Təkəniy ma par par,
Yuhana
mə limu
Pət am deftere nhi
Yuhana, kər gawla ngə Yesu acin mə ɗəɗef deftere nhi. A ɗəɗef makavay Yesu mə ɗefen təkəniy ma par par səna za luwen sin kə ɗəɗef kaɗ. Tu ɗəɗef kaɗ makavay sin mə sən za, Hidiy Eklesiya təm hayək par par tu zləniy banay day day, za tu may kə vələntə ɓəs.
Hidiy par par dolom tu mbəlamiy kə səniy madaba ma səna atalan təkəniy ma par par, Yuhana mə nəf am deftere nhi, mana məkərən ma wəzec mana təkən tə donu məmar talan cisaray. Hidiy məpərmay a luwta təkən talan cisaray səna acin bayigi. Ɗiya luwta bah, təkən Yuhana mə zləgam atalan tik am deftere nhi tu ɗiy atəgo , Hidiy məpərmay a luwta təkən səna a wəlen a ɗiy zayya takan takan hos am way talan mahayək. Amma hidi mə sən tik lawlaw ɗahkwən .
Mana deftere nhi mə wəzac avə səb tik avə səb tik:
Yuhana a ɗəɗef mana Yesu mə ɗew a dab Hidiy Eklesiya, za mana sin mə ngəz Hidiy Eklesiya səna (mə saf am mo groy tik 1-3).
A ɗəɗef atalan banay par par, hidiy tu kə sa ta, za ɗəfentə mana banay cike a yah angər Bayzlav za. Təkəniy sən cike a yiy angər tik za. Yuhana a ceɗi yikwan mana təkən mə ɗiy am talan mahayək nhi cike a ɗiy kpe kpe mana Bayzlav mə slu a dibizlav. A zləgam atalan tubu cisaray mə sləraɓ sləraɓ təm mə ngə deftere məpərmay, za mana banay mə ya mandal Yesu mə hok tubu səna acin. A zləgam atalan məzlənzləniy ngə Bayzlav cisaray mə mbizi falam za banay məpərmay kə diw kə ya bah. Za a zləgam atalan Hidiy cisaray məpərmay njə zikzik təm ngəra za a dahi banay məpərmay bah. Yuhana ɗiya luw bah, banay sən cike, hidiy av kə sa ta kadaban Bayzlav a may kə ngəz Hidiy təm talan mahayək kə yəki mə ngetik, za a may kə ngəz Hidiy tik kə jəgwaniy ɓəs am banay səna (mo groy tik 4-16).
Təkən mordoy, Yuhana ta ceɗi yikwan am deftere nhi acin Bayzlav a mar gədan day kə təkəniy cike wayza. A ngər Yesu Kristu za sin tu day gədan ngə mosumiy tik par par cike, tu zla dalgway ngatan. Ko a picah təkəniy mə ngavngav par par ɗaha baha, pic takan av kə way, za Bayzlav tu sla pic tik kaɗ (mo groy tik 17-20).
Yuhana a way deftere tik avə ləbar atalan dibizlav ndawyan avə talan mahayək ndawyan, Hidiy Kristu tu kə ɗewiy akimin (mogroy tik 21 avə 22).