Hidiy dolom a səbaniy Bayzlav a dibizlav
19
Adəwən səna, kat zlim wəla aa dibizlav za, wa hidiy dolom aa zləgamigi, a luwta:‹‹Nəmkwan kə səban Məmar hidi!
Sin acin Bayzlav ngiykwan mə mbəl yikwan,
sin acin məmar gədan ɓəw məmar mordoy.
2 Sin hid maa tiɗtiɗe, a njə kə zla dalgway a mozlokotuf tik.
Sin zlen dalgway a barlaw werti mə ngavngav səna.
Barlaw werti səna tu dəbəz hidiy təm talan mahayək avə kə ɗiy vərndew a tanigi.
Lay sin mə wəzl hidiy mə ɗiyiy kəzəɗ ngə Bayzlav, Bayzlav ɗiyen dalgway.››
3 Taniy ɗiya luwta baha:
‹‹Nəmkwan kə səban Məmar hidi!
Seleh ngə kuhu mə kəɗaw liɓde taa sibir, tirlin tirlin təgo,
av kə sibirey tik ko apu.››
4 Hidiy mogroy maa ngər saray avə foɗ ɓəw təkəniy foɗ ta micin gbilihiy titimbiz akibik Bayzlav mə ɗewɗew təm lay ɗew ngə bay, za taniy ɗiya mbəzliy Bayzlav, ɗiya luwta: ‹‹Amina ! Nəmkwan kə səban Məmar hidi!››
Məmbəlwa ngə dəm werti ngə Kər təmak
5 Zəni kat zlim hid aa cəwəla aa mə lay ɗew ngə Bay za, a luw:
‹‹Mə səban Bayzlav ngiykwan.
Hin hidiy cike mə ɗiyiy kəzəɗ ngetik,
hin hidiy mə deɓenta talan,
hidiy mə gəcgəcigi ɓəw mogroy!››
6 Za kat zlim hid aa cəwəla wa wəla ngə hidiy ndas a zləgamigi, wəla səna wa ləv ngə yəm tə maza mordoy asənkwən wa van taa ndəl a gədan. Sin a luw:
‹‹Nəmkwan kə səban Məmar hidi!
Kadaban tanjinhi,
Bayzlav Məmar yikwan mə mar gədan cike wayza,
aa zəm bay tik.
7 Nəmkwan kə zəzay, nəv ngiykwan mə ɗiy nek,
za nəmkwan kə vəlen mordoy a Bayzlav!
Kadaban pic ngə dəm werti ngə Kər təmak tu hos,
kərtaza sin mə welu,
mə sləsləɓah wayza.
8 Hidiy mə vəlenta ləkwət maa baran maa tewtew, maa kukwəɗ kukwəɗ taa lir wayza sin kə kwəl tik.››
Ləkwət maa baran maa tewtew, kukwəɗ kukwəɗ taa lir səna acin, kəzəɗiy maa tiɗtiɗe, hidiy ngə Bayzlav ta njə kə ɗiyta.
9 Zəni Mbaslay ngə Bayzlav zləgamakku, ɗiya luw: ‹‹A ɗəɗefu anhi: ‹Hidiy mə ɗefentəma kə yiy kə zəmiy gəda məmbəlwa ngə dəm werti ngə Kər təmak, nəv ngatan mə zəzay.› ›› Za sin ɗiya luwak baha: ‹‹Zləgamiy kat mə ceɗeh nhi mindiwin, Bayzlav atalan tik acin mə luw tik aa ma ngetik.››
10 Kat maa zlim atəgo za, kat gbili titimbiz akibik tik kə mbəzl tik. Amma sin luwakku: ‹‹Hoh gbili titimbiz kaɗ kə mbəzlak kwən! Geleɓ a mbəzl Bayzlav ɗər. Kat wər, kat hid mə ɗiyen kəzəɗ a Bayzlav wa hoh, ɓəw wa galmocohiy hin taa səb a ceɗ zləgam maa mindiwin Yesu mə pətah kaɗ maa mgban mgban.
Zləgam səna acin, ɓən atalan Yesu mə vəlen gədan a mokotufiy ngə Bayzlav kə ceɗiy zləgam ngetik a hidiy amicek.
