Liɓde Babila mordoy tu gom
18
Adəwən səna, kat lim mbaslay ngə Bayzlav məpərmay aa surohohoh aa dibizlav za. Sin awana gədan dayday. Gədan mordoy ngetik səna zləzlaɗ talan mahayək cike wayza, kəkay kəkay. 2 Sin ɗiya cəwəla dayday, ɗiya luw: ‹‹Babila liɓde mordoy tu gom!
Mə gomoh za mindiwin!
Tanjinhi, sin mə mbaɗa kə lay ɗew ngə musurufigi.
Lay ɓah ngə mbiɗiy mə ngavngaviy parpar.
Lay ɓah ngə salakiy ngə hezi ɓəw salakiy maa hidiy a mayta kwən.
3 Sin a gom səna lay sin mə jəgwanen a hidiy cike kə hayiy avə ɗiy vərndew wa ta njə kə hayiy a movu.
Bayiy təm talan mahayək cike tu ɗiyiy vərndew avə sin.
Hidiy mə ɗiyiy terere təm talan mahayək cike tu mbaɗiy kə hidiy mə njənjigi avə aray maa dayday ngə liɓde səna.››
4 Zəni kat zlim hid aa cəwəla baha aa dibizlav za, aa luw: ‹‹
Hin hidiy ɗa, mə pətah kin aaliɓde səna za!
Kə jan taa hin kə ɗiy mə ngavngav witikwitik a tanigi!
Mə pətah kin, kadaban mə ngavngav sin mə ɗiy tu day,
ləbar tik hos a dibizlav,
Mə zlənen takwan aliɓde səna, pərakpərak a sin mə zlənen a hidiy məpərmay.
Hin kə zlənen takwan,
tuwa tik kə ɗiy day a sin mə zlənen a hidiy məpərmay jəɓ saray.
Am kaslak sin mə vəlehin movu maa lem,
hin kə zeken maa lem day ngetik jəɓ saray akimin.
7 Makavay liɓde səna tu may mordoy ɓəw aray godokwən,
mə zlənen takwan dayday kə jan sin kə han lawlaw təm.
Sin ɗaw kə ɓən a mə nəv za anhi:
‹Kat mə ɗewe kaɗ am lay ɗew ngə bay.
Kat werti mimci kwən.
Kat tə han han mimci kwən.›
8 Kadaban səna acin,
takwaniy mogroy parpar av kə yiy atalan tik am pic takan.
Hidiy av kə məcigi, av kə hanigi ɓəw av kə zlimiy mitis.
Za kuhu av kə kəɗaw liɓde səna kaɗ,
kadaban Bayzlav Məmar hidi mə zla dalgway ngetik səna,
sin awana gədan mordoy.
9 Bayiy təm talan mahayək mə ɗiyiy vərndew avə liɓde səna, mbaɗiy kə mə njənjigi lay taniy mə janiy aray dolom təbəgo. Mandal taniy tu kə limiy seleh aa sibir aliɓde səna, tirlin tirlin, av kə hanigi ɓəw av kə jəkiy drif ngə mimci atalan tik. 10 Taniy av kə gariy tan gaf aaliɓde səna. Av kə hovokiy aa takwan tə kimin, kə luwta:
‹‹Aw gawligi! Aw gawligi!
Takwan ɗaha a hoh Babila,
liɓde mordoy, njə gədan!
Bayzlav a zla dalgway koh am masa takan dap!››
11 Hidiy təm talan mahayək mə ɗiyiy terere av kə hanigi ɓəw av kə jəkiy drif mimci atalan tik, kadaban hidiy ngə səkəmiy təkəniy tan ɗahɗaba. 12 Təkəniy səna acin, melenge, vezek ngə tə suloy, gugwəniy malaw, yakwaɗ, ləkwətiy malaw maa kukwəɗ, ləkwətiy malaw maa pəren, gbiz, ləkwətiy mə bəta avə susoniy ngə təkən huvu, payiy parpar maa jan tik tuwa, təkəniy parpar mə ɗiy ɗiy avə ndin ngə biginigi, avə payiy njə gədan, avə masa maa wizek, avə masa memblen, ɓəw avə gugwəniy malaw ngə ɗiy wəzlel. 13 Asəna baha, pusloɗ payiy parpar mə njə kə njif nek mana dorsonª, mbusu ngə pəz maa səkəm tik tuwa zlim tik mir, dorson, tubu ta njə kə kəɗawta kə njif wa dorson, movu, ɗawa, mosuf mə dəpəɗdəpəɗ, ngirmi, zligi, təmakigi, pilisigi, saretigi, bahlamigi, ɓəw hidiy taniy taa njə kə berta kaɗ. 14 Hidiy mə ɗiyiy terere luwenta aliɓde səna:
‹‹Təkəniy cike hoh taa may tik dayday,
tu lekiy tan ɗəɗək angər koh za.
