Mbaslay ngə Bayzlav mə joɓən tik mbiz falam
9
Mbaslay ngə Bayzlav mə joɓən tik mbiz falam. Za acin kat lim cuwzlerek ndəvah aa dibizlav za a kayək. Vəlenta lekile a cuwzlerek səna ngə zlər mijijik ngə wili maa kpəm, selenselen, am lay mə pekiy mbiɗiy mə ngavngaviy abəgo. 2 Sin zlər mijijik ngə wili səna kaɗ, za seleh ɗiya sibireh aa wili za, tərlin tərlin, wa seleh ngə kuhu taa ɗəziy siwili. Seleh səna kpizliɓ pic kaɗ. Lay aa zləzlaɗ ɗahɗaba. 3 Jeriy pətiy aa mə seleh səna za, cakwayiy am talan mahayək cike wayza, vəlenta gədan kə jan taniy kə ngaciy hid wa herdi. 4 A luwenta taniy kə hamiy hiziɗiy kwən, kə hamiy vidiɗiy pay kwən ɓəw kə hamiy vidiɗiy ko ceki mə təvtəviy tə kayək kwən. Amma taniy kə ngaciy hidiy maa a ɗəɗefenta zlim ngə Bayzlav am muzəroh ngatan bəgwən dap. 5 A geɗenta mozlokotuf ngə wəzl hidiy kaɗ bəgwən, amma a geɗenta mozlokotuf tər joɓən taniy kə zlənenta takwan dayday a hidigi. Ham ngə takwan taniy ta njə kə zlənenta a hidigi, pərak pərak a ham ngə herdi mə ngac hidi. 6 Am mandal səna acin, hidiy av kə jariy məc, zəni taniy a janta kwən. Taniy av mayiy kə məcigi, amma məc av kə sitik gaf a tanigi.7 Jeriy səna wa pilisiy mə sləsləɓta kəv am vurum. Taniy awaniy a təkəniy mana falfaliy ngə bay mə ɗiyta avə melenge a talan. Muzərohiy tan wa ngə hidmemblen. 8 Susoniy talan tan zoɗ wa ngə wertigi, za ndiniy tan wa ngə moborigi. 9 Mə kwəliy təkəniy mana ləkwət ngə vurum mə ɗiyta a masa am nəv ngatan, za mandal taniy a mbirigi, kopokiy tan ɗaw kə ləv wa ləv ngə saretiy ndas pilisiy taa ngazlta kəv am vurum. 10 Jeriy səna awaniy a dangwal wa ngə herdi avə ma tik maa tewren ngə ngac hidi. Taniy awaniy a gədan am dangwaliy tan səna ngə zlənenta takwan a hidiy hos am tər joɓən. 11 Bay ngə jeriy səna ɗaha, sin acin mbaslay ngə Bay musuruf, mbaslay səna acin taa zəm bay atalan wili maa kpəm, selenselen səna. Zlim ngetik avə ma ibraninko Abadon, za avə ma yunaninko Apoliyon. Mana kə luwa kaɗ: ‹‹Mə ngav lay››.
12 Takwan ngə tizin tu ton. Adəwən səna, takwaniy saray av kə yiy baha.
Mbaslay ngə Bayzlav mə kwəh tik mbiz falam
13 Mbaslay ngə Bayzlav mə kwəh tik mbiz falam. Za acin, kat zlim wəla ngə hid aabər lay ngə vəlen təkən a Bayzlav mə ɗiyta a melenge, mə vərək vərək tə kibik Bayzlav. Wəliy səna a pətiy aa gozlumiy ngə lay səna. 14 Wəliy səna luwen a mbaslay ngə Bayzlav mə kwəh tik mə kaw falam am ngəra, anhi: ‹‹A pəsl mbaslayiy ngə Bay musuruf maa foɗ mə jawjawiy tə bər gaw yəm mordoy zlim tik Efratis nhi kaɗ.›› 15 Za acin, sin va pəsl mbaslayiy ngə Bay musuruf maa foɗ səna kaɗ. Mbaslayiy səna, Bayzlav a sləsləɓta taniy kə ɗiyiy may ngetik am masa, am pic, am təra ɓəw am di sin mə zlenta. May ngetik səna acin, taniy kə wəzliy hidiy təm talan mahayək takan adab mə wəzakta kaɗ parpar makaɗ. 16 Ceɗekta nəf ngə sojiy mə kwariy pilisiy kəv am vurum səna, taniy milyon blək saray. 17 Ɗiyak wa kata sisin, kat lim pilisigi, hidiy awaniy adəwən tan. Hidiy səna a kwəliy ləkwətiy ngə vurum mə ɗiyta a masa, ləkwətiy səna wizek wizek wa kuhu, mblen mblen wa gugwən ta njə kə luwta safir, za kpuloh kpuloh wa hayək mə kəɗaw kəɗaw. Talaniy ngə pilisiy səna cehceh talan ngə moborigi. Kuhu, seleh ɓəw təkən mə njə kə yək kuhu angaw, pətah aa kəm tan za. 18 Kuhu, seleh ɓəw təkən mə njə kə yək kuhu angaw mə pətiy taa kəma ngə pilisiy səna acin takwanigi. Taniy wəzliy hidiy təm takan adab mə wəzakta madaba makaɗ təm talan mahayək. 19 Gədan ngə pilisiy ngə ɗiy ngay səna awaniy a kəma ɓəw am dangwaliy tan. Dangwaliy tan cehceh wən, awaniy avə talan, za ɗaw kə ɗiyiy ngay avə talaniy tan səna.
20 Ngay səna a wəzl hidiy tə talan mahayək cike waykaɗ bəgwən. Amma hidiy mə fəsfəs səna aa may kə buwiy ngar kaɗ kwən. Taniy aa səbiy avə mbəzl musurufigi ɓəw mbəzl zugwa. Zugwiy taniy taa mbəzlta səna, kwəl kə limiy lay kwən, kwəl kə zlimiy kwən, za kwəl kə viy kwən, kadaban hidiy a ndənta avə melenge, avə suloy, avə masa njə gədan, avə gugwən ɓəw a cəmiy pay. 21 Hidiy səna a buwiy ngar kaɗ bəgwən, aa səbiy aa kə wəzl dəwa, aa ɗiyiy mə wəzlwəzlək, aa ɗiyiy vərndew, za aa həligi.