Fiɔŋ fibəŋ na lə miɨ kkə̂ Klistu
3
Bəŋgwɨŋ, bə ŋgəŋ kanə, bə kɨ woko buni lə bə na ji bənɨ bə Baba lə. Mɨ' mbɔndu biɔŋ bə bəŋ, naji mfuŋ bə ntsu su mbɔndu wɨ kə. Nna mfɨtɨ manɨ lə ŋkɨɨ bəŋ. 2 Bə kɨ dze tsa bə bənɨ bə na fɨtɨ ba biɔŋ bibiə, bɔ kpɨ kwa su lə bə́ kɨ yembiɛ gwɨ́ yi bənɨ lə.ª Bɔ na ji bíə. 3 Na bɨ bɛŋ bə na sɔmbiɛ dzɔ́ dzə́ yi diəŋ ntɨŋ, bɨ bə na tsɨsə bɛŋ Nyɔ nɨ Kɨn'yɨntɨ kɨhɨ na donchɛ, kə sɛnti gwɨ ɨji ndzɨ Klistu Jisɔs. Kə na galəhə bufɨ biɔŋ bi nəgwɨ wɨ kə. 4 Bəmanɨ, naji ŋkeŋkɛ tɨ kɨgaŋ kɨ ganə bufɨ bia biɔŋ wɨ. Jilə miɨ wa su wu na gɔmbiɛ lə naji ɨ yu kɨ ji bə kɨgaŋ kɨ ganə bufɨ biɔŋ bi nəgwɨ bia wɨ, tə kɛmɨ kɨgaŋ na yakɨ kɨ miɨ wa lə. 5 Bə́ nə̀ sɔmbu mɨ dzɔ ɨji mɨ mfɔ díɔ bɨŋ yaŋ, nna nji miɨ Bəisla nə kɨtsɔŋ kɨ Bɛnjamɛn lə ntɨŋ, nji miɨ Bəhiblu, mbɛyɛ yi Bəhiblu. Tsu dia wu kɨlaŋ kaha lə, nji miɨ Bəfalasi. 6 Tsu dia wu keŋkɛ kɨgaŋ kɨtso bə mfə yi fiɔŋ fi Nyɔ lə dzə́ yi Bəju lə ntɨŋ, nnə̀ nsesɛ gbo ntɛshɛ yi bənɨ bə kɨmbɨŋ'ə nəjiŋ. Dia wu bilaŋ biaha lə, chi naji lə miɨ kɨ ji diəŋ, nnə̀ nsɨŋ bə ŋgbɔ. 7 Bəmanɨ, biɔŋ bi nnə̀ mba ŋkɨ ŋŋɨntɨ lə na bi mbɨ lə, nna ŋŋɨntɨ bi fɛŋ lə na biɔŋ bi kɨlɔlɔ lə ndzɨ fiɔŋ fi Klistu fəə mɨ lɨ. 8 Na kwa fia kə, nna ŋŋɨntɨ biɔŋ bichi ji kɨlɔlɔ mɨ lɨ ndzɨ fiɔŋ fi na ko ba ya biɔŋ bichi na ŋkkə yi Baba wɛmɨ Jisɔs Klistu. Mɨ' ntɔfu biɔŋ biŋ bichi ndzɨ yu. Mɨ ŋŋəŋ biɔŋ biŋ ji bi kɨnyənə lə fə mbɨ wɛmɨ kɨ ji Klistu, 9 bɨ bə yu kanə tɛshɛ kɨ ji fiɔŋ'ɨ fimo. Naji ɨ fi kɨ ji kə lə Nyɔ dze mɨ lə nna nji diəŋ yu yəsɨ ɨ biəlɨ dzə́ yɛmɨ yi bilaŋ biaha lə. Yu na dze mɨ ndzɨ mɨ' ŋga shəŋ Klistu wɨ. Njiŋ diəŋ Nyɔ nəfiə na biəlɨ ji shəŋ yi miɨ sə galə Klistu wɨ. 10 Fiɔŋ fi nna nse fɛŋ na lə ŋkkə Klistu buni, ŋkeŋkɛ buŋga bu yu na keŋkɛ nɨ yu nə̀ dzakɔ nə kkpə lɨ. Nna nse tɨ lə ŋ'wɔ ŋgə nɨ yu nə̀ wɔɔ, lə nnya gwɨ yɛmɨ ba kkpə lɨ nɨ yu nə̀ nya, 11 diŋkəla ɨ Nyɔ dzakɔ tɨ mɨ nə kkpə lɨ.Nna ntɛsɛ gwɨ njiŋgə dɨ wu nna ŋgɨntɨ
