Hidiy ngə Bayzlav mə jəkiy drif ndawyan
14
Adəwən səna, kat cəhəriya baha, kat lim Kər təmak mə gara kaɗ atalan wurum zlim tik Siyona. Hidiy ngərbək blək a ngərfoɗ a foɗ awaniy avə sin. Zlim ngə Kər təmak ɓəw ngə bahbay tik mə ɗəɗefe kaɗ am muzərohiy ngə hidiy səna. 2 Kat zlim hid a cəwəla aa dibizlav za. Cəwəla səna wa ləv ngə yəm ta jur a maza mordoy asənkwən wa van taa ndəl a gədan. Wəla ngə hid kat mə zlim səna, ndurum tik wa ta ciy tundon. 3 Hidiy maa ngərbək blək a ngərfoɗ a foɗ səna mə gariy kaɗ akibik lay ɗew ngə bay, akibik təkəniy foɗ ta micin ɓəw akibik hidiy mogroy, aa jəkiy drif ndawyan. Hid kwəl kə sən drif səna kwən, say hidiy maa ngərbək blək a ngərfoɗ a foɗ səna. Hidiy səna Bayzlav a zlambaɗta aadab hidiy təm talan mahayək za. 4 Hidiy səna a dəbəziy talan tan avə wertiy ɓahbəgwən, a mgbəwiy a taniy bəgwən. Taniy wər, ko Kər təmak a va aki, taniy aa səbta, zurroh. Bayzlav a zlambaɗta aa dab hidiy məpərmay za. Asəna acin, mbaɗiy wa təkən ngə tizin ngə vəlen a Bayzlav ɓəw a Kər təmak. 5 Polkoy a pətah aa kəm tan za ɓahbəgwən, ɗew ngatan kweɗek kweɗek.Mbaslayiy makaɗ ngə Bayzlav a ceɗiy dalgway ngetik
6 Zəni kat lim mbaslay ngə Bayzlav məpərmay aa mbir a dibizlav maa fal. Sin awana Ləbar Malaw maa a way ɗahkwən ngə ceɗen a hidiy təm talan mahayək, təm hayəkiy parpar, təm səbaniy parpar, mə njə kə zləgamiy ma maa parpar ɓəw a zəgudiy parpar. 7 Mbaslay səna nap cəwəla dayday, ɗiya luw: ‹‹Mə daɓen talan a Bayzlav za mə səbanu! Kadaban mandal sin tu kə zla dalgway ngə talan mahayək mə hosoh za. Mə mbəzl hid mə ndən dibizlav ɓəw talan mahayək, mə ndən maza mordoy ɓəw lay mə njə kə kwariy yəm, njeɓnjeɓnjeɓ.››
8 Mbaslay ngə Bayzlav mə saray tik ɗiya səbah ngə tizin. Sin luw: ‹‹Babila liɓde mordoy tu gom! Mə gomoh za mindiwin! Liɓde səna tu jəgwanen a hidiy kə ɗiyiy vərndew mana sin, wa hid taa njə kə hay a movuª. Təkən sin mə ɗiy səna, tu bas nəv ngə Bayzlav.
9 Mbaslay ngə Bayzlav mə makaɗ tik ɗiya səbah mə tizin avə məsaray tik. Sin nap cəwəla dayday, ɗiya luw: ‹‹Mana hid tu mbəzl təkən huvu mə pətah taa mə yəm za, ɓəw təkən hidiy mə ndənta maa cehceh avə sin, za hid tu ngəm kə ɗəɗefenta zlim ngə təkən huvu səna am muzəroh ɓəw am ngəra , 10 Bayzlav av kə zlənenta takwan dayday lay nəv ngetik mə bas atalan tan. Av kə vəlenta takwaniy səna pe kaslak wa kaslak maa pe a movu maa lem. Hidiy səna, avə siy movu səna, mana kə luw kaɗ av kə siy takwan dayday aliɓ kuhu, ɓəw aliɓ təkən mə njə kə yək kuhu a gədan, akibik mbaslayiy ngə Bayzlav ɓəw akibik Kər təmak. 11 Seleh ngə kuhu taniy taa zləniy takwan aliɓ tik səna, av kə sibir hoyhoy. Hidiy mə mbəzliy təkən huvu ɓəw təkən mə ndənta maa cehceh sin səna, hidiy mə ngəmiy hidiy kə ɗəɗefenta zlim ngə təkən huvu a kəsəm, a janiy nəp kwən, av kə siy takwan hoyhoy pic avə vuɗu.››
12 Asəna acin, hin hidiy mə səbiy Bayzlay, mə zlimiy ma ngetik ɓəw mə vəliy nəv ngatan a Yesu, say hin kə məsəf lawlaw am mandal səna.
