Ɗerewel a Mgbəw ngə mə səbiy Yesu tə liɓde Sardis
3
Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Sardis. Hoh kə luwenni: ‹‹Hid mə kaw Mbiɗiy ngə Bayzlav cisaray ɓəw njə cuzlerekiy cisaray am ngəra, a luw: ‹Kata sən təkən hin ta njə kə ɗiyta cike wayza. Kat mə sən za, hidiy a ɓənta hin mawana avə micin, aska hin mə məcah za. 2 Mə fəɗah! Mə ɗew avə variya asənkwən hin məv kə məc mindiwin tik. Kat tu luw anhi, kadaban kat saf kəzəɗiy hin taa ɗiyta ɗahiy cike kweɗek kweɗek akibik Bayzlav kwən. 3 Kadaban səna acin, mə ɓən hoyhoy atalan zləgam ngə Bayzlav hin mə zlim taməcek ɓəw mana aceki hin mə yək tik. Mə geɗ ɗiy mə ngavngav kaɗ, za mə səb zləgam səna. Mana hin mə fəɗah bəgwən wər, təv kə vay kə janehin məndumndum mana məhəl. Mandal səna, hin mə sən pic tik kwən.4 ‹‹Amma hidiy məpərmay ɗahiy adab kin tə liɓde Sardis nhi, a dəbəziy ləkwət tan bəgwən. Ngatan wər, tu kwəliy ləkwət maa baran, tu hosiy gəga yikwan kə tal avə taniy witik witik. 5 Asəna acin, hidiy mə dayiy gədan ngə mə ngavngav, taniy acin tu kwəliy ləkwət maa baran səna. Tə vəvay zlim ngatan mə ɗəɗef ɗəɗef tə liɓ deftere ngə zlimiy ngə hidiy mə janiy məcin mətak way kaɗ kwən. Təv kə ceɗ akibik Vay Bayzlav ɓəw akibik Mbaslayiy ngetik, hidiy nhi, hidiy ngaɗa.
6 ‹‹Hid məmar zlimi, mə zlim təkən Mbiɗ ngə Bayzlav taa ceɗen a Mgbəwiy ngə hidiy mə səbiy Yesu!››
Ɗerewel a Mgbəw ngə mə səbiy Yesu tə liɓde Fladelfiya
7 Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Fladelfiya. A luwenni: ‹‹Hid njə ɗew maa kweɗek, mə njə kə ceɗ mindiwin, mə kawa lekile ngə zlər mijijik ngə bay Dawda angər tik. Sin tu zlər mijijik, hid ngə ɓəs kə pek tik ɗahkwən. Za sin tu pek mijijik, hid ngə ɓəs kə zlər tik ɗahkwən təm. A luw: 8 Kata sən təkəniy hin ta njə kə ɗiyta wayza. Kat mə sən za, gədan kin gəɗak, ko asəna hin maa səb zləgam ngaɗa, hin mə buwak dəwən bəgwən. Asəna acin, kat mə zlər mijijik kaɗ akibik kin, hid ngə ɓəs kə pek tik ɗahkwən. 9 Mə zlimu, təv kə ceɗehin təkən kat tu kə ɗiyen a hidiy mə səbiy mozlokotuf ngə Bay musuruf. Hidiy səna a njə kə luwta taniy Yahudigi, zəmaa taniy Yahudiy kwən, a ngawiy ma. Təv kə ngazlata a gədan kə gbiliy titimbiz akibik kin. Av kə sənta acin, taa mayehin. 10 Amma ngəkin, hin tu zlim ma ngaɗa, hin tu səsak. Kadaban səna, təv kə puwehin lawlaw am mandal takwan tu kə hosoh atalan hidiy təm talan mahayək cike wayza, kə sla nəv ngatan. 11 Kat wər, kat mbeh kə jəɓay. Mə səb a ɗiy kəzəɗ malaw, mətak buw kəv dəwən, asəna acin hidiy məpərmay a mohiy gədmazlən kin kwən. 12 Hidiy mə dayiy gədan ngə mə ngavngav, təv kə vərəkta taniy kə ɗewiy wa ndun pay mə kaw jik Bayzlav ɗa, taniy kə ɗewiy tan abəgo ko apu. Təv kə ɗəɗef zlim ngə Bayzlav ngaɗa ɓəw zlim liɓde ngetik a kəsəm tan. Liɓde səna acin Ursalima ndawyan, Bayzlav tu kə suroh kaɗ aa dibizlav za. Təv kə ɗəɗef zlim ngaɗ ndawyan a kəsəm tan təm.
13 ‹‹Hid məmar zlimi, mə zlim təkən Mbiɗ ngə Bayzlav taa ceɗen a Mgbəwiy ngə hidiy mə səbiy Yesu!››
Ɗerewel a Mgbəw ngə mə səbiy Yesu tə liɓde Lawdikiya
14 Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Lawdikiya. A luwenni: ‹‹Hid maa zlim tik Amina, sin acin məsiber malaw mə njə kə ceɗ mindiwin. Bayzlav a ndən təkəniy cike avə hid səna. A luw: 15 ‹‹Kata sən təkən hin ta njə kə ɗiy tik cike wayza. Kat mə sən za, hin wa yəm maa lilen kwən, za wa yəm ma kwak kwən təm. Geleɓ mə ɗew wa yəm maa ləlen asənkwən wa yəm maa kwak. 16 Amma makavay ɗew kin mə ɗiy nəmnəmnəm, hin mə mbaɗ wa yəm maa lilen asənkwən wa yəm maa kwak bəgwən səna, təv kə vənehin aa kəm ɗa za. 17 Ngəkin, hin mə njə kə luw: Yikwan hidiy mə njənjigi, za təkən mə ndak yikwan ɗahkwən, yikwan maa mar təkəniy cike wayza. Zəmaa, hin mawan am takwan, bək kaymah a hidi, hin matakwanigi, hin maa tal kəsəm asəna, za hin hulufiy təm. Hin mə sən hin wa səna bəgwən. 18 Asəna acin, kata ngəzehin, geleɓ mə yah səkəm melenge mə vicvic ta kuhu angər ɗa, za hin məv kə ɗew kə hidiy mə njənjiy mindiwin tik. Mə səkəm ləkwətiy maa baran təm, kə jan hin kə dəp kəsəm kin, za acin hin mə tal kəsəm asəna ɗaba, za weli təm a ɗiyehin ɗaba. Mə səkəm mandərəc ngə həriya, hin kə zek tik am həriya kin təm, kə jan hin kə lim lay kweɗek kweɗek. 19 Hidiy kat mə mayta wər, kat tə njə kə ndəlta, za tə njə kə ngəzta. Asəna acin, mə cəngəra akibik ɗa, za hin kə səb mozlokotuf ɗa avə nəv takan. 20 Ta ceɗehin, kat mə garah kaɗ a bərmidigiɗ, za ta ɗefma aa hidiy tə de. Mana hid tu zlim wəl ngaɗa, za tu zləwəla, təv kə pət ade tik, yikwan kə zəm gəda witik witik avə sin.
21 ‹‹Hidiy mə dayiy gədan ngə mə ngavngav, təv kə vərəkta kə bay a jagwar ɗa, yikwan kə zəm bay witik witik avə tanigi, mana kat təm kat mə day gədan ngə mə ngavngav, za kata awan a jagwar Vay Bayzlav. Yikwan maa zəm bay witik witik avə sin.
22 ‹‹Hid məmar zlimi, mə zlim təkən Mbiɗ ngə Bayzlav ta ceɗen a Mgbəwiy ngə hidiy mə səbiy Yesu!››