Ɗerewel a Mgbəw ngə mə səbiy Yesu tə liɓde Efesus
2
Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Efesus. Hoh kə luwenni: ‹Hid mə kaw cuzlerekiy cisaray am ngərzəm ngetik, za ta tal adab təkəniy cisaray mə ɓəslta a melenge ngə vərək pətərligi, sin a luw: 2 Kata sən təkəniy hin ta njə kə ɗiyta wayza. Kata sən takwaniy hin taa sətik am ɗiy kəzəɗiy ɗa, za hin ɗaw kə ɓəs am takwaniy səna. Kat mə sən za, hin kwəl kə musuf kə ɗew a hidiy mə ngavngav kwən. Hidiy mə njə kə ngawiy ma kə luw taniy mə zlənzləniy ngə Yesu Kristu, hin tu kwəsal ɗew ngatan, za hin tu səntik taniy a ngawiy ma. 3 Hin tu sa takwan makavay ɗa, za hin mə buwak dəwən bəgwən, hin tu musuf am takwan səna.4 Amma təkən nəv ngaɗ ta bas avə hin wər ɗaha, hin maa mayak mana ngə tizin ɗahɗaba. 5 Mə ɓən mək, am diw tik, ɗew ngəkin lawlaw. Amma tanjinhi, hin tu jəɓ aadəwən. Mə buw ngar kaɗ acin, za hin kə ɗew ɗew mana ngə tizin. Mana hin mə buw ngar kaɗ bəgwən, təv kə vay kə ɓiy təkən ngə vərək cəbelbel kin kaɗ aa mə lay tik za. 6 Amma təkən məpərmay ɗaha, kat taa həmehin makavay tik. Hin tu zel təkəniy hidiy Nikwalayiy taa njə kə ɗiyta wa kat mə zel tik təm.
7 ‹‹Hid məmar zlimi, mə zlim təkən Mbiɗ ngə Bayzlav taa ceɗen a Mgbəwiy ngə hidiy mə səbiy Yesu! Hidiy mə dayiy gədan ngə mə ngavngav, təv kə vəlenta mə mbuwmbuw ngə payiy ngə vəl micin mətak way təm tuz pay ngə Bayzlav, taniy kə hamta.› ››
Ɗerewel a Mgbəw ngə mə səbiy Yesu tə liɓde Səmərna
8 Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Səmərna. Hoh kə luwenni: ‹Hid maa tizin ngə təkənigi, ɓəw way ngə təkənigi. Hid səna a məc zaba, za Bayzlav mbəlah kaɗ a mə məc za. Hid səna a luw: 9 Kata sən takwan kin, za kat mə sən sanha kin wayza. Amma a ngərɗa wər, hin mə njənjigi. Kata sən micicewiy hidiy məpərmay ta njə kə camehin wayza. Za taniy a njə luwta taniy Yahudigi. Amma a ɗiyiy polkoy, taniy mgbəw ngə hidiy ngə Bay musuruf.
10 Hin mə gər kə hovok avə takwan hin tu kə sətik kwən. Mə zlimu, Bay musuruf av kə fək hidiy məpərmay tə dab kin am jik jaw, kə sla nəv ngatan. Hin məv kə sa takwan hos am wan gəɓ. Ya hin kə musuf am səb mozlokotuf ngaɗa, ko a sla ngə məc, hin kə məc. Mana hin tu ɓəs atəgo wər, təv kə vəlehin gədmazlən ngəkin, gədmazlən səna micin mətak way.
11 ‹‹Hid məmar zlimi, mə zlim təkən Mbiɗ ngə Bayzlav ta ceɗen a Mgbəw ngə hidiy mə səbiy Yesu! Hidiy məv kə dayiy gədan ngə mə ngavngav, a məciy məc mə saray tik kwən.› ››
Ɗerewel a Mgbəw ngə mə səbiy Yesu tə liɓde Pergame
12 Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Pergame. Hoh kə luwenni: ‹Hid məmar masalam mordoy mə zəm zəm gozlum səsaray tik, a luw: 13 Kata sən lay hin mə ɗew wayza, Bay musuruf aa zəm bay tik aliɓde kin, amma hin mə buwak dəwən ɓahbəgwən, hin maa səbakku hoyhoy. A wəzliy Antipas hid mə ceɗ mindiwin atalan ɗa aliɓde kin, am lay Bay musuruf mə ɗew təbəgo səna. Ko am mandal mə wəzlta səna, hin mə geɗ səb mozlokotuf ngaɗ kaɗ bəgwən, hin maa səbak dap.
