Pɔl nya bənɨ bə kɨmbɨŋ'ə bə Filipi bitɨfiə
4
Bəma bəŋgwɨŋ, nna nlaŋkɨ bəŋ kɨtso, nji bə kɨgaŋ lə ŋŋəŋ bəŋ. Na bəŋ bə fəə mɨ ŋkɨ ŋ'woko buni, bə ji kɨfulɔ kɛmɨ kɨ buŋkuŋ'ə. Nsáŋ yɛŋ, bə kɨ lɨmi kwa ŋkɨɨŋ Baba wɨ manɨ.2 Nna nnende lə Ɛwɔdia bɔ bə Sentiki tsû fiɔŋ'ɨ fimo ndzɨ bɔ na ji miɨ bə wəmɛni Baba ntɨŋ. 3 Mɨ ŋkɨ ntɨdi tɨ bə wə wu na ji wa miɨ wɛmɨ wu yɛyi wu kə na nɨntɨ ntɛshɛ lə wə chitə bəkansɨ bɛŋ bɔ tsu fiɔŋ'ɨ fimo. Na bənɨ bə kə diɔnɔ bɨ bə bɔ nɨŋ yi shɔŋ yi ndzeŋe ntɨŋ yi na tsukɔ Jisɔs Klistu wɨ, bə Klɛmɛn ma bənɨ bəchi bə bɨ bə bɔ nə̀ nɨntɨ. Bənɨ bɛŋ bəchi, yɨ yibɔlə ya kɨŋwatɨ kɨ buwəŋ'ə ntɨŋ.
4 Bə kɨ woko buni Baba ntɨŋ tsá chi. Nɨ mɨ ntədiə cha, nna ntɨdi ntsu su lə bə kɨ woko buni. 5 Bə kɨ donchɛ fiə wu kɨyəfu lə, bə gɔmbiɛ tɨ lə tsa yi Baba jiwa ɨ yu ba ya gwɨgwɨ. 6 Bə kə kɨ funsə gwɨ kɨ fiɔŋ fidɔ lə mɛ kpa. Bə kɨ tsɨsə butsɨsə kɨ biɔŋ bichi lə bə galɨ Nyɔ nəfiə. Tsa yi bə na tsɨsə, bə kɨ bi fiɔŋ fi bə na se nə yu lɨ, bə nyaa kɨmbafə bə bi yu na fɨtɨ bia. 7 Ɨ bə na fɨtɨ ma, ɨ Nyɔ tə nya bəŋ budə buhu, ɨ bu kɨ kɨki shəŋ yɛnɨ bə bufɨ bwɛnɨ ndzɨ bə na ji Klistu Jisɔs ntɨŋ. Budə bu Nyɔ na nya buŋ na yakɨ bufɨ bu miɨbəwəŋ'ə buchi.
8 Bəŋgwɨŋ, bə ŋkanə, biɔŋ bi bə naji lə bə kɨ gɔmbiɛ na biɔŋ bi na ji bi kɨyɛyi lə bə biɔŋ bi kɨŋkuntə lə, ma biɔŋ bi na ji diəŋ. Bə kɨ gɔmbiɛ ji biɔŋ bi na ji ntsaaŋ bə biɔŋ bi naji ɨ bənɨ kɨ laŋkɨ ma biɔŋ bi naji ɨ bi kwe bənɨ shəŋ bɨŋ. Jilə biɔŋ biasu bi ndzeŋe tuŋ mɨ, jilə biɔŋ biasu bi naji ɨ bənɨ kɨ sɛnti, bə kɨ gɔmbiɛ ji tsukɔ bia biɔŋ wɨ. 9 Fiɔŋ yɨla fi bə fɨyɛ, fi bə ləkə, fi bə wɔɔ bə fi bə ŋəŋə nə mɨ lɨ, bə kɨ fɨtɨ ji fi. Chi bə kɨ fɨtɨ, Nyɔ wu budə jiwa ɨ yu kɨ ji bə bəŋ.
