ lə bə na fɨtɨ manɨ ndzɨ bə na jiŋgə fiə, ɨji fiɔŋ fi Nyɔ nə̀ sesɛ ba ga bəŋ'ɨ bɔ́. Fiɔŋ fiŋ ji fi bə nə̀ wɔɔ nə diɛ yi Nyɔ ntɨŋ, ɨji kɨyɛyi, ɨji shɔŋ yi ndzeŋe. 6 Shɔŋ nyi nə̀ ba bəŋ wɨ diəŋ nɨ yi na ba bənɨ bəchi wɨ bə sha bɨŋ, fə yi yashɛnɨ fiə wu bənɨ lə, wu kɨ tsaŋkɨ wu gɨntɨ fiəfiə. Na diəŋ nɨ fi nə̀ tɨchə bə bəŋ dze nə butsu bu bə nə̀ wɔɔ shɔŋ ya ba kkə yɛyi lə Nyɔ' donchə shəŋ yihi yi ndzeŋe bə bənɨ. 7 Bə nə̀ wɔ shɔŋ nyi nə Ɛpaflas lɨ wu na ji shəŋ yaha, bɨ bə bɔ nɨntɨ fiɔŋ'ɨ fimo. Yu na ji miɨ wu nɨŋ wu Klistu, yu dze dɨ waha, yu nɨntɨ bə shəŋ yihi chi. 8 Yu tə bɨ tsukɔ kɨnse wɨ kɨ Kɨn'yɨntɨ kɨ Nyɔ lə fəə bə kɨ keŋkɛ bənɨ wɨ. 9 Dze nə butsu bu kə nə̀ wɔɔ kɛnɨ manɨ, kə kə chindəsu nə ntsɨsɨ wɨ bə bəŋ, kə tsɨsə kə nende lə Nyɔ yîsə bəŋ bə bufɨ bu naji ɨ bu fə bə kkə fiɔŋ fi yu na se. Fiŋ jifia ɨ fi ba nə bufɨ buchi wɨ ma nə biɔŋ bi Kɨn'yɨntɨ kɨhɨ fəə bə kkə. 10 Bəma, ɨ bə tə jiŋ kɨjimiɛ kɨ na kwətsə Baba lɨ, ɨji kɨ kɨ yu na se. Ɨ bə jiŋ manɨ ba tə kɨ nɨntɨ nɨ́ŋ yi ndzeŋe dzə́ ntɨŋ chichi chichi, bə ko bə gɨntɨ fiə fiɔŋ fi bə na kkɨ ntɨŋ tsukɔ Nyɔ wɨ. 11 Kə na tsɨsə tɨ lə Nyɔ wu buŋga bubəŋ buchi na ji buhu, yu nyâ bəŋ buŋga buchi bə kɨ tɛti gwɨ tsá chi, bə kansɨ shəŋ, bə gɨntɨ fiə bə fiɔŋ fichi, bə woko buni, 12 bə nyaa kɨmbafə bə Taa waha. Na yu wu nə̀ fəə kə kwətsə bə ŋkeŋkɛ yi fiɔŋ fi yu nə̀ sesɛ ba ga bənɨ buhu lɨ buŋkuŋ buhu bu kɨŋgbooŋ'ə ntɨŋ. 13 Yu nə̀ foso bɨ nə buŋga bu kɨjuwɔ lə ntɨŋ ba ga bɨ buŋkuŋ bu Wene lə ntɨŋ, wu na ji shəŋ yihi. 14 Na Wene no wu Nyɔ nə̀ chɛɛ yu ntɨŋ ba tsu bɨ nə ŋgə kaŋ, fi ji lə yu' gufiɛ bubiə bwaha.
