Kɨŋwatɨ kɨ Pɔl nə̀ bɔndɔ bə ntɛshɛ yi
Filipi
1
Kɨŋwatɨ kɨŋ na mɨ Pɔl wu bɔndɔ kɨ bɨ bə Timɔti bə na ji beŋ bə nɨŋ'ə bə Jisɔs Klistu lə. Kɨŋwatɨ kɨŋ na gɨntɨ bə bəŋ, bənɨ bə Klistu Jisɔs lə bəchi Filipi bə bənsafiə bə ntɛshɛ yi bənɨ bə kɨmbɨŋ'ə ma bə bədikin. 2 Taa waha Nyɔ bə Baba Klistu Jisɔs dônchə bəŋ shəŋ yi ndzeŋe ba nya tɨ bəŋ budə.Pɔl nya kɨmbafə bə Nyɔ ndzɨ bənɨ bə Filipi
3 Tsa yi la yi na mba ŋgɔmbiɛ kɛnɨ, nnya kɨmbafə bə Nyɔ wɛŋŋ. 4 Nna ntsɨsə kɨntsɨsɨ bəŋ bɨŋ bəchi ŋkɨ ntsɨsə bə kɨnlaŋ, 5 ndzɨ dze nə butsu bu fiəfiə bɨŋ ba fɔ ndɛŋ, bə nə̀ tɛshɛ ba kɨ nɨntɨ bə bɨ fə shɔŋ yi ndzeŋe tsukɔ Jisɔs Klistu wɨ kɨ gɨntɨ fiə. 6 Nna ŋkkɨ lɨ buni lə Nyɔ wu gbɔɔ wa nɨŋ yi ndzeŋe nyi bəŋ ntɨŋ, yu jiwa ɨ yu gəŋ fiə ba gəŋ tuŋ fəŋgbɨŋ butsu bu Jisɔs Klistu ná chisə ba. 7 Fi na ji diəŋ lə ŋkɨ ŋgɔmbiɛ kɛnɨ manɨ, ndzɨ bə na ji shəŋ yɛŋ, kə ji fiɔŋ'ɨ fimo, ɨji nɨ Nyɔ donchɛ bɨ shəŋ yihi yi ndzeŋe. Kə na lɨmi fi wɨ fɛŋ mɛ, əji nɨ kə ba kə kɨ lɨmi, mɛ ji tsa yi nna nji tsɔŋ yi buŋfia ntɨŋ makə tsa yi nna ŋgəndə ntambi, mbɨmi kɨyɛyi kɨ shɔŋ yi ndzeŋe lə, mfɨtɨ yi chiŋfi gaŋ. 8 Nna nchanyɛ mɛ Nyɔ kkɨ buni lə nna nya kɨgaŋ kɨtso bə bəŋ, nlaŋkɨ bəŋ bəchi bə kɨnse kɨ Klistu Jisɔs lə.
9 Nna ntsɨsə lə kɨnse kɛnɨ kɨ ko kɨ gɨntɨ fiə, bə kɨ keŋkɛ bufɨ, bə chənə biɔŋ buni. 10 Bə na chənə manɨ ɨ bə tə kɨ sabi bi na ji bia diəŋ. Bəma, ɨ ná kɨ ji butsu bu Jisɔs Klistu ná ba, ɨ bə kɨ ji ntsaaŋ, bə ji ŋkweŋ sɨŋ. 11 Bə ná kɨ ji manɨ ji bə' yi bə fiə wu kɨjimiɛ kɨ diəŋ'ə wu Jisɔs Klistu' fəə bə keŋkɛ. Fiŋfi ná fɨtɨ ɨ Nyɔ kɨ ji bə bubəŋ bə kɨŋkuntə.
Pɔl kɨ ji tsɔŋ yi buŋfia ntɨŋ, shɔŋ yi na tsukɔ Jisɔs wɨ gɨntɨ fiə
12 Bəŋgwɨŋ, nna nse lə bə kkə̂ lə biɔŋ bi tɨchə biŋ mɨ bichi, bi chitə yɛyi yɛyi lə shɔŋ yi ndzeŋe tsukɔ Jisɔs wɨ kɔ ba gəŋ fiə. 13 Biɔŋ biŋ fə bənɨ bə bitsa lə bə na kɨki ntɔ ma bənɨ bəchi kkə lə nna nji sɛŋ tsɔŋ yi buŋfia nyi ntɨŋ mɛ ndzɨ nna nji miɨ wu Klistu. 14 Buŋfia bu nna nji buŋ bu ntɨŋ' koso shəŋ yi bəŋgwɨŋ kɨyɛŋ'ə Baba ntɨŋ, bɔ kɨ tɨdi diɛ yi Nyɔ bə buŋga, nle sɨŋ.