Aray avə təkəniy koh malaw,
lekiy tan ɗəɗək angər koh za.
Təkəniy səna cike, hoh janta ɗaba.
15 Hidiy mə ɗiyiy terere mə mbaɗiy kə hidiy mə njənjigi avə ɗiy terere aliɓde səna, av kə garitan gaf aliɓde səna, lay taniy taa hovokiy a takwan tə talan liɓde səna. Taniy av kə hanigi za av kə jəkiy drif mimci. 16 Taniy av kə luwta:
‹‹Aw gawligi! Aw gawligi!
Takwan tu yah atalan liɓde mordoy nhi.
Amicek, sin wa bay werti mə kwəl ləkwət maa kukwəɗ, za maa pəren, gbiz.
arayiy tə kimin tu lekiy ɗəɗək!››
Hidiy mogroy cike mə kwariy payiy mogroy ngə zlan maza, hidiy mə njə kə ɗiy mbuluk aa talan yəm, hidiy mə ɗiyiy kəzəɗ tə liɓ payiy mogroy ngə zlan maza, ɓəw hidiy mə njə kə janiy təkən ngə zəm avə ɗiy kəzəɗ tə liɓ yəm, av kə gariy tan gaf aliɓde səna. 18 Mandal taniy tu kə limiy seleh kuhu mə kəɗaw liɓde səna aa sibir, tirlin tirlin, taniy av kə hanigi, av kə luwta: ‹‹Liɓde ngə sla avə liɓde mordoy nhi ɗahkwən!›› 19 Taniy aa hanigi, aa bəkiy hayək atalan tanª, aa jəkiy drif mimci, aa luwta:
‹‹Aw gawligi! Aw gawligi! Takwan tu yah aliɓde mordoy nhi!
Amicek, liɓde mordoy səna awana arayiy parpar,
hidiy mə kwariy payiy mogroy ngə zlan maza a janiy aray mbelmbel liɓde səna.
Amma am masa takan dap, təkəniy cike təbəgo tu lekiy ɗəɗək!››
20 Kat zlim wəla aa dibizlav za baha, aa luw:
‹‹Hin hidiy tə dibizlav, mə zəzay acin muk,
kadaban liɓde mordoy tu gom ɗəɗək!
Hidiy ngə Bayzlav, məzlənzləniy ngə Yesu ɓəw mokotufiy ngə Bayzlav,
mə zəzay təm muk,
kadaban Bayzlav a zlen dalgway avə liɓde nhi lay sin mə ɗiyehin mə ngavngav!››
21 Zəni mbaslay ngə Bayzlav njə gədan wət gugwən wa gunuhəz. Sin fək gugwən səna aliɓ yəm tə maza mordoy, za ɗiya luw:
‹‹Bayzlav av kə gom Babila liɓde mordoy nhi asəna.
Hidiy a ciy tundon abəgo ɗaba.
Hidiy a mbiziy wərzlek avə falam abəgo ɗaba.
Aliɓde səna,
hidiy mə ɗiyiy kəzəɗiy parpar asənkwən mə ɗiyiy mazla, a ɗewiy abəgo ɗaba.
Hidiy a zlimiy ləv ngə gunuhəz a liɓde səna ɗaba.
23 Pətərliy a zləzlaɗiy lay a liɓde səna ɗaba.
A jəkiy drif ngə dəm werti a liɓde səna ɗaba.
Təkəniy cike av kə toniy atalan liɓde səna atəgo, kadaban aməcek hidiy mə ɗiyiy terere tə liɓde səna acin məmariy aray day hidiy təm talan mahayək cike wayza.
Za hidiy mə njə kə ɗiyiy məwəzlwəzlək tə liɓde səna tu jəkiy hidiy təm talan mahayək cike wayza.
24 Hidiy tə liɓde səna tu wəzliy mokotufiy ngə Bayzav,
za taniy tu wəzliy hidiy mə səbiy mozlokotuf ngə Bayzlav,
ɓəw taniy tu wəzliy hidiy parpar kaɗ am talan mahayək təm.