13 Zəni kat zlim wəla ngə hid aa dibizlav za, a luwakku: ‹‹A ɗəɗef təkən kat tu kə ceɗeh nhi kaɗ: ‹Hidiy mə vəliy nəv ngatan a Bayzlav, za mə məciy am səb mozlokotuf ngetik, nəv ngatan mə zəzay dəga tanjinhi.› Mbiɗ ngə Bayzlav ɗiya luw: ‹Mindiwin, taniy av kə nəpitan am kəzəɗiy taniy mə ɗiyta, za gədmazlən ngə kəzəɗiy tan av kə səbta.› ››
Bayzlav av kə zla dalgway ngə hidiy təm talan mahayək
14 Kat cəhəriya, kat lim gazlavay maa baran, za təkən wa hidmemblen mə ɗewe kaɗ am gazlavay səna. Sin mə təpah falfala ngə bay mə ɗiyɗiy taa melenge a talan, za sin mə kawa hiji maa yəɗyəɗ am ngəra. 15 Za mbaslay məpərmay ngə Bayzlav pətah aa jik Bayzlav za, sin ɗiya luwen a gədan a təkən mə ɗewɗew təm gazlavay səna, sin a luwenni: ‹‹Tanjinhi ngirmi maa cehceh a ngirmi hiziɗ tu na! Pic ngə ɓasah təkən kə yah ade tu sla, a ɓiy hiji koh, a bəlahta kaɗ.›› 16 Za acin, təkən mə ɗewɗew təm gazlavay səna ɓiy hiji ngetik, za ɗiya bəl ngirmi maa cehceh a ngirmi hiziɗ təm talan mahayək way kaɗ.
17 Adəwən səna, Mbaslay məpərmay ngə Bayzlav pətah aa jik Bayzlav tə dibizlav za. Sin təm mə kawa hiji maa yəɗyəɗ am ngəra. 18 Zəni Mbaslay məpərmay ngə Bayzlav pətah aa mə lay ta njə kə vəlenta təkən a Bayzlav za. Sin awana gədan atalan kuhu. Sin luw a gədan a Mbaslay mə kaw hiji maa yəɗyəɗ am ngəra səna, a luwenni: ‹‹Mə mbuw mbuw ngə inaboje tu na, a ɓiy hiji koh maa yəɗyəɗ, maa cel jəngəriy tik təm tuz tə talan mahayək way kaɗ, za hoh kə ket mə mbuw mbuw tik.›› 19 Mbaslay səna a hiji tik ɓiy, vaa celcel jəngəriy ngə inaboje təm tuz təm talan mahayək way kaɗ, za kət kət mə mbuw mbuw tik. Za sin va zekzek a wili mordoy mə ləta kə brozl tik. Təkəniy səna cike aa ɗef mana aceki Bayzlav tu bas nəv dayday atalan gberzlem hidiy təm talan mahayək. 20 Hidiy brozliy mə mbuw mbuw ngə pay am wili mə ləla maa gaf aliɓde. Mandal aa brozlta, ɓiɓiz acin mə kwara aa wili səna za. Ɓiɓiz səna ɗiya kwar wa yəm tə maza. Ɓiɓiz səna kwar kwar, hos kilometir blək makaɗ. Mana pilis tu pət aliɓ tik, kpəm tik av kə hos am ma tik.