Təkəniy huviy saray
13
Adəwən səna, kat lim təkən huvu a pətah aaliɓ yəm tə maza mordoy za. Sin awana talaniy cisaray ɓəw falamiy gəɓ. Sin mə təpah falfaliy ngə bay am falamiy tik cike wayza, za zlim dərən ngə ra Bayzlav mə ɗəɗefeh kaɗ am talaniy tik cike wayza. 2 Təkən huvu kat mə lim səna, wa dərlen. Ngaziy tik wa ngə kwaykwaya, za ma ngetik wa ngə mobor. Təkən huvu ma cehceh məkərən vəlen gədan ngetik, lay ɗew ngetik ngə bay ɓəw mordoy ngetik a təkən huvu səna. 3 Mə bəliy təkən huvu səna za aməcek am talan takan kə wəzlta kaɗ, amma tanjinhi mbəlah tik tu ɗiz. Hidiy təm talan mahayək cike wayza tu mayiy təkən huvu səna, taniy cike ɗiya səbta acin. 4 Taniy aa mbəzliy təkən huvu maa cehceh məkərən səna, lay sin mə vəlen gədan mordoy a təkən huvu səna. Aa mbəzliy təkən huvu səna təm, a luwta: ‹‹Ngə sla a təkən huvu nhi yi? Ngə jəgəm avə sin yi?››5 Geɗenta mozlokotuf a təkən huvu səna, sin kə zləgam ma ngə kaf kocofron ɓəw ngə rə Bayzlav. Vəlenta gədan sin kə ɗiy kəzəɗ səna hos təra ngərfoɗ a saray. 6 Təkən huvu səna diw kə ra Bayzlav. Sin ɗiya ra zlim ngə Bayzlav avə mazlaɓ ngetik, ɓəw hidiy cike tə dibizlav. 7 Geɗenta mozlokotuf ngə jəgəm a hidiy ngə Bayzlav, za kə dayenta gədan. Vəlenta gədan kə zəm bay atalan səbaniy parpar, atalan zəgudiy parpar, atalan hidiy mə njə kə zləgamiy miy maa parpar ɓəw atalan hayəkiy cike wayza. 8 Hidiy təm talan mahayək cike, maa a ɗeɗefiy zlim ngatan am ɗerewel ngə micin ndawyan, dəga Bayzlav a ndən talan mahayək gesin bəgwən, av kə mbəzlta. Ɗerewel səna acin, ɗerewel ngə Kər təmak hidiy mə bənta tamicek.
sin av kə pət am jik jaw səna.
Mana a sla ngə hid kə wəzlta kaɗ a masalam,
av kə wəzlta a masalam səna.
Asəna acin, hidiy mə səbiy Bayzlav wər, am mandal səna, say taniy kə məsəfigi ɓəw kə vəliy nəv ngatan a Bayzlav.
Təkən huvu mə pətah taa wili za
11 Zəni kat lim təkən huvu məpərmay aa pətah aa wili za. Sin awana falamiy saray wa ngə kər təmak, amma sin aa zləgam wa təkən huvu maa cehceh məkərən. 12 Sin awana gədan cike ngə təkən huvu mə pətah taa liɓ yəm tə maza mordoy, za sin ɗaw kə ɗiy kəzəɗ a gədaniy səna akibik təkən huvu mə pətah taa mə yəm za. Təkən huvu mə pətah taa mə yəm səna, a bəlta zaba, a gər kə wəzlta kaɗ. Amma tanjinhi mbəlah tik tu ɗiz. Təkən huvu mə pətah taa wili taken wəla a hidiy təm talan mahayək cike avə təkəniy tə kimin kə mbəzliy təkən huvu mə pətah taa mə yəm za səna. 13 Təkən huvu mə pətah taa wili za səna, nap ɗiy təkəniy mə wələk bərngəzl nha ɗiya surohoh kuhu aa dibizlav za, kə yah a kayək akibik hidiy cike wayza. 14 Asəna acin, sin tu jək hidiy təm talan mahayək, kadaban sin a jan gədan ngə ɗiy təkəniy mə wələk bərngəzl səna akibik təkən huvu mə pətah taa liɓ yəm za. Sin luwen a hidiy təm talan mahayək, kə ndəniy təkən cehceh təkən huvu mə pətah taa liɓ yəm za, kə jan kə vəlen mordoy. A bəliy təkən huvu səna zaba avə masalam, amma sin tu mbəl, awana micin. 15 Vəlenta gədan a təkən huvu mə pətah taa wili za, kə vəl micin a təkən hidiy mə ndənta cehceh təkən huvu mə pətah taa liɓ yəm tə maza mordoy səna. Asəna acin, təkən mə ndənta səna kwəl kə zləgam, za sin kwəl kə wəzl hidiy mə ɓoniy kə mbəzlta way kaɗ. 16 Təkən huvu mə pətah taa wili za, taken wəla a hidiy cike, kə ɗəɗefiy zlim ngə təkən huvu mə pətah taa mə yəm am ngərzəm ngatan, asənkwən am muzərohiy tan. Sin a taken wəla səna, a hidiy mə gəgəc gəgəc avə hidiy mogroy, mə njənjigi avə hidiy təm sanha, hidiy məmariy talan tan avə bahlamigi. 17 Asəna acin, mana hid a may kə səkəm təkən asənkwən kə ber tik, say kə ɗəɗefenta zlim səna zagway. Ɗəɗef səna, zlim ngə təkən huvu mə pətah taa mə yəm za asənkwən nəf ngə zlim ngetik.
18 Say hid kə mar bərngəzl tanjinhi. Hid məmar sən kwəl kə sən nəf ngə təkən huvu səna, kadaban sin a ɗef zlim ngə hidmemblen. Nəf səna acin bələk kwəh avə ngərkwəh avə kwəh (666).