14 ‹‹Amma təkəniy məpərmay nəv ngaɗa ta basak avə hin wər ɗaha, təkəniy səna acin, hidiy məpərmay tə dab kin, a njə kə səbiy jəgwan ngə Balama mə jəgwanen a Balak. Sin tu luwen a Balakª kə lebeɗ Israyiliy kə ɗiyiy mə ngavngav avə zəm vəren hidiy təm zugwa, ɓəw avə ɗiy vərndewª. 15 Wa səna, hidiy məpərmay adab kin a njə kə səbiy təkəniy Nikwalayiy ta njə kə jəgwanenta a hidigi. 16 Mə buw ngar kaɗ acin! Asənkwən təv kə vay mbehmbeh nhi kə ɗiy jəgəm avə hidiy səna avə masalam taa pətah a kəma ɗa za.
17 ‹‹Hid məmar zlimi, mə zlim təkən Mbiɗ ngə Bayzlav ta ceɗen a Mgbəw ngə hidiy mə səbiy Yesu! Hidiy məv kə dayiy gədan ngə mə ngavngav, təv kə vələnta təkən ngə zəm mə ɓahɓah tə dibizlav zlim tik manu. Za təv kə vələnta cəcəm maa kweɗek. A talan cəcəm səna, zlim ndawyan mə ɗəɗefe kaɗ akimin. Za hid mə sən zlim səna ɗahkwən. Səna hid Bayzlav mə vəlen cəcəm səna agendik.› ››
Ɗerewel a Mgbəw ngə mə səbiy Yesu tə liɓde Tiyatira
18 Gawal səna ɗiya luwakku: ‹‹A ɗəɗefen ɗerewel a mbaslay ngə Bayzlav mə njə kə puw hidiy təm Mgbəw ngə mə səbiy Yesu tə liɓde Tiyatira. Hoh kə luwenni: ‹Kər Bayzlav, həriya ngetik taa zləzlaɗ mana gana kuhu, za ngaziy tik aa lir wa masa maa pren, a luw: 19 Kat mə sən təkəniy hin ta njə kə ɗiy tik cike wayza. Kata sənu, hin mawana avə may, za hin maa vəlak nəv kin hoyhoy. Hin ɗaw kə mən kəsəm kin. Za hin mə njə kə ɓəs am takwaniy səna. Za ngar ngəkin malaw maa tanjinhi, day kə tamicek.
20 Amma təkəniy nəv ngaɗa taa bas avə hin wər ɗaha. Təkəniy səna acin, hin geɗen mozlokotuf a Zezabel wer sənan tə dab kin kə ɗiy təkən mə ngavngav. Sin a njə kə luw: ‹‹Kat mokotuf ngə Bayzlav.›› A njə kə ɗiyen jəgwan mə ngavngav a hidiy ɗa. Avə jəgwan ngetik səna, sin a njə kə lebeɗ hidiy kə ɗiyiy vərndew, za kə zəmiy vəren təm zugwa. 21 Kat geɗen lay kə jan sin kə buw ngar, amma sin aa may kə buw ngar a geɗ ɗiy vərndew kaɗ kwən. 22 Makavay səna, təv kə vəlen məc maa tuwah kə ɗiy sin kə vah nanha am lay wan ngetik. Za hidiy mə ɗiyiy vərndew avə sin, av kə zləniy takwan day day təm. Amma mana taniy tu buwiy ngar kaɗ, za tu geɗiy kəzəɗ ngatan mə ngavngav kaɗ, kat tə ɗiyenta atəgo kwən. 23 Za wəriy tik, təv kə wəzlta kaɗ təm. Təv kə ɗiy atəgo, kə jan hidiy təm mgbəwiy ngə mə səbiy Yesu kə sənta, kata acin hid mə sən ɓən ɓəw tamah təm nəv ngə hidiy cike wayza. Təv kə vəl gədmazlən ko a yi gəga ngə kəzəɗ tik.
24 ‹‹Amma, hin hidiy mə fəs tik təm Mgbəw ngə mə səbiy Yesu tə liɓde Tiyatira, mə yək jəgwan mə ngavngav ngə wer səna bəgwən, za kəzəɗ hidiy ta njə kə luwta kəzəɗ mə ɓahɓah ngə Bay musuruf səna, hin mə jəgwan səka bəgwən. Ngəkin acin, tə vəlehin təkən məpərmay məv kə dangarehin kwən. 25 Amma mə səb avə ɗiy kəzəɗ malaw, mətak buw kəv dəwən hos am pic kat tu kə jəɓay.
26 ‹‹Hidiy məv kə dayiy gədan ngə mə ngavngav, za məv kə ɗiyiy kəzəɗ ngaɗa hos am waytik, təv kə vərəkta kə zəmiy bay atalan hidiy par par təm talan mahayək cike wayza. 27 Taniy av kə zəmiy bay atalan hidigi avə gədan, av kə brazlta wa hid taa nder siwili ɓuzu.ª 28 Kat təv kə vəlenta gədan səna mana bahbay mə vəlak təm. Kat təv kə vəlenta batay ngə zlalay təm.
29 ‹‹Hid məmar zlimi, mə zlim təkən Mbiɗ ngə Bayzlav taa ceɗen a Mgbəw ngə hidiy mə səbiy Yesu!››