Pɔl wɔ buni nɨ bənɨ bə Filipi nya yu kɨgaŋ
10 Nna ŋ'woko buni kɨtso Baba ntɨŋ nɨ bə chisə donchɛ kɨgaŋ kɛnɨ bə mɨ nɨ bə nə̀ ba bə kɨ donchɛ. Nna ŋkkɨ buni lə bə nə keŋkɛɛ kɨgaŋ kɛmɨ, bəmanɨ bə fiəŋkə ji dzə ya. 11 Nna nchanyɛhɛ mɛ lə nna mfiəŋkə fiɔŋ. Mɨ mfɨyə ba kkə nɨ naji ŋkɨ nji dzə́ ntɨŋ chi. 12 Nna ŋkkɨ nɨ fi ba fi kɨ ji tsa yi bufiəŋkə, ŋkkɨ tɨ nɨ fi ba fi kɨ ji tsa yi nna ŋkeŋkɛ kɨtso. Mɨ mfɨyə fiŋ ba kkə nɨ naji ŋkɨ nji tsá chi biɔŋ bichi ntɨŋ, fa mɨ ndiə lɛɛ, fa ŋkə ndiəhə lɛɛ, fa nna nji bə kɨyɛŋ makə nna mfiəŋkə lɨ lɛɛ. 13 Naji mfə biɔŋ bichi, ɨji bə buŋga bu Klistu na nya mɨ.
14 Bəmanɨ, nɨ nna ntɨdi tɨmo mɛ, bə fə buni bə nchitə mɨ ŋgə wɛmɨ no ntɨŋ. 15 Bəŋ bənɨ bə Filipi, bə na kkɨ lɨ lə tsa yi fiəfiə yi nnə̀ ŋgbɔɔ ntə shɔŋ yi ndzeŋe nyi sha yɛnɨ yi Mɛsɛdɔnia ntɨŋ, lə ŋkɨ ndza nə nɔ, ntɛshɛ yidɔ yi bənɨ bə kɨmbɨŋ'ə nə̀ kə yashənɨ binya bə mɨ. Nə̀ kwa bəŋ. 16 Tsa yi nnə̀ nji Tɛsalɔnika,ª bə faŋ mɨ nchitə, ba biə faŋə. 17 Nna nchanyɛhɛ mɛ lə nna nse lə bə kɨ faŋkɨ mɨ biɔŋ. Nna ŋŋɨntɨ kɨtso ji bikwəntsə bi Nyɔ ná nya bəŋ ndzɨ fiɔŋ fi bə fəə bə mɨ. 18 Bə nə̀ faŋ Ɛpaflɔditus bə binya, yu ba nya mɨ. Mɨ ŋkɨ nji fɛŋ mfiəŋkə sɨŋ fiɔŋ. Nnə̀ nləkə binya bia bichi, ŋŋəŋ bi yɛnti ya nɨ nnə̀ ŋgɔmbiə. Binya biŋ na bintɔfiɛ bi bə fəə Nyɔ lɨ, yu ləkə, bi kɨ tɔfiɛ ntsɔŋfu yi ndzeŋe, yu laŋkɨ. 19 Nyɔ wɛmɨ na keŋkɛ kɨbə kɨ bubəŋ buchi lə bu kə na se, yu jiwa ɨ yu nya bəŋ biɔŋ bichi bi bə na fiəŋkə ə ba nə Klistu Jisɔs wɨ. 20 Bubəŋ kɨ ji bə Nyɔ wu na ji Nyɔ, yu ji Taa waha tsá chi ŋka sɨŋ. Fi kɨ ji ma.
Binntsɨsɨ bi fəŋgbɨŋ
21 Bə tsɨ̂sɨ bənɨ bə Klistu Jisɔs lə bə ntsaaŋ bəchi mɨ lɨ. Bəŋgwɨŋ baha bə kə na ji mɛ bə bɔ na tsɨsə bəŋ tɨ. 22 Bənɨ bə Nyɔ lə bəchi bə na ji mɛ tsɨsə ba bəŋ, gwɨtɛɛ bə na ji ba ntɔ wu Kaisa lə ntɨŋ.
23 Baba Jisɔs Klistu dônchə shəŋ yihi yi ndzeŋe bin'yɨntɨ biɛnɨ bɨŋ. Fi kɨ ji ma.