Dibizlav ndawyan ɓəw talan mahayək ndawyan
21
Adəwən səna, kat lim dibizlav dawyan ɓəw talan mahayək ndawyan. Dibizlav taməcek ɓəw talan mahayək taməcek tu lekigi, za maza mordoy ɗahɗaba. 2 Za acin kat lim liɓde maa kweɗek, liɓde səna Ursalima ndawyan. Aa surohohoh aa dibizlav za, Bayzlav acin mə surohoh tik. Mə wəzlelekaɗ wa werti mə wəzlel kəsəm kə dəm mawəl. 3 Kat zlim hid aa cəwəla dayday, wəla səna a pətah aa mə lay ɗew ngə bay za. Sin a luw: ‹‹Tanjinhi mazlaɓ ngə Bayzlav awan adab hidigi. Sin av kə ɗew avə hidigi, za taniy təm av kə mbaɗiy kə hidiy ngetik. Bayzlav atalan tik av kə ɗew avə tanigi, za sin av kə ɗew kə Bayzlav ngatan. 4 Bayzlav av kə saɗ teweɗ təm həriy tan kaɗ. Taniy a məciy ɗaba, a jəkiy drif mimci ɗaba, a haniy ɗaba, za ko takwan taniy a zlimta ɗaba. Asəna acin, Bayzlav av kə lek təkəniy taməcek səna kaɗ.››5 Za acin hid mə ɗew təm lay ngə bay ɗiya luw: ‹‹Tanjinhi taa zlambaɗ təkəniy cike kə mbaɗiy ndawyan.›› Za sin ɗiya luwak baha: ‹‹A ɗəɗef kaɗ, kadaban zləgamiy səna law ngə yək, za mindiwin.›› 6 Za sin ɗiya luwakku baha: ‹‹Tanjinhi kəzəɗ ngaɗ tu way! Kata acin Alfa ɓəw Omega, diw ngə təkən ɓəw way ngə təkən. Hid maa yəm aa wəzlenni, təv kə vəlen yəm ngə vəl micin taa kwarah aa mə lay yəm maa njeɓnjeɓnjeɓ, sin kə sətik maymay. 7 Hid mə day gədan ngə təkəniy mə ngavngav cike, təv kə vəlen təkəniy cike, kat mə luw kə vəlen a hidiy ngaɗa. Təv kə ɗew kə Bayzlav ngetik, za sin av kə ɗew kə kərti ɗa. 8 Amma anhi hidiy maa kat tu kə zekta aliɓ kuhu mana torok njə təkən mə njə kə zlaw kuhu a gədan tə kimin: Hidiy mə hovokiy kə səb mozlokotuf ɗa, hidiy maa a mayiy kə vəliy nəv ngatan a kat kwən, hidiy mə ɗiyiy təkəniy ngə weli, hidiy mə wəzliy dəwa, hidiy mə ɗiyiy vərndew, hidiy mə ɗiyiy məwəzlwəzlək, hidiy mə tiy zəgwa, ɓəw hidiy cike mə njə kə ɗiyiy polkoy. Taniy cike av kə məciy məc mə saray tik.
Liɓde Ursalima ndawyan
9 Adəwən səna, mbaslay ngə Bayzlav yah angər ɗa. Sin acin mbaslay maa takan tə dab maa cisaray mə kawiy kaslakiy cisaray pepe avə way ngay am ngəra. Sin ma yah za, luwakku: ‹‹A yah, təv kə ɗefeh midimi, midimi səna Kər təmak acin mə dəm tik.
10 Mbiɗ ngə Bayzlav pət a kəsəm ɗa, za mbaslay ngə Bayzlav səna ɗiya tepek atalan wurum mordoy, maa fal. Sin nap ɗefek liɓde maa kweɗek, liɓde səna Ursalima, aa surohoh aa dibizlav za, Bayzlav acin mə surohoh tik. 11 Gədan mordoy ngə Bayzlav ɗiya zləzlaɗ liɓde səna. Sin aa lir wa gugwən malaw, wa gugwən ta njə kə luwta Yaspa taa lir, kiliw kiliw kiliw, wa durugwal. 12 Gəlməɗ ngə liɓde səna zoɗ za ɓiɓir ɓiɓir. Awana bərmidigiɗiy gəɓ atalan saray, za mbaslayiy gəɓ atalan saray ngə Bayzlav aa puwiy bərmidigiɗiy səna. Zlimiy ngə səbaniy Israyila gəɓ atalan saray mə ɗəɗefiy kaɗ takan takan am bərmidigiɗiy səna. 13 Liɓde səna awana bərmidigiɗiy makaɗ makaɗ gozlum foɗ tik. Aa kaɗkaɗ bərmidigiɗiy makaɗ, aa mə ngərzəm bərmidigiɗiy makaɗ, aa mə zlaɓay bərmidigiɗiy makaɗ, za aa wəzlav bərmidigiɗiy makaɗ. 14 A mbasliy gəlməɗ ngə liɓde atalan gugwəniy mogroy gəɓ atalan saray. Zlimiy ngə məzlənzləniy ngə Kər təmak gəɓ atalan saray mə ɗəɗefiy kaɗ am gugwəniy səna.
