Jɔna lɔ bə Nyɔ
4
Nɨ Nyɔ nə̀ kwesɛ cha yaa bə bənɨ bə Ninifɛ ma, fi tsu ba bə Jɔna lɨ kɨtso, yu gbɔ bulo 2 Yu tsɨsɨ bə Baba Nyɔ lə, “Ɔɔ Baba Nyɔ, fiŋ na kə fiɔŋ fi nnə̀ ntədiə fia bə wə mbambi biŋ? Fia nə̀ fiɔŋ fi nə̀ fəə fia lə nsokiɛ ba kɨ lətə ŋgɨntɨ ji Tashi. Nnə̀ ŋkkɨ lɨ lə wə ji Nyɔ wu na ji bə shəŋ yi ndzeŋe bənɨ wɨ, wə kwesɛ yaa bə bɔ, wə jikə lɔɔ fɔfɔ, kɨnse kɔhɔ bənɨ wɨ jikə kaha, wə ba wə yashɛnɨ kɨŋgɔmbiɛ kɔhɔ. 3 Bəma Baba Nyɔ, nna nende wə, bu kpɨsɨ mɨ fɛŋ, na ndzeŋe lə ŋkkpə nə njiŋ'ɨ.” 4 Baba Nyɔ bi bə yu lə, “Wə na keŋkɛ buŋga budɔ bu lɔnɔ?” 5 Jɔna fɔ nə kɨtuŋ ka ntɨŋ ba gəŋ jiŋ dia wu diɔ boso, ba ku kɨtsawu mɨ. Lə yu ku kɨ, yu jiŋ fufu wa nəkoso kɨ wokɔ lə yu ŋəŋ fiɔŋ fi tɨchə Ninifɛ. 6 Mɨ fɛŋ, Baba Nyɔ, wu ji Nyɔ, fə gbɨ ləyə ba fu yu nəbɔ́ ba nya yu fufu wu ndzeŋe fə yu fufiɛ buni. Jɔna kɨ ji bə kɨnlaŋ kɨbəŋ ndzɨ gbɨ wa. 7 Lə butsu wɔ, Nyɔ faŋ kɨməmə kɨdɔ kɨ ba diə gbɨ wa, wu kkpəyɛ. 8 Tsa yi wɨmbɨ nə̀ fɔɔ, Nyɔ faŋ kɨŋfaŋ nə dia wu diɔ boso kɨ shi tsooo, wɨmbɨ kɨ tinti tɨ tsooo Jɔna bɨŋ. Wu tiŋ yu, gwɨ mbəŋkɨlɨ yu, yu nende lə yu kkpə bukpənə. Yu tə lə, “Na ndzeŋe lə ntə ŋkkpə nə njiŋ'ɨ.” 9 Nyɔ bi bə yu lə, “Wə na ji bə buŋga yɨla bu naji wə kɨ lo ndzɨ gbɨ wuŋ?” Jɔna chi bə yu lə, “Nna nji bə buŋga buchi bu lɔnɔ, nlɔ tɨmo ba kkpə lɨ.” 10 Baba Nyɔ tə lə, “Wə dzuli wa gwɨ ndzɨ gbɨ wuŋ, ɨ ji wə kə wu nə̀ tishɛ wu makə mfə lə wu kɔ, wu nə̀ məndɨ wu kɔ, butsu chɛ wu kkpə. 11 Ŋkə kwesɛ yaa bə Ninifɛ kɨtuŋ kɨbəŋ nɨ ka? Kɨtuŋ ka na keŋkɛ bənɨ bə na yakɨ bəntsuku gbɨ bə mbaafiɛ (120,000) bə na jikə kkə nəməsə makə nədiɨ wu bɔ, kɨ ji tɨ bə nyɛ́ŋ kɨyɛŋ sɔ.”