Takwaniy cisaray tu kə toniy am way ngə talan mahayək
16
Zəni kat zlim hid a cəwəla dayday aa mə jik Bayzlav za, wəla səna a luwen a mbaslayiy cisaray ngə Bayzlav, ɗiya luw: ‹‹Mə va zek bas nəv ngə Bayzlav maa pepe kaslakiy cisaray təgo am talan mahayək.››2 Za acin mbaslay mə tizin tik va zek təkən təm kaslak tik a kayək. Mbəlah mə ngavngav mə njə kə ham dayday ɗiya kaw hidiy mə ɗəɗefiy zlim ngə təkən huvu a kəsəm tan, taa mbəzliy təkən hidiy mə ndənta maa cehceh təkən huvu səna.
3 Mbaslay mə saray tik va zek təkən təm kaslak tik am yəm tə maza mordoy. Za yəm mbaɗ wa ɗom, za təkəniy cike tavə micin tə liɓ yəm tə maza mordoy səna micigi.
4 Mbaslay mə makaɗ tik zek təkən təm kaslak tik am gaw yəmigi, ɓəw am lay yəm taa kwar njeɓnjeɓnjeɓ. Za acin, yəmiy təbəgo cike mbaɗiy kə ɓiɓiz. 5 Kat zlim mbaslay ngə Bayzlav məmar gədan atalan yəm aa luwen a Bayzlav, ɗiya luw:
‹‹Hoh kweɗek kweɗek, hoh ɗaha apicah, za dəga hoh ndən talan mahayək gesin bəgwən, hoh ɗaha.
Hoh tu zla dalgway ngə gberzlem hidiy səna tiɗtiɗe.
6 Lay taniy mə zekiy ɓiɓiz ngə hidiy koh, ɓəw ngə mokotufiy koh kaɗ,
hoh vəlenta ɓiɓiz taniy kə səta.
Hoh vəlenta gədmazlən ngatan kpekpe.
7 Zəni kat zlim wəla aabər lay taa njə kə vəlenta təkən a Bayzlav, a luw:
‹Mindiwin, Bayzlav Məmar hidi, Məmar gədan cike wayza,
hoh hid maa tiɗtiɗe, hoyhoy hoh njə kə zla dalgway ngə hidiy a mozlokotuf tik.› ››
8 Mbaslay mə foɗ tik zeken təkən təm kaslak tik a pic, njoɗ Bayzlav vəlen gədan a pic, pic diw kə rəngəzl dayday atalan hidigi, kwak, wa kuhu. 9 Kuhu səna ɗiyen jiriɓ a hidiy dayday, taniy diw kə riy Bayzlav Məmar gədan atalan takwan mordoy sin mə ɗiyenta səna. Amma taniy a buwiy ngar ngatan bəgwən, za aa mayiy kə vəlenta mordoy a Bayzlav kwən.
10 Mbaslay mə joɓən tik zek təkən təm kaslak tik am lay ɗew ngə təkən huvu mə pətah taa mə yəm za. Za acin, lay sin taa zəm bay akimin ɗiya kpizlik. Hidiy təbəgo ɗiya kəkərawiy ndin tan, makavay taniy taa siy takwan dayday. 11 Taniy ɗiya riy Bayzlav tə dibizlav, makavay mbəlah tə kəsəm tan ɓəw takwaniy taniy taa səta. Amma taniy a buwiy ngar ngatan, za kə geɗiy ɗiy mə ngavngav kaɗ bəgwən.
12 Mbaslay mə kwəh tik zek təkən təm kaslak tik am gaw yəm, zlim tik Efratis. Za yəm səna ɗiya mgbak kə jan bayiy taa kaɗkaɗ kə toniy aa mə gaw yəm səna.
13 Zəni kat lim mbiɗiy mə ngavngav makaɗ pətigi, taniy wa gombokigi. Takan a pətah a kəm ngə təkən huvu maa cehceh məkərən, takan a pətah aa kəm ngə təkən huvu mə pətah taa mə yəm, za takan a pətah aa kəm ngə mokotuf mə ɗiy polkoy. 14 Mbiɗiy mə ngavngav səna, Bay musuruf acin mə zlənahta. Taniy ɗaw kə ɗiyiy təkəniy mə kpah talan. Taniy ɗaw kə viy kə ɓasiy bayiy təm talan mahayək cike, kə ɗiyiy jəgəm avə Bayzlav Məmar gədan cike am pic sin tu kə zla dalgway mordoy.
15 Yesu Məmar hidi a luw: ‹‹Mə zlimu, kat təv kə vay mə ndumndum mana məhəl. Hid mə ɗew a variya, ɓəw mə sləsləɓ ləkwətiy tik kaɗ, kə jan taa sin kə tal kəsəm maymay za weli kə ɗiyenni, nəv ngetik mə zəzay.››
16 Mbiɗiy mə ngavngaviy səna viy ɓas ɓasiy bayigi am lay ta njə kə luwta a ma Ibraninko ‹‹Harmagedon.››
17 Am way tik, mbaslay mə cisaray tik zek təkən təm kaslak tik kəv wəzlav. Kat zlim hid a cəwəla dayday aa jik Bayzlav za, wəla səna a pətah aa mə lay ɗew ngə Bayzlav za, a luw: ‹‹Tanjinhi wər tu way!›› 18 Zəni, van diw kə wiciɗ, ɗiya ləv, ɗiya ndəl, za hayək ɗiya kəz, gingiɗ gingiɗ. Dəga Bayzlav mə ndən hidiy təm talan mahayək, hayək a kəz atəgo ɓahbəgwən. 19 Hayək maa kəz za, liɓde mordoy ɗiya wəzak madaba makaɗ. Liɓdiy təm hayəkiy parpar gomigi. Bayzlav slek talan am Babila liɓde mordoy. Bayzlav av kə zek bas nəv ngətik pe kaslak, wa kaslak maa pe a movu, za sin kə vəlenni, kə sətik. 20 Mandal hayək maa kəz za, layiy maa mgbaw tav yəm lekiy tan cike, za wurumiy təm lekiy tan. 21 Məngwərzlezlezliy mogroy yoɓiy aa dibizlav za atalan hidigi. Hidiy ɗiya riy Bayzlav makavay takwan mordoy ngə van taa məngwərzlezlezl səna, kadaban takwan səna day kə luw.