Hidiy maa mbaslay mə ɗəɗefenta zlimi ngə Bayzlav am muzəroh
7
Adəwən səna, kat lim mbaslayiy ngə Bayzlav foɗ, mə gariy kaɗ a madaba lay a madaba lay foɗ tik. Takiy mbiɗ ngə madaba lay foɗ tik kə jan taa mbiɗ səna kə ca atalan mahayək, atalan yəm tə maz mordoy, ɓəw atalan payigi. 2 Kat lim mbaslay ngə Bayzlav məpərmay, sin a yah aa kaɗkaɗ za. Sin mə kawa təkən ngə ɗəɗef zlim ngə Bayzlav Məmar micin am ngəra. Sin ɗiya cəwəla dayday a mbaslayiy ngə Bayzlav maa foɗ mə vəlenta gədan ngə ɗiy ngay atalan hayək ɓəw atalan yəm tə maz mordoy, a luwenta: 3 ‹‹Mə kaw talan kin! Mə gər kə ɗiyen ngay a hayək, a maz mordoy ɓəw a payiy gesin kwən! Say yikwan kə ɗəɗef zlim ngə Bayzlav ngiykwan am muzəroh ngə hidiy mə ɗiyenta kəzəɗ zagway.›› 4 Za kat zlim mana mə nəfiy hidiy mə ɗəɗefenta zlim ngə Bayzlav am muzəroh səna. Hidiy təm səbaniy ngə Israyila cike wayza, taniy ngərbək blək a ngərfoɗ avə foɗ. Taniy acin: 5 Səban ngə Yahuda, hidiy ngərbək gəɓ atalan saray. Səban ngə Ruben, hidiy ngərbək gəɓ atalan saray. Səban ngə Gada, hidiy ngərbək gəɓ atalan saray. 6 Səban ngə Aser, hidiy ngərbək gəɓ atalan saray. Səban ngə Neftali, hidiy ngərbək gəɓ atalan saray. Səban ngə Manasa, hidiy ngərbək gəɓ atalan saray. 7 Səban ngə Simeyon, hidiy ngərbək gəɓ atalan saray. Səban ngə Lewi, hidiy ngərbək gəɓ atalan saray. Səban ngə Isakar, hidiy ngərbək gəɓ atalan saray. 8 Səban ngə Zabulon, hidiy ngərbək gəɓ atalan saray. Səban ngə Yusufu, hidiy ngərbək gəɓ atalan saray. Səban ngə Biyamin, hidiy ngərbək gəɓ atalan saray.Hidiy awaniy akibik Bayzlav ɓəw akibik Kər təmak
9 Adəwən səna, kat cəhəriya, kat lim zəgudiy dolom hid kwəl kə nəfta kwən. Hidiy səna a yiy aa mə hayəkiy təm talan mahayək cike wayza, aa mə səbaniy cike wayza, ɓəw hidiy mə njə zləgamiy a madaba ganiy par par. Taniy mə gariy kaɗ akibik lay ɗew ngə bay, ɓəw akibik Kər təmak. Mə kwəliy ləkwətiy maa baran a kəsəm, za kawiy vidiɗiy ngə payiy dibinoje am ngəra. 10 Aa ciwəla dayday, aa luwta:
‹‹Bayzlav ngiykwan mə ɗew ɗew təm lay ɗew ngə bay
ɓəw Kər təmak,
taniy acin mə mbəliy yikwan.››
11 Mbaslayiy ngə Bayzlav cike wayza ɓasiy kaɗ abər lay ɗew ngə bay. A ɓasiy a jagwar hidiy mogroy ɓəw təkəniy foɗ taa micin. Taniy dosiy muzəroh a kayək akibik lay ɗew ngə bay, za ɗiya mbəzliy Bayzlav. 12 Taniy a luwta:
‹‹Amina!
Bayzlav ngiykwan awana avə gədan mordoy, a mar ɓən!
Nəmkwan kə luwen soko, nəmkwan kə vəlen mordoy, nəmkwan kə səban tik ko apu! Amina!››
13 Hid mordoy takan tə dab maa ngərsaray avə foɗ səna ɗiya nehekku, ɗiya luw: ‹‹Hidiy mə kwəliy ləkwətiy maa baran təgo, hidiy ngayi, za a yiy aa zəki?›› 14 Kat zlawenni, kat ɗiya luw: ‹‹Aw Mordoy, tə sənak ki? Hoh acin mə sən tik kwən vu?›› Sin luwakku acin: ‹‹Taniy acin hidiy maa hidiy mə zlənenta takwan dayday. Taniy a gohiy ləkwətiy tan avə ɓiɓiz ngə Kər təmak, asəna acin ləkwətiy tan mbaɗ baran baran, tewtew. 15 Kadaban səna acin, taniy mə gariy akibik lay ɗew ngə Bayzlav. Taniy aa mbəzliy Bayzlav a jik tik vuɗu avə pic. Za hid mə ɗew ɗew təm lay ɗew ngə bay av kə ɗew avə tanigi, za kə puwta. 16 Mitis a wəzlenta ɗaba, yəm a wəzlenta ɗaba, pic a rəngəzl atalan tan ɗaba ɓəw lay maa bunok a deɓenta ɗaba. 17 Asəna acin, Kər təmak tə bər lay ɗew ngə bay av kə ɗew kə kər məgəlgəla ngatan. Av kə tepta am lay yəm maa njeɓnjeɓnjeɓ mə njə kə vəl micin. Za Bayzlav av kə saɗ teweɗ təm həriy tan kaɗ.››