Ɗerewel ngə
Yahuda
Yahuda aa ɗen mbeli a mə səbiy Yesu
1
Kat Yahuda, kat mə ɗəɗef ɗerewel nhi, kat hid mə ɗiy kəzəɗ ngə Yesu Kristu ɓəw kat galmən ngə Yakuba. Kat tə ɗəɗefen a hidiy Vay Bayzlav mə ɗefentəma kə ɗewiy kə hidiy ngetik. Sin a mayta, za a ndelekta kə puwiy Yesu Kristu. 2 Bayzlav mə saf kaymah ngəkin, mə vəle hin zoy, za mə ɗiy hin kə may kəsəm. Sin kə ɗiye hin təkəniy səna cike day day.Bayzlav av kə zlen dalgway a mə jəgwanenta polkoy a hidigi!
( 2 Pi 2.1-17)
3 Ngwalayiyɗa kat taa mayta, kat tə may kə ɗəɗefeh hin ɗerewel atalan mana aceki Bayzlav mə mbəl yikwan. Amma tanjinhi, tak wəla kat kə ɗəɗef tik, kə jan kə vəle hin gədan hin kə jəgəm kə kaw zləgam ngə Bayzlav hin mə yəku am nəv kin. Zləgam səna Bayzlav acin mə vəlen maa nwa a hidiy ngetik. 4 Kat tə luw anhi, kadaban hidiy mə ngavngav sənan mə pətiy mə ɓahɓah a dab kin. Hidiy səna a njə kə ngaviy zləgam tə talan mana aceki Bayzlav mə saf kaymah ngiykwan kə jan taniy kə janiy mozlokotuf ngə ɗiy mə ngavngav taniy mə mayta. Taniy ɗaw kə ɓoniy Məmar Yikwan ɓəw mordoy ngiykwan maa takan Yesu Kristu. Mə ɗəɗefeh kaɗ am Deftere ngə Bayzlav amicek, dalgway av kə yah atalan hidiy səna.
5 Təkəniy kat tu kə ceɗehincike wayza, hin maa sənta law law. Amma, kata may kə slekeh hin talan anhi: Bayzlav Məmar Hidi mbəl hidiy ngetik aa mə hayək Misra za. Adəwən səna, sin wəzl hidiy mə ɓoniy kə vəliy nəv ngatan a sin. 6 Mə ɓən atalan mbaslayiy ngə Bayzlav məpərmay. Taniy jərəviy zay Bayzlav mə vəlenta, jeliy tan a mə lay Bayzlav mə vərəkta za. Kadaban səna acin, Bayzlav jawta kaɗ nwa am jik jaw am lay maa kpizlik kə puw pic ngə zla dalgway mordoy. 7 Mə ɓən atalan hidiy tə liɓde Sodoma ɓəw tə liɓde Gomora, ɓəw atalan hidiy tə liɓdiy maa mbeh mbeh aa tanigi. A ɗiyiy mə ngavngav təm mana mbaslayiy ngə Bayzlav səna. Hidiy səna ɗaw kə ɗiyiy gugoɓ, za ɗaw kə ɗiyiy vərndew hos am kə waniy avə mbaslayiyª ngə Bayzlav. Tanjinhi Bayzlav fiyta am kuhu maa away ɗahkwən makavay dalgway ngatan, kə jan kə vəlen bərngəzl a hidigi.
8 Hidiy mə ngavngav sənan mə pətiy mə ɓahɓah a dab kin səna, ɗaw kə ɗiyiy mə ngavngav mana tanigi. Taniy ɗaw kə ɓəniy ɓən mə ngavngav. Taniy ɗaw kə səbiy tamah təm nəv ngatan. Taniy ɗaw kə jərəviy gədan ngə Bayzlav, ɗaw kə riy mbaslayiy ngə Bayzlav məmariy gədan mordoy. 9 Za ko mordoy ngə mbaslayiy Bayzlav cike, zlim tik Mikaylu a ɗiy atəgo bugwən. Amicek, sin tu ngəway avə Bay Musuruf atalan mimci ngə Musa. Mandal taa ngəwayiy səna, Mikaylu a ra Bay Musuruf bugwən. Amma sin a luwen dap: ‹‹Bayzlav Məmar Hidi mə zla dalgway koh! ››
10 Amma hidiy mə pətiy mə ɓahɓah a dab kin səna, a njə kə riy təkən maa taniy aa sənta ɗahkwən. Ko bərngəzl talan ngatan gwedek ɗahkwən. Ɗaw kə ɗiyiy təkəniy mə yenta am talan dap, bərngəzl tan wa ngə huvigi. Taniy mə njə kə ɗiyta atəgo , a njə kə dah dalgway atalan tan. 11 Haya gawla! Hidiy nhi av kə siy takwan! Taniy a səbiy ngar ngə Kaynu. A ɗiyiy polkoy kə jan suloy mana Balama mə ɗiy tik. Taniy məcigi lay mə zeliy ma ngə Bayzlav mana Koraª. 12 Mandal hin maa lap mana galmayigi kə zəm gəda, taniy acin mə njə kə ngaviy lap ngəkin. A ɗiyiy weli ɗahkwən, a njə kə juwayiy ngə gadablak tan dap. Taniy wa gazlavay mbiɗ mə njə kə tal tik, titititit, zəni a za ɗahkwən. Taniy wa pay maa ko tər ngə mbuw tu hos, a mbuw ɗahkwən. Wa pay mə cof cof, za mə məca wayza. 13 Hidiy səna, wa yəm mə njə kə kəz a gədan a maza. Mə ngavngav ngatan taniy ta njə kə ɗiyta wa monguf yəm mə tep tik a gədan a gozlum maza. Taniy wa cuzlerekiy mə njə kə siy volor. Hidiy mana nhi, Bayzlav mə sləsləɓ lay ɗew ngatan kaɗ am kpizlik kə ɗewiy abəgo ko a pu.
