4
Bəŋ bənɨ bəbəŋ bə na ji bə bəŋfia, bə kɨ fɨtɨ bɔ ji biɔŋ bi diəŋ bə bi ndzeŋe, bə gɔmbiɛɛ lə bə keŋkɛ ba tɨ Miɨ Wubəŋ bɔ́.Ntəfɨ yi fəŋgbɨŋ
2 Bəŋ bəchi kɨ tsɨsə, bə gɨntɨ fiə mfuŋ sɨŋ. Bə kɨ tsɨsə, bə galɨ bufɨ su, bə nyaa Nyɔ kɨmbafə. 3 Bə kɨ tsɨsə bə bɨ lə Nyɔ gû kɨgwəŋ bə diɛ yihi, kə kɨ tɨdi diɛ yi na ji nyi bunyələ tsukɔ Klistu wɨ. Na fiɔŋ fi nna nji buŋfia ntɨŋ ndzɨ fi. 4 Bə kɨ tsɨsə lə ndze tsa ba kɨ tɨdi diɛ ya ŋgbooŋ nɨ nna nji lə ŋkɨ ntɨdi. 5 Tsa yi bə na fɨtɨ biɔŋ bə bənɨ bə na jimiɛhɛ bənɨ bə kɨmbɨŋ'ə, bə kɨ fɨtɨ bə bufɨ. Tsa yila yi bə' keŋkɛ dzə yi fənə fiɔŋ, bə dîɔ ba ŋəŋ lə tsa ya kə̂ chɛkɛ kɨlɔlɔ. 6 Nchanyɛ yɛnɨ kɨ ji yi kɨyəfu tsá chi, yi ndzəŋgəə nɨ ŋka, ɨ bə tə kkə mfichə miɨ chi dzə́ yi diəŋ ntɨŋ.
Binntsɨsɨ
7 Tikikus jiwa ɨ yu tə bəŋ fiɔŋ fichi tsukɔ mɨ wɨ. Yu na ji ŋgwɨŋ waha, yu ji tɨ shəŋ yaha, kə na nɨntɨ bɨ bə yu Baba lɨ, miɨ lɨ miu, yu ji miɨ wu nɨŋ wu na nɨntɨ bə shəŋ yihi chi. 8 Mɨ mfaŋ yu bəŋ'ɨ bə kɨŋgɔmbiɛ lə yu bâ fə bə kkə̂ nɨ kə na ji ba koso shəŋ yɛnɨ. 9 Mɨ mfaŋ yu bɔ bə Ɔnesimus miɨ kɨtuŋ wɛnɨ, yu na ji tɨ ŋgwɨŋ waha wu na ji shəŋ yaha, yu lɨmi ŋkɨɨŋ fiɔŋ fi Klistu lə wɨ. Bɔ jiba bɔ tə bəŋ fiɔŋ fichi fi tɨchə sɛŋ. 10 Alistakus wu bɨ bə yu na ji fɛŋ tsɔŋ yi buŋfia ntɨŋ tsɨsɨ wa bəŋ. Maku wɛŋ wu jimə chɛ Banabas tsɨsə wa tɨ bəŋ. Na yu wu bə' keŋkɛ tɨ shɔŋ tsukɔ yu wɨ. Ɨ yu ba lɨ, bə lə̂kə yu. 11 Jisɔs wu bə́ na tsɨsə lə Jɔstus tsɨsə wa bəŋ tɨ. Ə ka kwa bənɨ bɛŋ bətɛ bə na ji Bəju bə kə na nɨntɨ bə bɔ fiɔŋ'ɨ fimo buŋkuŋ bu Nyɔ lə lɨ. Bɔ chitə mɨ kɨtso, bɔ fɨtɨ tɨ shəŋ yɛmɨ dɨ. 12 Ɛpaflas wu na ji tɨ miɨ kɨtuŋ wɛnɨ, yu nɨntɨ Jisɔs Klistu lɨ, tsɨsə wa bəŋ. Yu na tsɨsə tsá chi, yu gɔmbiəə bəŋ kɨtso, yu nendee lə Nyɔ fə̂ bə ləŋ ŋkɨɨŋ nɨ bənɨ bə tɛɛ ba kkə yɛyi yɛyi fiɔŋ fichi fi Nyɔ na se. 13 Mɨ ŋəŋ bə yəsɨ yɛmɨ lə yu na nɨntɨ bəŋ'ɨ kɨtso ma bənɨ bə Lɔdɛsha bə bə Iliapɔlis lɨ. 14 Dɔta Luka wu na ji mbwə waha wu shəŋ bə Dɛmas tsɨsə ba tɨ bəŋ. 15 Bə nyâ kɨnntsɨsɨ kɛŋ bə bəŋgwɨŋ bə kɨmbɨŋ'ə bə Lɔdɛsha, ba nya tɨ bə Niŋfa ma ntɛshɛ yi bənɨ bə kɨmbɨŋ'ə yi na tɛshɛ yu tsɔŋ. 16 Tsa yi bə tanchɛ kɨŋwatɨ kɨŋ, bə fâŋ ntɛshɛ yi bənɨ bə kɨmbɨŋ'ə yi Lɔdɛsha ntɨŋ, bɔ tânchɛ tɨ ba ŋəŋ tɨ lə bɔ bəbɔlə fâŋ bəŋ kɨ na ji ka bə bɔ, bə tânchɛ. 17 Bə tə̂ bə Akipus yu ŋə̂ŋ lə yu kânə nɨŋ yi Baba nya yu kaŋ. 18 Kɨŋ kɨnntsɨsɨ na mbɔndu yɛŋ, mɨ Pɔl bə kaŋ yɛŋ. Bə gɔ̂mbiɛ nɨ nna nji buŋfia ntɨŋ. Nyɔ dônchə bəŋ shəŋ yihi yi ndzeŋe.