Məsəberiy saray ngə Bayzlav
11
Adəwən səna, vəlakta pay ngə sla təkən, za ɗiya luwakta: ‹‹Ava sla jik Bayzlav ɓəw lay ngə vəlen təkən a Bayzlav. Za ma nəf hidiy mə njə kə mbəzliy Bayzlav a jik səna. 2 Amma terde ngə jik Bayzlav, hoh gər kə sla kwən, kadaban terde səna Bayzlav a geɗen a hidiy maa aa sənta ɗahkwən. Taniy av kə didezliy liɓde ngə Bayzlay tər ngərfoɗ avə saray. 3 Mandal səna, təv kə zlən məsəberiy ɗa saray, məsəberiy səna a kwəliy ləkwət ngə han mimci. Taniy av kə ceɗenta zləgam ngə Bayzlav a hidigi, hos wan ngərbək a blək saray a ngərkwəh.››4 Məsəberiy maa saray səna, mə gariy kaɗ hoyhoy akibik Bayzlav məmar talan mahayək wa jaytuniy saray ɓəw təkəniy saray ngə vərək pətərligiª. 5 Mana hid tu gər kə ɗiyenta mə ngavngav, kuhu ɗaw kə pətah aa kəm tan za, kə kəɗaw calmosumiy tan kaɗ. Hid mə gər kə ɗiyenta mə ngavngav, kə məc asəna. 6 Am mandal məsəberiy səna taa ceɗenta zləgam ngə Bayzlav a hidigi, awaniy a gədan ngə tak van kə za. Taniy awaniy a gədan ngə mbaɗ yəm kə ɓiɓiz. Za mana taniy mə mayta za, taniy kwəl kə dahiy ngay parpar am talan mahayək.
7 Amma mandal taniy tu wayiy ceɗ zləgam ngə Bayzlav a hidigi, təkən huvu av kə pətah aa wili maa kpəm, selenselen za kə jəgəm avə məsəberiy səna. Təkən huvu səna av kə dayenta gədan, za av kə wəzlta kaɗ. 8 Av kə geɗiy mimciy tan acaɗak aliɓde mordoy, am lay hidiy mə zeniy Məmarta am pay maa zləngrak. Centa zlimi mə ɓahɓah aliɓde səna ‹‹Sodoma›› ɓəw ‹‹Misra››. 9 Hidiy təm zəgudiy parpar, təm səbaniy maa parpar, mə njə kə zləgamiy ma maa parpar, təm hayəkiy parpar av kə yiy kə safiy mimciy tan səna. Mimciy tan səna av kə waniy acaɗak wan makaɗ a reta, a geɗenta lay a hidiy kə kahta kaɗ kwən. 10 Hidiy tə talan mahayək av kə zəzayiy a məc ngə məsəberiy səna. Taniy av kə ɗiyiy məmbəlwa, za av kə wəzakiy təkəniy parpar am walan tan, kadaban məsəberiy səna tu zlənenta takwan dayday.
11 Amma adəwən wan makaɗ a reta səna, Bayzlav uf mbiɗ ngə vəl micin a kəsəm ngə məsəberiy səna, za taniy səfəniy aa mə məc za, sliɗigi, za gariy a gar. Hidiy mə limta cike wayza ɗiya hovokiy dayday. 12 Za acin, məsəberiy maa saray səna zlimiy aa ciywəla dayday aa dibizlav za, wəla səna aa luwenta: ‹‹Mə tapah awənhi!›› Za taniy tapiy a dibizlav. Taniy a tapiy aaliɓ gazlavay, za calmosumiy tan aa limta. 13 Am mandal səna, hayək ɗiya kəz a gədan, gingiɗ gingiɗ. Wəzakiy liɓde kaɗ madaba gəɓ, mgbəw takan tədab maa gəɓ tə liɓde səna ɗiya gom. Za hidiy ngərbək cisaray məcigi, lay hayək mə kəz səna. Nəv ngə hidiy tavə micin ɗiya mbir, za taniy nap vəlenta mordoy a Bayzlav tə dibizlav.
14 Takwan mə saray tik tu ton, amma takwan mə makaɗ tik av kə yah njoɗ.
Mbaslay ngə Bayzlav mə cisaray tik mbiz falam
15 Za acin, mbaslay ngə Bayzlav mə cisaray tik mbiz falam. Kat zlim hidiy aa ciywəla dayday aa dibizlav za, aa luwta:
‹‹Tanjinhi Bayzlav Məmar yikwan avə Kristu sin mə welu, av kə zəmiy bay am talan mahayək acin.
Bayzlav av kə zəm bay ko apu.››
16 Adəwən səna, hidiy mogroy maa ngərsaray avə foɗ mə ɗew ɗewiy təm lay ɗew ngatan tə kibik Bayzlav dosiy muzəroh tan a kayək, za ɗiya mbəzliy Bayzlav. 17 Nap luwta:
‹‹Məmar yikwan Bayzlav Məmar gədan cike wayza,
dəga hoh ndən talan mahayək gesin bəgwən, hoh ɗaha, kula apicah hoh ɗaha,
yikwan maa luwoh soko,
lay hoh mə ɗiy kəzəɗ avə gədan ngəkoh mordoy, hoh ɗew kə bay.
18 Hidiy maa aa səbiy mozlokotuf koh ɗahkwən tu basiy nəv atalan koh dayday.
Amma tanjinhi, bas nəv koh tu pətah mgban mgban atalan tan.
Pic ngə zla dalgway a hidiy mə məcməciy tu hos.
Pic ngə vəl gədmazlən a mokotufiy mə ɗiyiy kəzəɗ koh tu hos təm.
Hov kə vəlen gədmazlən a hidiy mə səbiy mozlokotuf koh,
a hidiy mə daɓiy talan a hoh,
a hidiy mə gəc gəc, ɓəw a hidiy mogroy təm.