Ɗerewel,
Yakuba
mə ɗəɗefu
Pət am ɗerewel nhi
Yakuba mə ɗəɗef Deftere nhi, hidiy a luwta sin acin galmən ngə Yesu (Mat 13. 55; Mk 6. 3; Gal 1. 19). Sin təm a luw: ‹‹Kata, mə ɗiy kəzəɗ ngə Bayzlav ɓəw ngə Yesu Kristu Məmar Hidi. ›› Adəwən məc ngə Yesu, Yakuba səna tu ɗew kə hidi mordoy tə dab hidiy ngə Kristu a Ursalima (mə saf am KMY. 15. 13-21 ɓəw am Gal. 2. 9). Mandal sin mə ɗəɗef ɗerewel nhi, hidiy a luwta sin a wan a liɓde Ursalima, za a ɗəɗef kə zlənen a hidiy ngə Bayzlav mə cakway cakway tə talan mahayək cike wayza. Am ɗerewel nhi, Yukuba aa ngəz yikwan atalan kəzəɗ ma par par hidiy ngə Kristu tu kə ɗiyta am walan tan, za tu kə ɗiyta təm a dab hidiy təm talan mahayək. Mandal sin ta ceɗ a yikwan təkən, a njə kə sla tik a təkəniy təm talan mahayək yikwan mə sən tik, kə jan yikwan kə zlim tik law law. Mana mə sla gana ngiykwan avə lejen ngə pilis ɓəw a kuhu (3. 3, 6) ɓəw mana mə sla ɗew ngiykwan təm talan mahayək avə məsinsineh mə njə kə cakway angaw (4. 14).
Mana ɗerewel nhi mə wəzak a səb tik a səb tik ª
Yukuba a ɗəɗef atalan ɓən malaw Bayzlav ta njə kə vəlen a hidiy mə njə kə geɗiy nəv ngatan cike kaɗ kə tarta (mə saf am mogroy tik 1. 1-8). Za a zləgam atalan matakwan hidi ɓəw hidi mə njənja (mordoy tik 1. 9-11). A ceɗ a yikwan mana aceki Bayzlav a lebeɗ hidi kə ɗiy mə ngavngav ɗahkwən (mordoy tik 1. 12-18), za a luw hidi mə zlim zləgam ngə Bayzlav, say kə ɗiy kəzəɗ ngetik təm (mordoy tik 1. 19-27). A ngəz hidigi kə safiy hidiy cike takan (mogroy tik 2. 1-13). Yukuba a ceɗ a yikwan zləgam malaw ngə kaw. Anhi zləgamiy səna: Hidi mə yək zləgam ngə Bayzlav say kə ɗiy kəzəɗ təm. (mogroy tik 2. 14-26). A zləgam atalan gana ngə hidi (mogroy tik 3. 1-12) ɓəw atalan sən mə yah ta ngər Bayzlav za (mogroy tik 3. 13-18). Am way ɗerewel ngetik, a zləgam atalan kəzəɗ hidiy ngə Kristu tu kə ɗiyta a dab hidiy təm talan mahayək nhi (mogroy tik 4. 1-5: 6), za mana tu kə ɓəsiy kaɗ am takwan ɓəw tu kə tariy Bayzlav (mogroy tik 5. 7-20).