Kər təmak nga tubiy kwəh təm ma ngə ɗerewel
6
Adəwən səna, kat lim Kər təmak nga tubu mə sləraɓta ngə tizin tə dab cisaray təm ma ngə ɗerewel, za kat zlim təkən takan adab təkəniy foɗ ta micin nap cəwəla a gədan wa von taa ləv, a luw: ‹‹A yah!›› 2 Za acin kat lim pilis maa baran. Hid tə dəwən tik mə kawa bak am ngəra. Bayzlav mə vəlen falfala ngə bay za lay sin mə dayen gədan a mosumiy tik. Sin vəlen gədan kə day mosumiy tik, tanjinhi sin aa va kə dayen gədan a mosumiy tik məpərmay baha.3 Zəni Kər təmak nga tubu məsaray tik, mandal səna kat zlim təkən mə saray tik tə dab təkəniy foɗ taa micin aa luw: ‹‹A yah!›› 4 Za acin, pilis məpərmay hosohoh, sin wizek wizek wa ndezl kuhu. A vəlenta gədan ngə gam zoy aa mə talan mahayək za a hid tə dəwən pilis səna, kə jan hidiy kə brazliy kəsəm am walan tan. Vəlenta masalam mordoy am ngəra.
5 Zəni, Kər təmak nga tubu mə makaɗ tik, kat zlim təkən ta micin mə makaɗ tik aa luw: ‹‹A yah!›› Za kat lim pilis memblen. Hid tə dəwən tik mə vəlenta kiliw ngə sla təkən za am ngəra. 6 Kat zlim wa hid a zləgam adab təkəniy maa foɗ taa micin, a luw: ‹‹Mana hid tu ɗiy kəzəɗ dəga gbəma nha pic ndəv, suloy tu kə wərəkenta ngə kəzəɗ səna, av kə səkəm ngirmi maa cehceh ngirmi hiziɗ kiliw takan, asənkwən hardiya kiliw makaɗ! Amma səkəm ɗawa avə movu hoh gər kə ɗiyta kwak kwən!››
7 Za acin kər təmak nga tubu mə foɗ tik. Kat zlim təkən taa micin mə foɗ tik a luw: ‹‹A yah!›› 8 Kat lim pilis maa kpuloh. Hid tə dəwən tik a njə kə luwta: ‹‹Mən məc,›› za lay mə njə kə luwta lay ɗew ngə mimciy aa səb tik. Wəzakiy hidiy təm talan mahayək madaba foɗ, za vəlenta gədan a Mən məc ɓəw lay ɗew ngə mimcigi kə wəzliy hidiy tə madaba lay takan adab maa foɗ səna. Taniy kə wəzliy hidiy səna a masalam, kə dahiy mitis kə wəzlta, kə wəzlta a məc mə njə kə zlan hayya, za təkəniy huvu tə donu kə wəzl hidiy sənan.
9 Zəni, Kər təmak nga tubu mə joɓən tik, kat lim micin ngə hidigi, hidiy mə wəzlta makavay taniy mə səbiy zləgam ngə Bayzlav ɓəw mə ceɗen zləgam səna a hidigi, micin ngatan səna awaniy a madabah lay ngə vəlen təkən a Bayzlav. 10 Micin ngə hidiy səna aa ciwəla dayday, aa luwta: ‹‹Bayzlav Məmar hidi, hoh kweɗek kweɗek za hoh njə kə ceɗ mindiwin, hov kə zla dalgway ngə hidiy təm talan mahayək mə wəzliy yikwan kaɗ nhi apu? Za hov kə ndədəwa ngiykwan apu?›› 11 Za acin vəlenta ləkwətiy maa cip maa baran takan takan a hidiy səna cike wayza, za luwenta taniy kə puwiy gwedek baha. Say tu wəzliy hidiy mə səbiy mozlokotuf ngə Bayzlav, ɓəw mə ɗiyiy kəzəɗ ngetik mana mə wəzliy hin zagway. Mandal tu wəzlta kpekpe mana Bayzlav mə zlu, za adəwən səna, Bayzlav av kə zla dalgway ngə hidiy səna acin.
12 Za kat lim Kər təmak nga tubu mə kwəh tik. Za acin, talan mahayək diw kə kəz dayday, gingiɗ, gingiɗ, pic kpizlikey tik, saf ɗekɗek wa ləkwət memblen, tər mbaɗ wizek wizek wa ɓiɓiz, 13 za cuwzlerekiy ɗiya yoɓiy aa dibizlav za, wa sikwiɗ taa suloɓ mbiɗ taa njə kə kəz tik a gədan. 14 Dibizlav lekey tik wa taa paɗiy waypah. Wurumiy ɓəw layiy maa mgbaw avə yəm jeliy tan aa mə lay tan za. 15 Bayiy təm talan mahayək, hidiy mogroy, mogroy ngə sojigi, hidiy mə njənjigi ɓəw hidiy njə gədan, bahlamiy cike wayza ɓəw hidiy məmariy talan tan viy ɓahiy tan a budumigi ɓəw atalan wurumigi. 16 Taniy luwenta a wurumigi ɓəw talagwənigi: ‹‹Mə gom atalan yikwan, kə jan hin kə dəp yikwan taa hid mə ɗew ɗew təm lay ɗew ngə bay kə lim yikwan, za Kər təmak mə bas nəv avə yikwan kə lim yikwan za. 17 Mindiwin, pic mordoy ngə ɗef bas nəv ngatan tu hos. Ngə ler acin yi?››