15 Nna ŋkkɨ lə bɔ bədɔ na tɨdi kɨ Klistu lə mɛ, bɔ fanshɛnɨ, bɔ dio lə bɔ dze nɨŋ yɛmɨ, bəmanɨ bədɔ tɨdi yibɔ bə biŋgɔmbiɛ bi ndzeŋe. 16 Bɛŋ bənɨ na tɨdi manɨ ndzɨ bɔ na laŋkɨ mɨ, bɔ kkɨ tɨ lə nna nji tsɔŋ yi buŋfia ntɨŋ mɛ ɨji ŋga yi Nyɔ mɨ fə ŋkɨ ntambi kɨyɛyi kɨ shɔŋ yi ndzeŋe lə. 17 Bədɔ ba tɨdi kɨ Klistu lə kwa nə bifuŋ wɨ, bɔ noŋko ji yɨ yibəŋ gwɨ́ yibɔlə lɨ, fə bɔ fəə manɨ ba yinə funyi ŋgə wu nna ŋ'woko no wɨ buŋfia buŋ ntɨŋ. 18 Fia fiɔŋ na keŋkɛ la fi fənə? Se lɨ bɔ kɨ tɨdi manɨ bɔ lɔshə, makə bɔ tɨdi bə kɨyɛyi, nna nlaŋkɨ fiɛŋ ji bulaŋə ndzɨ nə biɔŋ bichi ntɨŋ, bɔ tɨdi ba ji kɨ Klistu lə.
19 Cha chi ŋkɨ nlaŋkɨ manɨ, ndzɨ nna ŋkkɨ lɨ lə nɨ bə na tsɨsə bə mɨ Kɨn'yɨntɨ kɨ Jisɔs Klistu lə chitə mɨ, njiwa mfɔfo. 20 Fiɔŋ fi nna njiŋgə fiə fi wɨ, ŋ'wokɔ yɛyi yɛyi na lə ŋkə ŋkeŋkɛ yaa mɛ kpa. Njiwa ŋkuŋ kwa shəŋ, fiɔŋ fichi fi nna mfɨtɨ bə gwɨ yɛmɨ, fi kɨ ba Klistu bə kɨŋkuntə fɛŋ bə tsá chi, se lɨ ŋkɨ nji wuwəŋ makə wuŋkpə. 21 Nna nchanyɛ mɛ ndzɨ nə mɨ lɨ, ndiə buwəŋ, tə njiwa ŋkɨ nji kwa Klistu lɨ, ŋkkpə lɨ, ɨ kɨ ji mbɨ mɨ lɨ. 22 Jilə njiwa ŋkɨ nji wuwəŋ, ŋkɨ nɨntɨ nɨŋ yi na chitə bənɨ buni. Bəmanɨ, chi biɔŋ biŋ na ji bifɛ mɛ, nna ŋkkəhə lə njiwa nsa fi la lə. 23 Nna njikijiki bi bifɛ fəntɨŋ. Kɨnse kɛmɨ na lə ŋgəŋ kɨ ji bɨ bə Klistu fiɛmɨ. Fia fiɔŋ na ndzeŋe kɨtso ba ya njiŋ wuwəŋ. 24 Bəmanɨ, fi na ndzeŋe kɨtso lə ŋkɨ nji wuwəŋ ndzɨ bəŋ. 25 Nɨ fi na ji manɨ, nna ŋkkɨ buni masə sɨŋ lə njiwa ŋkɨ nji wuwəŋ, nnɨntɨ bə bəŋ bəchi fə bə kɨ ko bə gɨntɨ fiə, nlaŋkɨ tɨ nɨ bə galə shəŋ Klistu wɨ. 26 Bəma, tsa yi mfichə ba ba kɨ ji bə bəŋ, ɨ bə kɨ ji bə bubəŋ tsukɔ Jisɔs Klistu wɨ ndzɨ mɨ.
Bə kɨ jimi kɨjimiɛ kɨ Jisɔs Klistu na se
27 Fiɔŋ fi nna nse lə ntə na lə bə jîŋ kɨjimiɛ ɨji kɨ shɔŋ yi ndzeŋe yi Klistu lə. Bə kɨ ji manɨ ɨ se lɨ ntsu ba ŋəŋ bəŋ lɛɛ, ɨ se lɨ njikə baha lɛɛ, ŋkɨ ŋ'woko kwa lə bə lɨmi ba ŋkɨɨŋ, bə ji bə shəŋ miu, bə ji miɨ lɨ miu, bə dio fiɔŋ'ɨ fimo kɨmbɨŋ ntɨŋ tsukɔ shɔŋ yi ndzeŋe nyi wɨ. 28 Bənɨ bə na ti bə bəŋ, bə kə kɨ lete bɔ dududu. Ɨ bə na letɛhɛ bɔ, ɨ fiŋfi donchɛ bɔ lə Nyɔ jiwa ɨ yu fə bə fɔfo, bəmanɨ ɨ yu jishi bɔ bujishɛ. 29 Bə kkə̂ lə Nyɔ kə fəkə lə bə kɨ ji bənɨ bə Klistu lə bə mbɨŋ kwa ji bə yu. Yu fə lə bə wɔ̂ tɨ ŋgə ndzɨ Klistu. 30 Chi bə tɛshɛ mɨ lə kə kɨ dio kɨ shɔŋ nyi lə bəchi yi bə nə̀ ŋəŋə ndio ndzɨ yi, ɨji tɨ yi yi bə na woko lə mbambi wa yi wɨ fɛŋ.