Zləgam atalan mbaslayiy ngə Bayzlav cisaray ɓəw atalan takwaniy cisaray
15
Adəwən səna, kat cəhəriya, kat lim təkən mə kpah talan məpərmay a dibizlav. Təkən səna mordoy, day kə luw. Təkən səna acin, mbaslayiy ngə Bayzlav cisaray mə kawiy takwaniy takan takan cisaray am ngriy tan. Nhi acin way ngə takwanigi. Bas nəv ngə Bayzlav av kə way avə takwaniy səna.2 Kat lim təkən məpərmay baha, wa maza mordoy aa lir kiliw, kiliw, kiliw mana durugwal, za a zlaw wa gana kuhu. Kat lim hidiy mə dayiy gədan ngə təkən huvu mə pətah taa mə yəm, mə ɓoniy kə mbəzl təkən mə ndənta cehceh sin ɓəw mə ɓoniy hidiy kə ɗəɗefenta zlim ngə təkən huvu a kəsəm. Taniy mə gariy kaɗ abər təkən mana yəm tə maza mordoy səna. Bayzlav vəlenta tundoniy am ngəra. 3 Taniy aa jəkiy drif Musa hid mə ɗiy kəzəɗ ngə Bayzlav mə jək tamicek, ɓəw drif ngə Kər təmak. Aa luwta:
Bayzlav njə gədan cike Məmar hidi,
hoh njə kə ɗiy kəzəɗiy mogroy ɓəw malaw.
Hoh acin bay ngə zəgudigi, təkəniy hoh ta njə kə ɓən kə ɗiyta,
təkəniy maa tiɗtiɗe, za maa mindiwin.
4 Hid ngayi maa a hovok a hoh ɗahkwən, Bayzlav Məmar hidi?
Hid ngayi ngə ɓon kə vəloh mordoy?
Hoh a gəngoh palpal acin maa kweɗek,
hidiy təm talan mahayək cike av kə yiy kə gbəlihiy titimbiz akibik koh,
kadaban taniy av kə limiy kəzəɗiy koh maa tiɗtiɗe.
5 Adəwən səna, kat lim jik Bayzlav tə dibizlav mə zləra kaɗ, mazlaɓ ngə jawbərngəzl Bayzlav mə ɗiy avə hidiy ngetik awan abəgo. 6 Za mbaslayiy cisaray mə kawiy takwaniy takan takan cisaray am ngəra aa pətiy aa mə jik Bayzlav səna za. Taniy a kwəliy ləkwətiy maa baran, tewtew, za maslapiy mə ɗiyta avə melenge mə jawiy kaɗ am gan tan. 7 Təkən takan adab təkəniy foɗ ta micin vəlen kaslakiy cisaray mə ɗiyta a melenge a mbaslayiy ngə Bayzlav maa cisaray tafnan. Kaslakiy səna tu pe avə bas nəv ngə Bayzlav Məmar micin ko apu. 8 Za acin, gədan ngə Bayzlav ɓəw mordoy ngetik wek jik tik avə seleh, hid kwəl kə pət a jik səna kwən. Nha takwaniy cisaray maa mbaslayiy cisaray mə dahta səna tu tonigi.