Hid mə hos gəga kə zlər ɗerewel
5
Adəwən səna, kat lim ɗerewel mə paɗpaɗ mə kawa kaɗ am mə ngərzəm ngə hid mə ɗew ɗew təm lay ɗew ngə bay. Ɗerewel səna, dəwən tik avə liɓ tik mə ɗəɗefeh kaɗ, za mə sləraɓiy ma tik kaɗ a tubu jəɓ cisaray. 2 Za kat lim mbaslay ngə Bayzlav njə gədan aa cəwəla dayday a luw: ‹‹Hid ngayi mə hos gəga kə nga tubu təm ma ngə ɗerewel, za kə zlər tik kaɗ yi?›› 3 Amma ko hid takan, ko a dibizlav, ko am talan mahayək, za ko a wil taa kaɗkaɗ, hid mə ɓəs kə zlər tik, za kə jangi tik ɗahkwən. 4 Asəna acin, kat han han godokwən, kadaban hid mə hos gəga kə zlər tik za kə jangi tik ɗahkwən. 5 Amma hid takan adab mogroy tafnan luwakku: ‹‹Hoh han ɗaba! A saf mək: Gawal ta njə kə luwta Mobor səban ngə Yahuda təm madabah ngə bay Dawda, dayen gədan a mosumiy tik cike wayza, sin kwəl kə nga tubu mə sləraɓta jəɓ cisaray təm ma ngə ɗerewel səna kaɗ, za kə zlər tik acin.››6 Za acin, kat lim Kər təmak mə gara kaɗ abər lay ɗew ngə bay, təkəniy foɗ ta micin ɓəw hidiy mogroy mgbaw sin. Kər təmak səna wa a bənta zaba. Sin awana falamiy cisaray, za awana həriyiy cisaray. Həriyiy səna acin Mbiɗiy ngə Bayzlay cisaray sin ta njə zlənta am talan mahayək cike wayza. 7 Kər təmak səna, va yək ɗerewel təm ngərzəm ngə hid mə ɗew ɗew təm lay ɗew ngə bay səna. 8 Sin maa yək za, təkəniy foɗ ta micin ɓəw hidiy mogroy maa ngərsaray avə foɗ gbilihiy titimbiz akibik tik. Ko hid ngayi kaw tundon ɓəw kendek melenge wek avə dorson am ngəra. Dorson səna acin tar ngə hidiy mə njə kə səbiy Bayzlav. 9 Aa jəkiy drif ndawyan a luwta:
‹‹Ngəkoh hoh tu hos gəga kə yək ɗerewel, za kə nga tubu təm ma tik kaɗ,
kadaban hidiy mə wəzliy za amicek.
Za hoh zlambaɗah hidiy aa mə mə ngavngav za avə ɓiɓiz koh,
Hoh zlambaɗah madaba hidiy parpar ɓəw mə njə kə zləgamiy ma maa parpar, təm səban maa parpar, ɓəw təm hayəkiy maa parpar.
Hoh tepta angər Bayzlav.
10 Hoh ɗiy taniy kə ɗewiy kə hidiy koh, hoh acin bay ngatan,
hoh vərəkta taniy kə ɗewiy kə masayiy ngə Bayzlav ngiykwan,
za taniy kə ɗewiy kə bay am talan mahayək cike wayza.››
11 Mandal kat taa cəhəriya, kat zlim wəl ngə mbaslayiy ngə Bayzlav day godokwən. Av kə ɗiyiy miliyon miliyon taniy mə gariy kaɗ mgbaw lay ɗew ngə bay ɓəw təkəniy foɗ taa micin avə hidiy mogroy. 12 Aa jəkiy drif dayday, a luwta:
‹‹Law hidiy kə vəlenta mordoy a Kər təmak hidiy mə wəzlta tamicek,
hidiy mə həmənta, za mə səbanta,
sin acin məmar gədan, məmar təkəniy cike wayza ɓəw məmar ɓən!››
13 Za kat zlim təkəniy Bayzlav mə ndənta cike tə dibizlav, təm talan mahayək, tə wil taa kaɗkaɗ ɓəw tə liɓ yəm, təkəniy səna cike aa jəkiy drif, a luwta:
‹‹Mə səban hid mə ɗew təm lay ngə bay ɓəw Kər təmak,
mə həmənta, mə vəlenta mordoy za mə sən kaɗ taniy a waniy avə gədan ko apu!››
14 Za təkəniy foɗ ta micin ɗiya zlawta, a luwta: ‹‹Amina!›› Mogroy gbilihiy titimbiz kaɗ, ɗiya mbəzliy hid mə ɗew ɗew təm lay ɗew ngə bay ɓəw Kər təmak.