12 Nna ntɨdiɛhɛ mɛ lə mɨ' ŋkeŋkɛ biɔŋ biŋ makə lə mɨ' ŋgweyɛ. Mbambi wa ntɛse gwɨ lə nnambɔ kɨbandə ba chiŋfi biɔŋ bia mɨ kaŋ, ndzɨ Jisɔs Klistu' dze mɨ, mɨ ŋkɨ nji miɨ wuhu. 13 Bəŋgwɨŋ, nna ŋŋɨntəhə lə nchiŋfi wa biɔŋ bia mɨ kaŋ. Bəmanɨ fiɔŋ fi nna mfɨtɨ na kwa lə nna ŋgufiɛ biɔŋ bi sə chɛɛ, ntɛse gwɨ lə nchiŋfi ji bi na ji sa fiə. 14 Nna ntɛsɛ gwɨ njiŋgə kwa dɨ wu nna ŋgɨntɨ, lə ŋkeŋkɛ bikwəntsə bi na ji ndɨ yi Nyɔ' dɨyə mɨ lə mbəndɨ bɔ́ nɨ nna nji Jisɔs Klistu ntɨŋ.
15 Bɨ bəchi bə nə kɔ kɨmbɨŋ ntɨŋ naji lə kə kɨ gɔmbiɛ biɔŋ biŋ nyi dzə ntɨŋ tɨ. Bəmanɨ, jilə bəŋ bədɔ na gɔmbiɛ chichi, tə bia biɔŋ na Nyɔ wu jiwa yu tseyɛ bəŋ kɨŋgbooŋ kɨsu. 16 Fiɔŋ fibəŋ na lə kə chîŋfi ji fiɔŋ fi kə' fɨyə wɨ buni.
17 Bəŋgwɨŋ, bə fɨ̂yə nə mɨ lɨ, bə kɨ ŋɨntɨ tɨ fiə wu bənɨ bədɔ bə nə̀ fɨyə nə bɨ lɨ na keŋkɛ. 18 Nna nchanyɛ mɛ ndzɨ chi nnə̀ mba ŋkɨ nchanyɛ bə bəŋ tsá kɨyɛŋ, mɨ ŋkɨ nchisə nchanyɛ fɛŋ tɨmo bə məndəŋ yəsɨ lə bənɨ kɨyɛŋ basu bə na ji bə fiə wu na donchɛ lə bɔ na ji bənɨ bə nchɛnɛ lə bə kɨtɨ kɨ ŋ'wa lə kɨ Klistu lə. 19 Bə́ ná jishi lɨ ba bənɨ. Wubɔ nyɔ na bitɔ bibɔlə. Bɔ na dze gwɨ bə biɔŋ bi naji lə yaa tə kɨ kwete bɔ bukwenɛ. Kɨŋgɔmbiɛ kɨbɔlə ji kwa biɔŋ bi mbi lə wɨ. 20 Kə na ji fiaha bənɨ bə kɨtuŋ kɨ bɔ́ lə, ɨji na nə mɨ wu kə na wokɔ lə Nchitə waha Baba Jisɔs Klistu ná dza tə ba lɨ. 21 Tsa yi yu ná ba, ɨ yu yashənɨ gwɨ́ yaha yi wa yiŋ, ɨ yi tsu nɨ gwɨ yihi yi na ji bə kɨyunu. Yu ná yashənɨ ji bə buŋga buhu, bu yu ná banchɛ biɔŋ bichi bə bu ba kɨ ji bi bɨŋ.