Bə fɨ̂yə nə Jisɔs Klistu wɨ
2
Dzenəfə bə na ji Klistu ntɨŋ yu koso shəŋ yɛnɨ, kɨnse kɨhɨ bəŋ wɨ fə tɨ shəŋ yɛnɨ də. Bə na ji ntɛshɛ bə Kɨn'yɨntɨ kɨ Ntsaaŋ. Bə keŋkɛɛ ba shəŋ yi ndzeŋe, bə kwesɛ tɨ yaa bə gwɨ́ yɛnɨ. 2 Nɨ fi na ji manɨ, bə fə̂ ŋkanə wɔɔ buni. Bə kɨ ji diɛ miu, kɨnse kɛnɨ ji kɨmo, bə keŋkɛɛ shəŋ miu, bə keŋkɛɛ tɨ kɨŋgɔmbiɛ kɨmo. 3 Miɨ kə kɨ fɨtɨ biɔŋ yu gɔmbiɛ kwa kɨ gwɨ yihi lə makə lə yu kɨ dze gwɨ yi kɨlɔlɔ. Miɨ kɨ dze gwɨ yihi koso, yu kɨ dze bədɔ bɔ́ ba ya gwɨ yihi. 4 Miɨ kə kɨ fɨtɨ fiɔŋ fi naji ɨ fi ba kwa ji yu bə mbɨ, yu kɨ fɨtɨ fiɔŋ fi naji ɨ fi ba tɨ bənɨ bədɔ bə mbɨ.5 Fiə wɛnɨ naji lə wu kɨ ji diəŋ nɨ wu Jisɔs Klistu lə.
6 Yu nə̀ ji diəŋ nɨ Nyɔ dzə́ ntɨŋ chi,
bəmanɨ, yu nə̀ kə shiŋkɛhɛ fia fiɔŋ wɨ lə bɔ bə Nyɔ na ji diəŋ,
7 yu shə dɨ wa
ba dze ji dɨ wu mfia lə.
Bə́ bɛyɛ yu,
yu kɨ ji diəŋ nɨ miɨbəwəŋ.
8 Tsa yi yu nə̀ ji miɨbəwəŋ,
yu nə̀ dze gwɨ yihi koso ba kɨ woko bə Nyɔ,
yu ba bɨŋ lə yu kkpə,
gwɨtɛɛ kkpə yi kɨtɨ kɨ ŋ'wa lə wɨ.
9 Nɨ yu nə̀ fəə manɨ, Nyɔ bəndəsɨ yu
ba ga yu dɨ wu na yakɨ wu miɨ chi lə
ba nya yu yɨ wu na yakɨ yɨ́ chi,
10 fə miɨ chi wu na ji bɔ́
bə wu na ji koso ma wu na ji sha nəkoso
wɔɔ yɨ wu Jisɔs lə wuŋ ba tuŋ nu,
11 miɨ chi chanyɛ bə bifuŋ bihi lə Jisɔs Klistu na Baba.
Bɔ dze kɨ fɨtɨ manɨ ɨ bubəŋ kɨ gɨntɨ bə Taa waha Nyɔ.
Bə na tsalə mbi no ntɨŋ nɨ mbíansɨ
12 Bəma nsáŋ yɛŋ yi shəŋ'ə, chi bə na ba bə kɨ woko Nyɔ tsa yi nna nji bə bəŋ, gwɨtɛɛ fɛŋ chi nna nsɨŋ bə bəŋ, bə gəŋ fiə bə mfə yi biɔŋ bi na tsukɔ mfɔ yənɨ yi fo wɨ. Bə kɨ fɨtɨ, bə lete, bə jakɨ. 13 Bə kkə̂ lə na Nyɔ wu na nɨntɨ bəŋ ntɨŋ, yu fɨtɨ lə bə kɨ nya kɨgaŋ bə mfə yi biɔŋ bi yu na se, na yu tɨ wu na nya bəŋ buŋga bu fənə biɔŋ bia.
14 Bə dze kɨ fɨtɨ biɔŋ bichi, bə kə kɨ nuŋɔ makə bə yimbiɛ, 15 fə bə tsalə ba kɨ ji ŋkweŋ sɨŋ. Bəma, ɨ bə tə kɨ ji beŋ bə Nyɔ lə bə na ji ŋkweŋ sɨŋ ŋkɨkɨ no ntɨŋ wu kɨŋfinchə bə shəŋ yi yii. Mbi no ntɨŋ bə na tsalə nɨ mbíansɨ 16 nɨ bə na chiŋfiª shɔŋ yi na nya buwəŋ bə bənɨ ŋkɨɨŋ. Jilə bə na fɨtɨ manɨ, ɨ kɨ ji butsu bu Jisɔs Klistu ná ba, ŋkɨ ŋkuntsɔ gulu lə ŋkə nlətə lɨtɨ wu kɨlɔlɔ lə, ŋkə nɨŋkə nɨŋ yi kɨlɔlɔ.