Hid tə dəwən pilis maa baran
11 Adəwən səna, kat lim dibizlav zlər, za pilis maa baran awan abəgo. Hid tə dəwən tik a njə kə luwta hid maa tiɗtiɗe, ɓəw hid mə njə kə luw ma maa mindiwin. Sin ɗaw kə zla dalgway ɓəw ɗaw kə jəgəm avə calmosumiy tik avə mozlokotuf tik. 12 Həriy tik aa zlaw wa gana kuhu, sin təp təp falfaliy ngə bay ndas atalan tik. Zlim mə ɗəɗefeh kaɗ a kəsəm tik, hid mə sən zlim səna ɗahkwan, səna sin acin mə sən tik agendik dap. 13 Sin aa ləkwət maa cip njə ɓiɓiz tə kimin kwəl a kəsəm. Zlim ngetik: ‹‹Zləgam ngə Bayzlav.›› 14 Hidiy dolom tə dibizlav mə njə kə ɗiyiy vurum awaniy adəwən pilisiy maa baran aa səbta. Hidiy səna a kwəliy ləkwətiy maa baran maa tewtew, kukwəɗ kukwəɗ taa lir. 15 Masalam mə zəmzəm pətah aa kəm ngə hid səna za. Avə masalam səna, sin av kə bəl hidiy təm talan mahayək. Sin av kə zəm bay atalan tan avə gədan mordoy. Av kə brozlta a ngaz mana taa brozliy mə mbuw mbuw ngə pay a wili mə ləla. Sin av kə zlənenta takwan atəgo, kə jan taniy kə sənta nəv ngə Bayzlav Məmar gədan tu bas avə tanigi. 16 Zlim mə ɗəɗefeh kaɗ am ləkwət tik maa cip gəga am pawal tik anhi: ‹‹Bay ngə bayiy cike ɓəw mordoy ngə hidiy Məmariy hidigi.››
17 Zəni kat lim mbaslay ngə Bayzlav mə gara kaɗ aliɓ pic. Sin aa cəwəla dayday kə ɗefenma a salakiy mə njə kə mbiriy fal a wəzlav, sin a luwenta: ‹‹Mə yah ɓas kə bəl zəm maa day Bayzlav mə sləsləɓu nhi. 18 Hin məv kə bəl vəren kəsəm ngə bayigi, ngə mogroy ngə sojigi ɓəw ngə sojigi. Hin məv kə bəl vəren pilisigi ɓəw ngə hidiy mə kwariy pilisiy səna. Hin məv kə bəl vəren kəsəm ngə hidiy cike wayza, ngə hidiy mə mariy talan tan ɓəw ngə bahlamigi. Ngə hidiy mə gəcgəcigi ɓəw ngə hidiy mogroy.››
19 Adəwən səna, kat lim təkən huvu mə pətah taa liɓ yəm tə maza mordoy za səna. Bayiy təm talan mahayək avə hidiy ngatan ngə ɗiy vurum, ɓasiy kaɗ kə jəgəmiy avə hid tə dəwən pilis maa baran səna, ɓəw avə hidiy ngetik ngə ɗiy vurum təm. 20 Kawiy təkən huvu səna ɓəw mokotuf mə ɗiy polkoy. Mokotuf mə ɗiy polkoy səna a ɗiy təkəniy parpar ngə kpah talan zaba akibik ngə təkən huvu, lebeɗ hidiy ngəmiy kə ɗəɗefiy zlim ngə təkən huvu a kəsəm tan, ɓəw mbəzliy təkən hidiy mə ndənta maa cehceh təkən huvu səna. Fəkiy təkən huvu avə mokotuf mə ɗiy polkoy səna aliɓ kuhu mordoy mana torok njə təkən mə njə kə yək kuhu a gədan. A fəkta taniy awaniy avə micin. 21 Hid tə dəwən pilis ɗiya bərazl sojiy mə fəsfəs ngə təkən huvu ɓəw ngə mokotuf səna avə masalam mə pətah taa kəm ngetik za. Zəni salakiy yiy ɓasiy kaɗ, bəlbəliy vəren kəsəm ngə hidiy səna.