14 Aməcek Anuhu, dehen ngə Adamu mə cisaray tik tu zləgam atalan hidiy nhi. Sin a luw: ‹‹Mə zlimu! Bayzlav Məmar Hidi av kə yah avə mbaslayiy tik dolom day day. 15 Av kə yah kə zla dalgway ngə hidiy cike wayza, za kə zlənen takwan a hidiy cike mə ɗiyiy mə ngavngav. Av kə zlənenta takwan makavay məcicew taniy mə rəta ɓəw makavay taniy mə gəliy talan tan.›› 16 Hidiy səna nəv ngatan a fet ɗahkwən, ɗaw kə jəgwaniy ma hoy hoy, ɗaw kə ɗiyta mana nəv ngatan taa mayu, a njə kə zləgamiy zləgam ngə kaf kocofron, a njə kə jəkiy hidiy a ma maa kukuɗ kə janiy təkən angər tan.
Yahuda aa vəlen gədan a hidiy mə səbiy Yesu
17 Amma ngəkin ngwalayɗigi kat taa mayta, mə ɓən atalan zləgam məzlənzləniy ngə Məmar yikwan Yesu Kristu mə ceɗeh hin tamicek. 18 Taniy a luwe hin: ‹‹Mandal talan mahayək mbeh kə way, hidiy av kə yigi, av kə mbisi hin. Hidiy səna av kə ɗiyiy mana nəv ngatan taa mayu, a səniy Bayzlav kwən. ›› 19 Hidiy səna acin ta njə kə pətariy hidiy ngə Kristu. A njə kə ɓəniy təkən təm talan mahayək a gendik. Mbiɗ ngə Bayzlav ɗah am nəv ngatan kwən.
20 Amma ngəkin ngwalayɗiy kat taa mayta, mə mbəlam avə gədan kin cike kə mən kəsəm kin, kə jan hin kə ɗew gbingbin am zləgam hin mə yəku, Bayzlav atalan tik acin mə vəle hin zləgam səna. Mə tar hoyhoy avə gədan ngə Mbiɗ ngə Bayzlav. 21 Mandal hin maa puw məmar yikwan Yesu Kristu tu kə jəɓaha kə saf kaymah ngiykwan, za kə vəli yikwan micin mətak way, mə ɗiy təkən kə jan Bayzlav kə maye hin hoyhoy.
22 Mə saf kaymah ngə hidiy mə njə kə wəzəniy am mindiwin taa jəgwanenta atalan Bayzlav. 23 Hidiy sənan aa viy am kuhu, mə lereta kaɗ a mə kuhu səna za. Hidiy sənan təm, hin kə saf kaymah ngatan, amma mə kaw talan kin law law kə jan taa kə boniy hin a mə zləgam Bayzlav za. Hin mə gər kə lap avə hidiy səna kwən, ko ləkwət ngatan awaniy avə liya ngə kəzəɗ ngatan mə ngavngav, mə gər kə mbəlem kwən.
Səban a Bayzlav
24 Nəmkwan kə səban Bayzlav, sin acin məmar gədan ngə puwe hin kə jan taa hin kə ndəv. Sin kwəl kə tepe hin a kibik tik am lay maa kəkay, hin hidiy mətak mə ngavngav, hidiy njə zəzay. 25 Hidiy cike kə səbaniy Bayzlav, za mə vəlenta mordoy a sin a gendik palpal. Sin acin mə mbəli yikwan avə Məmar yikwan Yesu Kristu. Sin acin məmar mordoy, ɓəw məmar gədan, za məmar lay dəga aməcek kula a picah, za ko a pu. Amina.