Klistu na fo wu biɔŋ bichi lə
15 Wene no na boto Nyɔ kɨbɛɛ wu kə na ji yu wɨ kə ŋəŋkəhə. Yu na ji gbɔnshɛ nə biɔŋ bichi ntɨŋ bi bə́ nə̀ fəə. 16 Nyɔ nə̀ fə biɔŋ bichi ə chɛti yu wɨ, biɔŋ bi bɔ́ bə bi koso, bi bə́ na ŋɨntɨ bə bi bə́ na jikə ŋəŋkəhə, mɛ tɨ bənchinda bəla, bə na gəndə fiəfɨ ntɨŋ mɛ tɨ bə na ji bə buŋga, mɛ bəbəŋ, mɛ bə na sakɨ, biɔŋ bichi nə̀ Nyɔ wu nə̀ fəə bi ə chɛti yu wɨ, yu nə̀ fə tɨ bi yu lɨ. 17 Yu nə̀ ji su fə biɔŋ bichi nə̀ ba kɨ ji. Biɔŋ bichi ji yu kaŋ, ɨ chiŋfi yu bi fə bi tə tɛshɛ kɨ ji nɨ bi na ji. 18 Yu na ji fo wu ntɛshɛ yi bənɨ bə kɨmbɨŋ'ə yi na ji gwɨ yihi. Na yu wu nə̀ bɛyɛ ntɛshɛ nyi, əji yu miɨ wu fiəfiə wu dzakɔ nə kkpə lɨ, fə yu kɨ ji nsafiə wu fiɔŋ fichi, yu jikə jimiɛ lə yu chi kkpə. 19 Biɔŋ biŋ fɔ manɨ ndzɨ Nyɔ nə̀ se lə fiɔŋ fichi fi yu nə̀ ji fi lɨ, Wene kɨ ji tɨ fi lɨ. 20 Nyɔ nə̀ fə ə chɛti Wene ntɨŋ lə biɔŋ bichi mɛ kɨ ji bi bɔ́ mɛ bi koso fichə ba tsu Nyɔ wɨ. Nyɔ nə̀ gweŋ ji gbeme bə ŋgwembe mə Wene lə lə yu ba bə budə tsa yi yu nə̀ kkpə kɨtɨ kɨ ŋ'wa lə wɨ.
21 Bə nə̀ sa bə ji dzəbudə nə Nyɔ wɨ, bə ji bə biŋgɔmbiɛ bibiə tsukɔ yu wɨ ndzɨ bə nə̀ fɨtɨ biɔŋ bibiə. 22 Bəmanɨ fɛŋ Nyɔ fichə ba tɛshɛ bəŋ yu wɨ. Yu nə̀ fə fiŋfi yu chɛti Wene ntɨŋ, wu nə̀ tsɔ miɨbəwəŋ ba kkpə ndzɨ bəŋ, fə bə kɨ ji ntsaaŋ yu wu Nyɔ nəfiə, bə jikə keŋkɛ ŋkweŋ, bə ji ŋgbɔ sɨŋ. 23 Bə jiba bə kɨ ji ma jilə bə na gɨntɨ fiə bə shəŋ yi bə galə yu wɨ, bə tɛsɛ gwɨ, bə lɨmi ŋkɨɨŋ, fiɔŋ jikə nɨkə bəŋ nə fiɔŋ fi bə na jiŋgə fiə fi wɨ, fi bə nə̀ wɔɔ nə shɔŋ yi ndzeŋe ntɨŋ. Shɔŋ yi ndzeŋe nyi na yi bə́ tɨfiə miɨ chi sha bɨŋ. Na shɔŋ nyi yi mɨ Pɔl nna nji miɨ wu nɨŋ wu yi.
Nɨŋ yi Nyɔ nə̀ nya bə Pɔl
24 Nna ŋ'woko buni fɛŋ bəŋgə bə nna ŋ'woko bɛŋ ntɨŋ ndzɨ bəŋ. Mɨ ntɔ bəŋgə bɛŋ mɨ fi fə ŋkanə bəŋgə bə Klistu nə̀ wɔɔ ndzɨ ntɛshɛ yi bənɨ bə kɨmbɨŋ'ə yi na ji gwɨ yihi. 25 Nyɔ' ga mɨ lə ŋkɨ nnɨntɨ ntɛshɛ yi bənɨ bə kɨmbɨŋ'ə lɨ, ŋkɨ ntɨdi diɛ yihi chi bə bəŋ nɨ yi na ji. 26 Diɛ nyi ji yi nə̀ ji bunyələ nə bəŋkɨkɨ bə bənɨ lə lɨ bəchi biya kɨyɛŋ, fɛŋ Nyɔ donchɛ yi bə bənɨ buhu. 27 Nyɔ nə̀ chiŋ lə yu fə ma fə bənɨ buhu bɛŋ kkə lə bənɨ bə na jimiɛhɛ Bəju ná keŋkɛ bubəŋ bu kɨtso lə bu shɔŋ yi bə́ nə̀ nyələ nyi lə. Shɔŋ nyi ji lə Klistu na ji bəŋ ntɨŋ, yu fɨtɨ bə jiŋgə fiə fə bə keŋkɛ bubəŋ. 28 Na Klistu no wu kə na tɨdi kɨhɨ bə bənɨ bəchi. Kə na tɨfiə bɔ bə bufɨ buchi bu Nyɔ nya bɨ, kə losɔ tɨ bɔ fə kə galə bɔ Nyɔ nəfiə bɔ kwətsə Nyɔ yəsɨ nɨ bənɨ bə Klistu lə naji lə bɔ kɨ ji. 29 Na fiɔŋ fi mɨ ntɛsɛ gwɨ kɨ nɨntɨ bə buŋga buchi bu Klistu nɨŋə bə bu mɨ wɨ.