Mbaslay ngə Bayzlav awana avə ɗerewel mendez am ngəra
10
Adəwən səna, kat lim mbaslay məpərmay ngə Bayzlav suroh aa dibizlav za, sin awana avə gədan mordoy. Sin mə kwəla gazlavay a kəsəm wa ləkwət, za kwalay mə paɗah kaɗ am talan tik. Həriy ngetik aa zləzlaɗ wa pic, za ngaziy tik aa zlawiy wa gana kuhu. 2 Sin mə kawa ɗerewel mendez am ngəra tik, ɗerewel səna mə zləra kaɗ. Sin mə gara kaɗ, ngaz taa mə ngərzəm aliɓ yəm tə maza mordoy, za ngaz taa mə zlaɓay a kayək. 3 Sin ɗiya cəwəla dayday wa mobor taa vuvor. Sin maa cəwəla za, van ɗiya ndəl jəɓ cisaray avə zləgam. 4 Kat gər kə ɗəɗef zləgam kat mə zlim səna kaɗ, amma kat zlim wəla aa dibizlav za, a luwakku: ‹‹Hoh gər kə ɗəɗef zləgamiy van mə ndəl jəɓ cisaray kə ceɗiy zləgam təgo kwən, a geɗ ma səna aliɓ koh!››5 Zəni mbaslay ngə Bayzlav kat mə lim mə gar gar, ngaz takan aliɓ yəm tə maza mordoy, ngaz takan a kayək səna, kaf ngərzəm kəv dibizlav. 6 Sin ɗiya luw mbeɗi am zlim ngə Bayzlav taa micin ko apu, mə ndən dibizlav avə təkəniy tə kimin cike, mə ndən talan mahayək avə təkəniy tə kimin cike, mə ndən maza mordoy avə təkəniy tə liɓ tik cike wayza. Mbaslay səna ɗiya luw: ‹‹Tanjinhi a vah ndas ɗaba. 7 Amma am mandal mbaslay ngə Bayzlay mə cisaray tik tu kə mbiz falam, Bayzlav av kə ɗiy təkən mə ɓahɓah sin mə ɓən kə ɗiy tik amicek, mana sin mə ceɗen a mokotufiy mə ɗiyiy kəzəɗ ngetik.››
8 Wəl kat mə zlim taa dibizlav za tafnan, zləgamak baha. Ɗiya luwakku: ‹‹Ava yək ɗerewel mə zlər zlər təm ngəra ngə mbaslay ngə Bayzlav mə gar gar, ngaz takan aliɓ yəm tə maza mordoy, za ngaz takan a kayək təgo.›› 9 Kat va angər mbaslay səna, za kat tar sin kə vəlak ɗerewel mendez səna. Sin luwakku: ‹‹A yəku! Za a hamu! Av kə ɗiy diɗek diɗek a kəm koh wa njəzlem ɓəɓam. Amma mandal hoh tu kwiɗik tik aliɓi, av kə ɗiy heɗek heɗek.›› 10 Kat yək ɗerewel mendez tə ngər mbaslay səna, za kat nap ham tik. A kəm ɗa, diɗek diɗek wa njəzlem ɓəɓam. Amma kat maa kwiɗik za, liɓ ɗa cike mbaɗay tik heɗek heɗek.
11 Zəni hid ɗiya luwakku: ‹‹Say hoh kə ceɗ zləgam Bayzlav mə luw bah atalan zəgudiy parpar, atalan hayəkiy parpar, atalan hidiy mə njə kə zləgamiy miy parpar, za ɓəw atalan bayiy maa parpar.››