A səbaniy Bayzlav a dibizlav
4
Adəwən səna, kat lim təkən məpərmay bah wa kata a sisin, kat lim mijijik mə zlərah kaɗ a dibizlav. Za kat zlim wəla ngə hid mə zləgamak tafnan. Wəla ngə gawal səna acin mə ləv mana falam. Ɗiya luwakku: ‹‹A tapah a dibizlav awənhi kə jan kat kə ɗefeh təkəniy tu kə tonigi.›› 2 Njoɗ, Mbiɗ ngə Bayzlav pət a kəsəm ɗa. Zəni kat lim lay ɗew ngə bay a dibizlav səna. Hid mə ɗewe kaɗ akimin. 3 Məzuroh ngə hid təm lay ɗew səna aa lir mana gugwəniy malaw taa njə kə luwta yaspa avə sardis. Kwalay tərlan lay hid səna mə ɗew kaɗ. Aa zləzlaɗ təm mana gugwən malaw ta njə luwta Imiradi. 4 Lay ɗewiy məpərmay ngərsaray avə foɗ mgbaw lay ɗew ngə bay səna. Mogroy ngərsaray avə foɗ mə ɗewiy kaɗ am lay ɗewiy səna. Taniy a kwəliy ləkwətiy maa baran ɓəw a təpiy falfaliy a talan. Falfaliy səna a ɗiyta avə melenge. 5 Van aa wiciɗ, za aa ləv ɓəw aa ndəl aa mə lay ɗew ngə bay səna za. Akibik lay ɗew səna, pətərliy cisaray mə mbəliy kaɗ, taniy acin Mbiɗiy maa cisaray ngə Bayzlav. 6 Akibik lay ɗew ngə bay səna, təkən mana maza mordoy aa lir kiliw, kiliw, kiliw mana durugwal.Təkəniy ta micin foɗ mgbawiy lay ɗew ngə bay səna, ɓəw a dabdaba. Təkəniy səna, kibik tan avə dəwən tan həriyiy tutu. 7 Təkən ta micin tizin tik, wa mobor, mə saray tik, wa kərvəlen, mə makaɗ tik, muzroh tik ceh hidmemblen, za mə foɗ tik, wa gazlak taa mbir. 8 Təkəniy taa micin səna foɗ tik, ko hid ngayi awana kopok kwəh kwəh, dəwəniy ɓəw liɓiy ngə kopok tan səna həriya tutu. Taniy ɗaw kə jəkiy drif vuɗu avə pic aa nəpiy ɗahkwən. A njə kə luwta:
‹‹Bayzlav Məmar hidi, məmar gədan cike wayza, sin kweɗek, kweɗek, kweɗek!
Dəga a ndən talan mahayək gesin bəgwən, sin ɗaha, am pic tapicah sin ɗaha, sin av kə yah.››
9 Asəna acin, təkəniy maa foɗ taa micin a njə kə vəliy mordoy, a njə kə ɗiyiy səban ɓəw a njə luwenta soko a hid mə ɗew ɗew təm lay ɗew ngə bay. Hid səna av kə ɗeweytik avə micin ko apu. 10 Mandal təkəniy foɗ taa micin aa jəkiy drif səna, mogroy maa ngərsaray avə foɗ ɗaw kə gbilihiy titimbiz akibik hid mə ɗew ɗew təm lay ɗew ngə bay, taniy ɗaw kə dosiy muzəroh a kayək akibik hid məv kə ɗeweytik avə micin ko apu, za ɗaw kə cokiy fafaliy tan ngə bay kaɗ, kə fəkta a kayək akibik lay ɗew ngə bay, mandal taniy aa fəkta a kayək səna, a njə kə luwta: 11 ‹‹Bayzlav Məmar yikwan,
hoh acin maa gəga hidiy kə vəliy mordoy, kə vəliy zay ɓəw kə sənta hoh acin məmar gədan,
kadaban hoh acin mə ndən təkeniy cike wayza.
Hoh acin mə may kə ndənta,
za taniy a ɗewiy nhi makavay may ngəkoh.››