Kər təmak nga tubu mə cisaray tik
8
Adəwən səna, Kər təmak nga tubu mə cisaray tik. Mandal səna, təkəniy cike tə dibizlav, siyya, njiytan tehte, av kə ɗiy minti ngərmakaɗ.2 Zəni kat lim mbaslayiy ngə Bayzlav cisaray mə njə kə gariy təkibik tik. Vəlenta falamiy cisaray.
3 Mbaslay məpərmay ngə Bayzlav takan yah gar abər lay ngə vəlen təkən a Bayzlav. Mə kawa kendek mə ɗiyta a melenge am ngəra. A njə kə kəɗawiy dorson aliɓ kendek səna. Vəlenta dorson dolom ngə vəlen a Bayzlav, kə jan mbaslay səna kə lap tik avə tar ngə hidiy mə səbiy Bayzlav. Za sin kə kəɗawta kaɗ am lay ngə vəlen təkən a Bayzlay mə ɗiyta avə melenge. Lay səna awan abər lay ɗew ngə bay. 4 Seleh ngə dorsoniy gar aa mə ngər mbaslay ngə Bayzlav za, lap avə tar ngə hidiy mə səbiy Bayzlav, ɗiya sibiriy, tirlin tirlin, kəv wəzlav akibik Bayzlav. 5 Za acin mbaslay ngə Bayzlav wət təkən ngə kəɗaw dorson, sin a kuhu təm lay kəɗaw təkən a Bayzlav zekzek pe akimin, za cik kaɗ am talan mahayək. Njoɗ van diw kə wiciɗ, ɗiya ləv, za ɗiya ndəl. Za hayək ɗiya kəz, gingiɗ, gingiɗ.
Mbaslayiy ngə Bayzlav foɗ ngə tizin mbiziy falamigi
6 Mbaslayiy ngə Bayzlav cisaray mə kawiy falamiy cisaray am ngəra, sləsləɓiy kəsəm kə mbiz tik.
7 Mbaslay ngə Bayzlav mə tizin mbiz falam tik. Məngərzlezlezliy avə kuhu mə gavaɗ gavaɗ tavə ɓiɓiz yoɓiy aa dibizlav za kə yah a kayək. Talan mahayək mə wəzaka kaɗ madaba makaɗ, za takan tə dab maa makaɗ səna, ɗiya kəɗaw, payiy tə kimin ɗiya kəɗawigi, za hiziɗiy maa njeɓek tə kimin cike wayza ɗiya kəɗawiy təm.
8 Mbaslay ngə Bayzlav mə saray tik mbiz falam tik. Wətiy təkən mordoy mana wurum aa zlaw wa kuhu fəkta, tizl, aliɓ yəm tə maza mordoy. Maza mordoy ɗiya wəzak madaba makaɗ, za yəm tə maz takan tədab maa makaɗ mbaɗ kə ɓiɓiz. 9 Təkəniy ta micin tə liɓ yəm tə maza maa takan səna micigi, za payiy mogroy ngə zlan maza təbəgo ɗiya cakwayiy petepete.
10 Mbaslay ngə Bayzlav mə makaɗ tik mbiz falam tik. Cuwzlerek mordoy taa zlaw mana kuhu ndəvah aa dibizlav za. Gaw yəm wəzak madaba makaɗ, cuwzlerek ndəv atalan gaw yəm maa takan ɓəw atalan layiy mə njə kə kwariy yəm, njeɓnjeɓnjeɓ maa takan tədab maa makaɗ səna. 11 Zlim ngə cuwzlerek səna ‹‹Ndrəzl maa heɗek››. Gaw yəm səna mbaɗ heɗek heɗek, za hidiy dolom miciy makavay taniy mə siy yəm njə ndrəzl səna.
12 Mbaslay ngə Bayzlav mə foɗ tik mbiz falam tik. Pic wəzak madaba makaɗ, za takan a zlaw ɗahkwən, təra wəzak madaba makaɗ, za takan a zlaw ɗahkwən, cuwzlerekiy wəzakiy madaba makaɗ za mgbəw takan a zlawiy ɗahkwən. Vah pic tu wəzak madaba makaɗ, za vuɗu təm atəgo. Takan adab vah pic, pic a zləzlaɗ akimin bəgwən, za takan adab vuɗu, tər a zləzlaɗ akimin bəgwən təm.
13 Kat cəhəriy baha, kat lim gazlak aa mbir a dibizlav maa fal, a cəwəla dayday aa luw: ‹‹Aw gawligi! Takwan ɗaha, takwan ɗaha a hidiy təm talan mahayək! Takwan ɗaha a taniy mandal mbaslayiy ngə Bayzlav maa makaɗ məpərmay tu kə mbiziy falamiy tan!››