Təkəniy ma par par,
Yuhana
mə limu
Diw zləgam təm deftere nhi
1
Deftere nhi a zləgam atalan təkən mə ɓahɓah, Bayzlav mə luwen a Yesu Kristu kə pətah am lay maa mgban. A luwen sin kə pətah təkən səna a hidiy mə ɗiyiy kəzəɗ ngetik, kə jan taniy kə səniy təkən məv kə hosohoh njoɗ. Asəna acin, Yesu Kristu zlən Mbaslay ngə Bayzlav angər Yuhana mə njə kə ɗiy kəzəɗ ngetik, kə ɗefen təkəniy mə ɓahɓah səna cike wayza. 2 Yuhana ɗiya ceɗ təkəniy sin mə lim səna cike a hidigi. Ɗiya luw: ‹‹Zləgam kat mə ceɗehin nhi, zləgam ngə Bayzlav mindiwin, za Yesu Kristu atalan tik aa sən zləgam səna.›› 3 Ya hid məv kə jangi deftere səna, nəv ngetik mə ɗew avə zəzay. Za hidiy mə zlimiy zləgam mə yah taangər Bayzlav za, za a ɗiyiy mana deftere səna mə luwu, nəv ngatan mə zəzay təm. Kadaban pic ngə ɗiy təkəniy səna mbeh kə hos.Yuhana ɗen mbeli a mə səbiy Yesu tə liɓdiy maa parpar cisaray
4 Kat Yuhana, ta ɗəɗefehin ɗerewel nhi, a hin hidiy təm Mgbəw ngə mə səbiy Yesu tə liɓdiy par par cisaray təm hayək Asiya. Bayzlav mə safehin marɓən, za mə vəlehin zoy. Sin ɗaha dəga a ndən talan mahayək gesin bəgwən, hos apicah sin ɗaha, za av kə yah. Mbiɗiy ngə Bayzlav maa par par cisaray tə kibik lay ɗew ngetik, mə safehin marɓən, za mə vəlehin zoy. 5 Yesu Kristu təm mə safehin marɓən, za mə vəlehin zoy. Sin acin hid maa tiɗtiɗe mə njə kə ceɗ mindiwin, ɓəw hid mə diw kə mbəlahah aa mə məc za. Sin acin mordoy ngə bayiy cike təm talan mahayək.
Yesu Kristu a may yikwan, sin goh mə ngavngav ngiykwan avə ɓiɓiz ngetik mə kwar am pay maa zləngrak. 6 Za tu mbaɗ yikwan kə hidiy ngə bay ngetik, za vərək yikwan təm kə masayiy mə ɗiyiy kəzəɗ ngə Bahbay tik Bayzlav. Asəna acin, say hidiy kə səniy gədan mordoy ngə Yesu Kristu, za kə səbanta ko apu. Amina!
7 Mə zlimu, Yesu Kristu aa yah aaliɓ gazlavay za, ko hid ngayi av kə lim tik. Ko hidiy mə ngaɓta avə njervek taməcek av kə limta təm. Za səban hidiy maa par par təm talan mahayək cike wayza av kə haniy avə teweɗ makavay Yesu. Mindiwin, təkəniy səna av kə ɗiy kpekpe. Amina!
8 Bayzlav Məmar hidi a luw: ‹‹Kata acin Alfa ɓəw Omegaª.›› Sin acin məmar gədan day kə təkəniy cike wayza. Sin ɗaha dəga a ndən talan mahayək gesin bəgwən, hos apicah sin ɗaha, za av kə yah.
Yuhana lim Yesu wa a sisin
9 Kat galmay kin Yuhana. Kata avə hin yikwan mə lapa za avə Yesu Kristu. Taa sa takwan mana hin, za taa ɓəs am takwan mana hin təm. Yikwan cike, yikwan mawan adab hidiy Bayzlav məmarta. Hidiy tu kawakta, za tepekta am lay jaw təm hayək məpərmay maa mgbaw avə yəm, zlim tik Patmos. A kawakta makavay kat mə ceɗ ləbar ngə Bayzlav a hidigi, kat mə luwenta, Yesu acin mə njə kə ɗef mozlokotuf malaw a hidigi.
10 Pic takan, pic hidiy taa səbaniy Bayzlav, Mbiɗ ngə Bayzlav pət a kəsəm ɗa. Kat zlim hid a zləgam aadəwən ɗa day day, mana ləv ngə falam. 11 Wəl ngə hid səna aa luwakku: ‹‹A ɗəɗef təkən hoh taa lim nhi am ɗerewel, za ma ɓiy ɗerewel səna ma zlənen a hidiy təm Mgbəw ngə mə səbiy Yesu tə liɓdiy maa par par cisaray. Liɓdiy səna acin: Efesus, Səmərna, Pergame, Tiyatira, Sardis, Filadelfiya, ɓəw a liɓde Lawdikiya.››
12 Kat maa zlim atəgo za acin, kat ɗiya buw kə saf hid mə zləgamak səna. Zəni kat lim təkəniy ta njə kə vərəkiy pətərliy akimin cisaray mə ɓəslta avə melenge. 13 Adabdaba təkəniy ngə vərək pətərliy səna, kat lim təkən məpərmay wa hidi, mə gara kaɗ a ləkwət a kəsəm. Ləkwət səna cip nha dup dəwən ngaz, sin jaw maslapa mə ɗiyta taa melenge am gan. 14 Suson talan tik baran baran, tewtew, wa gəgəmay. Həriya ngetik aa zləzlaɗ wa gana kuhu. 15 Ngaziy tik təm aa liriy wa mas maa pren mə ɗəz ɗəz, gbiz, avə kuhu. Kat zlim wəl tik aa ləv a gədan wa yəm ta jur a talagwənigi. 16 Sin mə kawa cuzlerekiy cisaray am ngərzəm ngetik. Kat lim masalam mordoy mə zəm zəm gozlum saray tik aa pətah aa kəm tik za. Məzuroh tik aa lir wa pic ta zləzlaɗ ngə dab dab pic.
17 Kat maa lim za acin, kat ndəv, kup, akibik tik wa hid mə məc məc. Sin ɗiy ngərzəm ngetik atalan ɗa, za ɗiya luwakku: ‹‹Hoh hovok kwən, kata acin diw ngə təkən ɓəw waytik. 18 Kat awana micin. Kat tə məc zaba, amma tanjinhi kat mə mbəlah ɗa za, təv kə ɗew avə micin ko apu. Gədan ngaɗ day ngə məc, za day ngə lay ɗew ngə hidiy mə məcməcigi. 19 Taa luwoh acin, a ɗəɗef təkəniy hoh mə limta nhi kaɗ, təkəniy hoh taa limta maa tanjinhi, ɓəw təkəniy məv kə hosoh akibik. 20 A zlimu, təv kə ceɗeh ma mə ɓahɓah atalan cuzlerekiy cisaray, hoh mə lim am ngərzəm ngaɗ səna, ɓəw atalan təkəniy cisaray, mə ɓəslta a melenge kə vərək pətərliy səna. Cuzlerekiy cisaray səna acin mbaslayiy ngə Bayzlav mə njə kə puwiy hidiy təm Mgbəw ngə mə səbiy Yesu tə liɓdiy maa par par cisaray. Za təkəniy cisaray mə ɓəslta a melenge ngə vərək pətərliy səna acin Mgbəw ngə mə səbiy Yesu tə liɓdiy maa par par cisaray.››