Mə jawiy Bay musuruf kaɗ ngə di ngərbək takan
20
Adəwən səna, kat lim mbaslay ngə Bayzlav aa surohohoh aa dibizlav za, mə kawa lekile ngə mijijik ngə wili maa kpum, selenselen, ɓəw selelen mordoy am ngəra . 2 Sin kaw təkən huvu mordoy maa cehceh məkərən. Təkən huvu səna, sin acin wən tamicek, mana kə luw kaɗ Bay ngə mbiɗ mə ngavngav asənkwən Bay musuruf. Mbaslay ngə Bayzlav jaw kaɗ avə selelen mordoy. Təkən huvu səna av kə ɗew mə jawjaw hos di ngərbək takan. 3 Sin maa jaw za, fək kaɗ am wili maa kpum selenselen, pek mijijik ngə wili səna kaɗ, ndeɗta kaɗ avə faɓru, za mgbor mgboriy mətik kaɗ. Asəna acin, təkən huvu səna kwəl kə lebeɗ hidiy ɗaba, say diy ngərbək takan tu ton. Adəwən səna, av kə fəkta kaɗ ngə vah gwedek.4 Zəni kat lim lay ɗewiy ngə bayigi. Geɗenta mozlokotuf a hidiy mə ɗew ɗewiy təm lay ɗewiy ngə bayiy səna, taniy kə zliy dalgway. Kat lim micin ngə hidiy məpərmay hidiy mə mbaniy talan tan amicek. A mbaniy talan tan lay taniy mə zləgamiy mgban mgban atalan Yesu ɓəw lay taniy mə ceɗiy zləgam ngə Bayzlav a hidigi. Ɓəw lay taniy mə ɓoniy kə mbəzl təkən huvu, ɓəw təkən hidiy mə ndənta maa cehceh sin. Asəna baha, lay taniy mə ɓoniy hidiy kə ɗəɗefenta zlim ngə təkən huvu am muzəroh ɓəw am ngriy tan. Hidiy səna Bayzlav a mbəlahta aa mə məc za, taniy av kə zəmiy bay witikwitik avə Kristu hos di ngərbək takan. 5 Taniy acin hidiy Bayzlav mə mbəlahta məpəlpəla aadab hidiy mə məc məciy za. Hidiy məpərmay wər Bayzlay a mbəlahta aa mə məc za kwən, səna di ngərbək takan tu ton. 6 Hidiy Bayzlav mə mbəlahta məpəlpəla taa mə məc za səna, mə zəzayigi, kadaban taniy hidiy ngə Bayzlav. Taniy a məciy jəɓ mə saray tik ɗaba. Taniy av kə ɗewiy ɗər kə masayiy ngə Bayzlav ɓəw ngə Kristu, za taniy av kə zəmiy bay witikwitik avə Kristu hos di ngərbək takan.
Bayzlav av kə dayen gədan a bay musuruf
7 Mana di ngərbək takan tu ton, av kə fəkiy Bay musuruf aa mə jawta tə wili maa kpəm selenselen səna kaɗ. 8 Za sin av kəv kə lebeɗ hidiy təm hayəkiy təm talan mahayək cike wayza. Hayəkiy səna a njə luwta: ‹‹Gog›› ɓəw ‹‹Magogª.›› Bay musuruf av kə ɓas hidiy təm hayəkiy səna kaɗ, taniy kə jəgəmiy avə Bayzlav. Taniy day godokwən wa vəgaɗ tə maza mordoy. 9 Taniy aa taliy mgbaw talan mahayək cike. Taniy ɗiya jupiy lay ngə hidiy ngə Bayzlav, mana kə luw kaɗ liɓde Bayzlav mə mayu. Amma kuhu surohoh aa dibizlav za, kəɗaw kəɗaw hidiy Bay musuruf mə ɓasta səna kaɗ, ɗəɗək ɗəɗək. 10 Za acin, Bay musuruf mə njə kə lebeɗta səna, Bayzlav fək aliɓ kuhu mana torok tavə təkən mə njə kə zlaw kuhu avə gədan, giɗgiɗgiɗ. Təkən huvu mə pətah taa liɓ yəm tə maza mordoy avə mokotuf mə ɗiy polkoy awaniy təm akimin. Taniy av kə siy takwan abəgo ko apu pic avə vuɗu.
Dalgway am pic way ngə təkəniy cike wayza
11 Adəwən səna, kat lim lay ɗew mordoy ngə bay, lay ɗew səna baran baran tewtew, za hid mə ɗewekaɗ akimin. Hayək avə dibizlav lekiy tan akibik tik, za hidiy a limta ɗahɗaba. 12 Za kat lim hidiy mə məc məcigi, hidiy səna hidiy mogroy ɓəw mə gəcgəcigi, taniy mə gariy kaɗ akibik lay ɗew ngə bay səna. Kat lim ɗereweliy mə zləriy kaɗ. Kat lim ɗerewel məpərmay mə zləra kaɗ, sin acin ɗerewel mə ɗəɗefiy zlim ngə hidiy mə janiy micin ndawyan akimin. Bayzlav ɗiya zla dalgway ngə hidiy mə məcməciy səna. A zlenta pərakpərak a kəzəɗiy taniy mə ɗiyta mə ɗəɗef ɗəɗəf təm ɗereweliy səna. 13 Yəm tə maza mordoy ɗiya vənah hidiy mə məcməciy tə liɓ tik kaɗ. Mən məc avə lay ɗew ngə mimcigi vəniy hidiy mə məc məciy tə ngər tan kaɗ təm. Za Bayzlav zlen dalgway a hidiy səna, ko hid ngayi, kpekpe a kəzəɗ sin mə ɗiyu. 14 Fəkiy mən məc ɓəw lay ɗew ngə mimcigi aliɓ kuhu mana torok. Kuhu mana torok səna acin, məc jəɓ mə saray tik. 15 Hid maa a ɗəɗefiy zlim ngetik aliɓ ɗerewel ngə hidiy ngə janiy micin ndawyan bəgwən, fəkta aliɓ kuhu mana torok səna.