17 Nɨ bə galə shəŋ Nyɔ wɨ, kɨjilə na bintɔfiɛ bi bə fəə yu lɨ. Ɨji tɨ lə bə́ jiba ɨ bə́ kanə shiɛ mɨ nɨ mbiŋ ba yinə bintɔfiɛ biɛnɨ wɨ, ŋkɨ nlaŋkɨ, ŋ'woko ji buni bə bəŋ bəchi. 18 Bəma, nna nse lə bə tɛ̂shɛ mɨ kə kɨ laŋkɨ, kə woko buni.
Pɔl chanyɛ kɨ Timɔti bɔ bə Ɛpaflɔditus lə
19 Jilə Baba Jisɔs bɨŋ, tə tsa tsəsɨ, njiwa mfaŋ Timɔti bəŋ'ɨ. Tsa yi yu ba fɔ bəŋ wɨ ba fichə tsu jiŋ ba tə mɨ nɨ bə na ji, ɨ shəŋ də mɨ. 20 Nna nsɨŋ bə miɨ wudɔ nɨ yu wu naji ɨ yu keŋkɛ kɨgaŋ kɨ yɛyi bəŋ wɨ nɨ nna ŋkeŋkɛ. 21 Mɨ nchanyɛ mɛ ndzɨ bənɨ bəchi na nya kɨgaŋ ji bə biɔŋ bibɔlə, bɔ jikə nyaha kɨgaŋ bə fiɔŋ fi Jisɔs Klistu na se. 22 Bəmanɨ, bə na kkɨ lə Timɔti na miɨ wu tseyɛ bəŋ fiɔŋ fi yu na ji fi lɨ nɨ kə nɨŋə bə yu kə tɨdi shɔŋ yi ndzeŋe, kə nɨntɨ bɨ bə yu diəŋ nɨ wɛŋ ba yu kɨ nɨntɨ bə tɨɨ. 23 Njiwa mfaŋ Timɔti bəŋ'ɨ tsa tsəsɨ, bəmanɨ mbambi wa nchənə lə ŋŋəŋ lə biɔŋ jibia bi kɨ ji nəŋ dia wɛmɨ lə. 24 Nna ŋgalɨ bufɨ Baba wɨ lə shə tsa tsəsɨ ɨ mɨ wu mɨ mba ŋəŋ tɨ bəŋ.
25 Nna ŋgɔmbiɛ lə na ndzeŋe lə nchi mfaŋə Ɛpaflɔditus bəŋ'ɨ. Yu na ji ŋgwɨŋ, kə nɨntɨ bə yu, kə dio bə yu ntɛshɛ bbutsu bə bbushə yɨ wu Nyɔ lə lɨ. Yu na ji tɨ miɨ wɛnɨ wu shɔŋ wu bə nə̀ faŋə lə yu ba jiŋgə mɨ. 26 Yu nə shəntəə kɨtso lə yu ŋəŋ bəŋ bəchi, shəŋ bɨfi yu ndzɨ yu nə wɔ lə bə nə wɔ lə yu nə gwente lɨ. 27 Na yɛyi lə yu nə gweŋ kɨtso ba shə nchitə bɨŋ. Bəmanɨ, Nyɔ kwese yaa bə yu. Nyɔ nə kə kwesɛ yaa kwa ji bə yu, yu nə kwese tɨ yaa bə mɨ lə Ɛpaflɔditus tə kə kkpə ba yinə ŋgə, ŋgə wu nna ŋ'woko no bɨŋ. 28 Bəma, nna nse kɨtso lə mfaŋ yu fə bə chisə ŋəŋə yu wɨ ba wɔ buni, shəŋ yɛmɨ tsukə funsə mɨ kɨtso. 29 Bə lə̂kə yu nɨ bənɨ bə Baba lə bə kɨnlaŋ kɨchi. Miɨ nɨ no naji lə bə kɨ kuntə yu. 30 Mɨ nchanyɛ mɛ ndzɨ nə shə tsəsɨ yu tə nə kkpə ndzɨ nɨŋ yi Klistu, chi yu nə nya gwɨ yihi lə yu kɨ jiŋgə mɨ ka wɛnɨ.