Werti avə təkən huvu mordoy maa cehceh məkərən
12
Adəwən səna, təkən mordoy mə kpah talan pətah aa dibizlav za. Təkən səna werti. Sin a kwəl pic a kəsəm wa ləkwət, aa ngaziy tik bac am təra, sin təp falfala ngə bay, falfala səna a ɗiyta a cuwzlerekiy gəɓ atalan saray. 2 Sin awana liɓi, za liɓi aa hamenni, sin aa han, aa juway kə mbuw.3 Təkən mə kpah talan məpərmay pətah a dibizlav za baha: Təkən səna, təkən huvu mordoy tə donu, sin wizek wizek, za cehceh məkərən. Sin awana talaniy cisaray, za falamiy gəɓ. Sin mə təpah falfaliy ngə bay am talan takan takan cisaray tik. 4 Cuwzlerekiy tə dibizlaw wəzakiy kaɗ madaba makaɗ, sin cof cuwzlerekiy təm lay maa takan tə dab maa makaɗ səna kaɗ avə kwetir tik, za cikta kaɗ a kayək. Sin va gar akibik wer taa juway kə mbuw, a gər mandal wer səna tu mbuw, sin kə ham kərmawar səna kaɗ. 5 Wer səna mbuw kərtawəl. Kər səna acin məv kə zəm bay atalan zəgudiy avə gədan mordoy. Amma wətiy kər səna, tepta angər Bayzlav ɓəw abər lay ɗew ngə Bayzlav. 6 Wer səna si tik adab donu, am lay Bayzlav mə sləlsəɓ hidiy kə vəlenta zəm, wan ngərbək a blək saray a ngər kwəh.
7 Zəni vurum diw a dibizlav. Mbaslay ngə Bayzlav mordoy zlim tik Mikaylu avə mbaslayiy tik a jəgəmiy avə təkən huvu ma cehceh məkərən. Təkən huvu səna avə mbaslayiy tik ɗiya jəgəmiy təm avə tanigi. 8 Amma Mikaylu avə hidiy tik dayenta gədan a təkən huvu. Gamiy təkən huvu səna avə mbaslayiy tik aa dibizlav za, a geɗta taniy kə ɗewiy a dibizlav bəgwən. 9 Goɗohta kaɗ a kayək. Sin acin təkən huvu mordoy tə donu maa cehceh məkərən, sin acin wən tamicek, taa njə kə luwta musuruf, ɓəw Bay musuruf. Sin ɗaw kə lebeɗ hidiy təm talan mahayək cike wayza. A goɗohta aa dibizlav za kə yah a kayək, sin avə mbaslayiy tik.
10 Adəwən səna, kat zlim hid aa cəwəla dayday aa dibizlav za, a luw:
‹‹Tanjinhi acin mandal Bayzlav ngiykwan aa mbəl yikwan.
Tanjinhi acin Bayzlav ngiykwan aa zəm bay atalan hidiy a gədan.
Tanjinhi acin Kristu kər ngə Bayzlav aa ɗef gədan mordoy ngetik.
Kadaban hid mə njə kə vəl galmayiy ngiykwan angər Bayzlav, mə goɗohta kaɗ a kayək.
Sin ɗaw kə vəlta pic avə vuɗu.
11 Amma galmayiy ngiykwan mə dayenta gədan za.
A dayenta gədan səna, mbelmbel ɓiɓiz ngə Kər təmak mə mbəlta.
A dayenta gədan səna, avə taniy mə ceɗenta zləgam ngə Bayzlav a hidigi,
ɓəw avə taniy mə ngəmiy taniy kə məcigi.
12 Asəna acin, dibizlav avə hin tə kimin, mə zəzay!
Amma takwan ɗaha a hin tə kayək, ɓəw a təkəniy tə liɓ yəm tə maza mordoy!
Kadaban Bay musuruf mə surohoh za angər kin,
za nəv ngetik aa bas dayday,
kadaban sin mə sən za, a vah ndas ɗaba.››
13 Təkən huvu ma cehceh məkərən maa lim mə goɗohta kaɗ a kayək za, sin nap gugur wer mə mbuw kərtawəl. 14 Amma vəlenta məbərbəriy saray ngə gazlak mordoy kə jan sin kə mbirtik adab donu, am lay Bayzlav mə sləsləɓenni, sin kə ɗew gaf avə wən. Ɗaw kə vəlenta zəm abəgo, hos di makaɗ a tər kwəh. 15 Zəni wən vənah yəm wa gaw yəm mordoy aa dəwən ngə wer səna, kə jan yem kə kəkəl tik. 16 Amma hayək mən wer səna. Hayək ɗiya ta, ɓoh. Za yəm təkən huvu mə vənah səna pətiy, siɓit, aliɓ tik. 17 Təkən huvu maa lim atəgo za, nəv ngetik ɗiya bas dayday atalan wer səna. Sin va kəv kə jəgəm a mə fəs wəriy ngə wer səna. Wəriy səna acin hidiy mə njə kə səbiy ngəz ngə Bayzlav ɓəw zləgam Yesu mə luwenta.
18 Zəni təkən huvu va gar atalan vəgaɗ ngə maza mordoy.