Kəzəɗiy ngə fet nəv ngə Bayzlav
13
Hin hidiy ngə Bayzlav, mə may kəsəm hoyhoy am walan kin. 2 Mə gər kə geɗ yək mbulukiy mə njə kə viy ade kin kwən. Avə yək mbulukiy səna, hidiy sənan yəkiy mbaslayiy ngə Bayzlav ade ngatan, a sənta taniy mbaslayiy ngə Bayzlav ɓahbəgwən. 3 Mə ɓən atalan hidiy təm jik jaw, wa hin təm hin mə jawa kaɗ jənjəna a tanigi. Mə ɓən atalan hidiy mə siy takwan, wa hin maa sə takwan jənjəna a tanigi.4 Hidiy cike mə kawiy zləgam ngə Bayzlav lawlaw atalan ɗew ngə mawəl avə werti mə dəmi kəsəm. Mawəl avə werti tik mə gər kə vəliy kəsəm ngatan acaɗak kwən, kadaban Bayzlav av kə zlen dalgway a hidiy mə njə kə ndəɗiy kəsəm ngatan am gak ɓəw a hidiy mə njə kə ɗiyiy vərndew.
5 Mə gər kə vəl talan am tamah ngə suloy kwən, nəv ngəkin mə zəzay a təkən hin məmar dap, kadaban Bayzlav atalan tik a luw: ‹‹Ko aceki, tə geɗeh kwən, tə buwoh dəwən kwənª.›› 6 Asəna acin, yikwan kwəl kə luw mətak hovok anhi:
‹‹Bayzlav Məmar hidi acin mə mən kata,
tə hovok ko avə təkən ngemi kwən.
Hid ngə ɓəs kə ɗiyak mə ngavngav ɗahkwən.››
7 Mə ɓən atalan talan mbalgamiy kin taməcek mə ceɗehin zləgam ngə Bayzlav. Mə saf mana taniy mə ɗewigi ɓuw mana taniy mə məcigi. Mə vəl nəv kin a Bayzlav mana taniy mə vəliy nəv ngatan a Bayzlav təm. 8 Yesu Kristu wər, aa zlambaɗ ɗahkwən. Dəga amicek, ko tanjinhi za ko apu, daptik. 9 Mə gər kə geɗ hidiy kə lebeɗ hin avə jəgwaniy ngatan maa parpar maa a viy a zləgam ngə Bayzlav ɗahkwən kwən. Taniy ɗaw kə ɗiyiy jəgwan parpar atalan təkəniy ngə zəm kə jan nəv ngə hidmemblen kə mar gədan. Amma mə gər kə yək ma ngatan kwən, kadaban malaw ngə Bayzlav acin ta njə kə vəl gədan am nəv ngə hidi, təkən ngə zəm kwən. Zay ngə jəgwan səna a hidiy mə səbta ɗahkwən.
10 Ngiykwan, yikwan mawana lay ngə vəlen təkən a Bayzlav, za masayiy ngə Yahudiy kwəl kə zəmiy təkən təm lay səna kwən, kadaban taniy wər a njə kə ɗiyiy kəzəɗ am madaba bla ngə Yahudiy dap. 11 Yikwan mə sən za, mordoy ngə masay ngə yahudiy ɗaw kə pət a ɓiɓiz ngə təkən huviy am lay maa kweɗek Bayzlav mə ɗew. Sin ɗaw kə vəlen ɓiɓiz səna a Bayzlav, kə jan Bayzlav kə geɗ mə ngavngav ngə hidiy kaɗ, za vəren ngə təkəniy huvu səna, a njə kə tepta gaf aa liɓde kə kəɗawta kaɗ. 12 Kadaban səna acin, Yesu təm hidiy a wəzlta gaf a Ursalima, kə jan sin kə lereh hidiy kaɗ aa mə mə ngavngav za avə ɓiɓiz ngetik gendik. 13 Asəna acin, nəmkwan kəv kə gbamenni am lay ma gaf aa liɓde səna, kə jan yikwan kə musuf am məcicew hidiy tu kə camiy yikwan mana sin təm mə musuf. 14 Kat tə luw asəna kadaban ɗew ngiykwan maa a way ɗahkwən am talan mahayək nhi ɗahkwən. Yikwan maa puw ɗew təkibik maa a way ɗahkwən ko apu. 15 Nəmkwan kə səban Bayzlav hoyhoy am zlim ngə Yesu, səban səna mə mbaɗa mana təkən huvu yikwan ta njə kə bənenta, mana kə luw kaɗ, yikwan maa səban tik avə zləgam taa pətah aa kəma ngiykwan za. 16 Mə ɗiy malaw hoyhoy a hidigi ɓəw mə mən hidigi avə təkəniy hin məmaru, mə gər kə zlay ɗiy tik kwən, kadaban vəl mana təgo acin taa njə kə fet nəv ngə Bayzlav.
17 Mə zlimenma atalan mbalgamiy kin, za mə daɓenta talan, kadaban taniy a njə kə puwiy hin hoyhoy. Taniy av kə zlawiy ma akibik Bayzlav atalan kəzəɗ taniy mə ɗiyehin. Mana hin tu zlimentəma, taniy av kə ɗiyiy kəzəɗ ngatan avə zəzay. Mana hin mə zlimentəma bəgwən, taniy av kə ɗiyiy kəzəɗ a jəgwanma, za a dahehin ko təkən mgemi kwən.
18 Mə tar Bayzlav hoyhoy kə mən yikwan. Yikwan wər, yikwan mə sən za lawlaw, nəv ngiykwan kweɗek kweɗek akibik Bayzlav, kadaban hoyhoy yikwan mə njə kə jar kə ɗiy təkəniy malaw. 19 Mbu dap, pəl ngaɗ maa day wər, mə tar Bayzlav kə jan kat kə buway angaw angər kin.
Tar Bayzlav ngə way tik
20 Bayzlav acin ta vəl yikwan zoy. Sin mbəlah Məmar yikwan Yesu aa mə məc za, sin mbaɗ Yesu kə kər məgəlgəla mordoy taa puw təmakiy tik, sin məc makavay tan. Za Bayzlav ɗiy jawbərngəzl ndawyan maa a way ɗahkwən a hidiy avə ɓiɓiz ngə Yesu səna. 21 Bayzlav səna mə vəlehin gədan kə ɗiy təkən malaw cike wayza, kə jan hin kə ɗiy may ngetik! Sin mə ɗiy may ngetik atalan yikwan avə Yesu Kristu! Nəm kə vəlen mordoy a Yesu ko pu! Amina!
Ɗə mbeli ngə waytik
22 Galmayɗigi, kat tə ɗəɗefehin ɗerewel nhi kə vəlehin gədan, kadaban səna, kata pəlehin, mə yək zləgam səna lawlaw. Ɗerewel səna maa, ɗah zoɗ kwən. 23 Kata ceɗehin, mə fəkiy galmay ngiykwan Timote aa mə jik jaw kaɗ. Mana sin tu hosohoh angaw angər ɗa, yikwan məv kə vay jənjəna avə sin kə safehin. 24 Mə ɗen mbeli atalan mbalgamiy kin cike wayza ɓəw a hidiy mə səbiy Yesu cike wayza. Galmayiy ngiykwan mə yiy taa mə hayək Italiya mə ɗehin mbeli za təm. 25 Bayzlav mə saf marɓən kin cike wayza !