Dalgway atalan barlaw werti
17
Zəni mbaslay ngə Bayzlav takan tədab maa cisaray mə kawiy kaslakiy cisaray takan takan am ngəra, yah angər ɗa. Sin luwakku: ‹‹A yah, təv kə ɗefeh mana aceki Bayzlav tu kə zla dalgway ngə barlaw werti mə ngavngav, sin acin liɓde mordoy tə gozlum maziy mogroy. 2 Bayiy təm talan mahayək tu ɗiyiy vərndew avə werti səna, za hidiy təm talan mahayək tu hayiy avə ɗiy vərndew avə sin, wa taa hayiy a movu.››3 Za acin Mbiɗ ngə Bayzlav pət a kəsəm ɗa, za mbaslay ngə Bayzlay tepek adab donu. Abəgo, kat lim werti səna mə ɗewekaɗ adəwən təkən huvu maa pəren. Təkən huvu səna awana talaniy cisaray ɓəw falamiy gəɓ. Za mə ɗəɗefiy zlimiy ngə ra Bayzlay a kəsəm ngə təkən huvu səna. 4 Werti səna mə kwəla ləkwət maa wizek ngə hidiy mə njənja, za sin a wəzlel kəsəm tik avə təkəniy mə ɓəslta avə melenge ɓəw avə təkəniy maa səkəm tik tuwah. Sin mə kawa kaslak mə ɗiyta a melenge am ngəra, kaslak səna pe avə təkəniy weli ɓəw təkəniy mə ngavngaviy sin taa njə kə ɗiy tik avə vərndew ngetik. 5 Ɗəɗefiy zlim mətak sən am muzəroh ngə wer səna, a ɗəɗefta anhi: ‹‹Babila liɓde mordoy sin acin mahmay ngə barlaw wertigi ɓəw təkəniy weli təm talan mahayək.››
6 Za kat lim wer səna mə haya wayza a ɓiɓiz ngə hidiy ngə Bayzlav. A wəzliy hidiy səna, lay taniy məsəberiy ngə Yesu. Kat maa lim za, təkən səna tu kpahak talan dayday. 7 Za acin mbaslay ngə Bayzlav səna ɗiya luwakku: ‹‹Təkən səna a kpahoh talan dayday kemi? A zlimu, kat təv kə pəsloh madaba ma mə ɓahɓah ngə wer səna, ɓəw ngə təkən huvu wer mə ɗew tə dəwən tik njə talaniy cisaray ɓəw falamiy gəɓ səna. 8 Təkən huvu hoh mə lim səna, sin a ɗew zaba aməcek a micin, amma tanjinhi sin ɗaha avə micin ɗaba. Sin mbeh kə pətaha aa mə wili maa kpəm, selenselen, am lay sin mə ɗew maa tanjinhi za, amma adəwən səna, Bayzlav av kə lek kaɗ. Za hidiy maa dəga Bayzlav mə ndən talan mahayək a ɗəɗefiy zlim ngatan am ɗerewel ngə zlimiy ngə hidiy mə janiy micin mətak way bəgwən, mana tu limiy təkən huvu səna, av kə kpah talan tan. Av kə kpah talan tan kadaban aməcek sin awana micin, amma tanjinhi sin ɗaha a micin ɗaba, za sin av kə pətah baha.
9 Mbaslay səna ɗiya luwak baha: ‹‹Say hid kə mar bərngəzl ngə sən təkən kat tu kə ceɗ nhi. Talaniy cisaray ngə təkən huvu səna acin wurumiy cisaray barlaw werti mə ɗew tə kimin. Taniy acin bayiy cisaray təm. 10 Adab tan, joɓən tu micigi, mə kwəh tik wəlen aa zəm bay. Mə cisaray tik a yah gesin bəgwən, amma mandal sin tu yah, av kə zəm bay ngə wan gwedek dap. 11 Təkən huvu mə ɗew taməcek a micin, za tanjinhi ɗaha a micin ɗaba səna, awan adab bayiy cisaray. Za sin av kə zəm bay mə cəfacəfaɗ tik. Amma adəwən səna, Bayzlav av kə lek kaɗ.
12 Falamiy gəɓ hoh mə limta səna, taniy acin bayiy gəɓ maa a diw kə zəmiy bay gesin bəgwən. Amma av kə geɗenta mozlokotuf taniy kə zəmiy bay avə təkən huvu səna. Zəm bay ngatan av kə vah ngə masa takan dap. 13 Bayiy gəɓ tik av kə mariy ɓən takan. Ɓən ngatan səna, ngə ɗiyen kəzəɗ a təkən huvu avə gədan ngatan cike, za ɓəw kə zlimiy ma ngetik. 14 Av kə jəgəmiy avə Kər təmak, amma Kər təmak av kə dayenta gədan, kadaban sin acin mordoy ngə məmariy hidigi, za sin acin Bay məmar bayiy cike wayza. Hidiy sin mə ɗefentəma, ɓəw sin mə welta kə ɗewiy kə hidiy ngetik, mə vəliy nəv ngatan a sin, taniy avə Kər təmak səna, av kə dayenta gədan a təkən huvu ɓəw a bayiy maa gəɓ səna.
15 Adəwən səna, mbaslay ngə Bayzlav ɗiya luw baha: ‹‹Gozlum maza mordoy hoh mə lim barlaw werti mə gar tə kimin səna acin hidigi, zəgudiy təm hayəkiy parpar, mə njə kə zləgamiy miy parpar. 16 Falamiy gəɓ hoh mə limu ɓəw təkən huvu səna av kə zeliy barlaw werti. Av kə ngokkiy təkəniy sin mə mar cike wayza, za kə geɗta kəsəm asəna. Av kə hamiy werti səna, za kə fəkiy mə fəs vəren kəsəm tik aliɓ kuhu. 17 Av kə ɗiyta atəgo, kadaban Bayzlav acin mə vəlen ɓən a bayiy səna kə ɗiyiy təkən sin mə mayu. Bayiy maa gəɓ səna av kə mariy ɓən takan ngə ɗiyenta kəzək a təkən huvu, kə jan sin kə zəm bay atalan təkəniy cike. Sin av kə zəm bay hos am mandal təkəniy Bayzlav mə luw tu kə ɗiyiy tiɗtiɗe mana may ngetik.
18 Za acin werti hoh mə lim səna, sin acin liɓde mordoy mə zəm bay atalan bayiy təm talan mahayək cike wayza.