15 Mbaslay ngə Bayzlav mə zləgamak səna, mə kawa zlamblay mə ɗiyta a melenge am ngəra, kə jan kə sla liɓde, kə sla bərmidigiɗiy ngə liɓde səna ɓəw kə sla gəlməɗ tik avə zlamblay səna. 16 Liɓde səna awana gozlumiy foɗ. Gozlumiy tik cike pərakpərak. Mbaslay ngə Bayzlav ɗiya sla liɓde səna avə zlamblay tik. Sin sla sla, zoɗ tik, bezlim tik ɓəw gəl tik avə təkən ngə sla tik mə ɗiya ngərbək gəɓ a talan saray, ngərbək gəɓ a talan saray. 17 Mbaslay ngə Bayzlav sla sla gəl ngə gəlməɗ, metir ngər cisaray avə sarayª. Sin a slətik mana hidiy mə njə kə sliy təkən hoyhoy. 18 A ndəniy gəlməɗ ngə liɓde səna avə gugwəniy malaw mə njə kə luwta yaspa. A ndəniy liɓde səna avə melenge maa səkəm tik tuwah. Liɓde səna aa lir, kiliw kiliw kiliw, wa durugwal. 19 Tu wəzleliy gugwəniy ngə mbasl gəlməɗ səna avə gugwəniy parpar malawigi. Tizin tik a wəzlelta avə gugwən taa njə kə luwta yaspa, mə saray tik a gugwən taa njə luwta safira, mə makaɗ tik a gugwən taa luwta agate, mə foɗ tik a gugwən taa luwta imiradi, 20 mə joɓen tik a gugwən taa kuwta onikis, mə kwəh tik a gugwən taa luwta sardis, mə cisaray tik a gugwən taa luwta krisoliti, mə cəfacəfaɗ tik a gugwən taa luwta beril, mə ngərafkatakan tik a gugwən taa luwta topas, mə gəɓ tik a gugwən taa luwta krisoparasu, mə gəɓ a talan takan tik a gugwən taa luwta lipinlare, za mə gəɓ a talan saray tik a gugwən taa luwta ametistu. 21 Bərmidigiɗiy gəɓ a talan saray tik a ɗiyta avə yakwaɗiy gəɓ a talan saray. Ko birmidigiɗ ceki awana a yakwaɗ takan takan. Mozlokotuf tə liɓde səna a ɗiyta a melenge za aa lir, kiliw kiliw kiliw, wa durugwal.
22 Kat tə limek jik ngə Bayzlav a liɓde səna ɓahbəgwən, kadaban Bayzlav Məmar hidi ɓəw Məmar gədan cike wayza, za ɓəw Kər təmak taniy acin jik Bayzlav ngə liɓde səna. 23 Zay ngə pic avə təra ngə zləzlaɗ lay a liɓde səna ɗahkwən. Kadaban gədan mordoy ngə Bayzlay ɗaw kə zləzlaɗ lay tə kimin, za Kər təmak acin zləzlaɗ ngə liɓde səna. 24 Hidiy təm talan mahayək cike av kə ɗewiy tan am zləzlaɗ səna, za bayiy təm talan mahayək cike av kə viy avə zay ngatan a liɓde sənaª. 25 A pekiy bərmidigiɗiy ngə liɓde səna kaɗ ɗaba, av kə ɗewey tik fonngo, kadaban vuɗu a ɗiy abəgo ɗaba. 26 Hidiy av kə tepiy zay ɓəw gədan mordoy ngə hidiy təm səbaniy maa parpar təm talan mahayək cike a liɓde səna. 27 Təkən njə liya a pət a liɓde səna kwən, hidiy mə njə kə ɗiyiy mə ngavngav ɓəw mə njə kə ɗiyiy polkoy a pətiy a liɓde səna ɓahkwən. Amma say hidiy maa zlim ngatan mə ɗəɗefeh kaɗ am ɗerewel ngə hidiy mə janiy micin ndawyan acin ngə pətiy abəgo. Ɗerewel səna, Kər təmak acin məmar tik.