Kə musuf am takwaniy maa parpar
12
Yikwan wər, hidiy mə vəliy nəv ngatan a Bayzlav səna awaniy avə yikwan mgbaw. Taniy a ɗef yikwan mana aceki yikwan tu kə vəl nəv ngiykwan a Bayzlav. Kadaban səna acin, nəmkwan kə geɗ təkəniy cike mə njə kə takiy yikwan kəv kibik kibik. Nəmkwan kə geɗ ɗiy mə ngavngav mə njə kə kawiy yikwan njoɗ njoɗ kaɗ. Nəmkwan kə təl kə si hos am lay Bayzlav mə zla yikwan, za kə hos abəgo səna. 2 Yikwan kə cəhəriya hoyhoy atalan Yesu. Sin acin mə ɗiy yikwan kə vəl nəv ngiykwan a Bayzlav, za sin acin ngə tep yikwan akibik Bayzlav. Sin ngəm hidiy kə kpawta am pay maa zləngərak, za weli a zəmen ɓahbəgwən. Sin a ɗiy atəgo kadaban sin mə sən za, sin av kə zəzay a dibizlav. Ya tanjinhi, sin mə ɗewe kaɗ a mə ngərzəm ngə Bayzlav.3 Tanjinhi, mə ɓən atalan Yesu. Hidiy mə ɗiyiy mə ngavngav tu zelta, amma sin tu musuf. Asəna acin, kukwəɗ mə gər kə janehin, za hin kə dangar am takwan ma parpar kwən. 4 Am jəgəm hin taa ɗiy tik avə təkəniy mə ngavngav, hid mə məc am jəgəm səna ɗah gesin kwən. Kadaban səna, mə gər kə dangar kwən. 5 Ngəz Bayzlav mə ngəzehin mana wəriy tik, hin mə zlaya za vu? Sin a luw:
‹‹Kərti ɗa, mandal Bayzlav Məmar hidi aa ngəzoh, hoh gər kə jərəv ngəz səna kwən!
Mandal sin aa ndəloh, hoh gər kə dangar kwən!
6 Bayzlav Məmar Hidi a njə kə ngəz hid sin mə mayu,
a njə kə zar hid mə mbaɗ kə kərti tik.››
7 Mə musuf am takwan, kadaban Bayzlav a ngəzehin avə sin. Bayzlav a safehin kə wəriy ngetik. Kər maa bahbay tik a ngəz ɗahkwən ɗaha vu? 8 Mana Bayzlav a ngəzehin mana sin taa ngəz wəriy tik cike wayza bəgwən, təgo wər hin mbuw mətak bahbayigi, hin dihir wəriy ngə Bayzlav kwən. 9 Yikwan mawana bahbayigi am talan mahayək nhi, a njə kə ngəz yikwan, za yikwan mə njə kə zlimentəma. Asəna acin, law day yikwan kə zlimenma a bahbay ngiykwan Bayzlav tə dibizlav kə jan sin kə vəl yikwan micin mətak way. 10 Mindiwin, bahbayiy ngiykwan a njə kə ngəz yikwan mana nəv ngatan mə mayta ngə wan gwedek dap. Amma Bayzlav wər, a ngəz yikwan kə mən yikwan kə jan yikwan kə mbaɗ kə hidiy maa kweɗek kweɗek mana sin. 11 Mandal aa ngəziy yikwan, ngəz səna a fet nəv ngiykwan ɗahkwən, a njə kə ɗiy yikwan kə den ɗər. Zəni adəwən səna, hid mə jan ngəz, a njə kə mbaɗ kə hid maa tiɗtiɗe, za kə ɗew avə zoy.
Ɗew ngə hidiy mə səbiy Yesu
12 Asəna acin, mə gər kə fiy kəsəm kwən, mə səsak ngaz kin kaɗ kə gar gbingbin am mozlokotuf ngə Yesu. 13 Mə zaɓ mozlokotuf kin kaɗ lawlaw, kə jan ngaz ngə vəderiy tədab kin kə ngav a dagay tik kwən, amma ngaz ngatan kə zaɓ ɗər.
14 Mə təl a gədan kin cike kə ɗew avə zoy a hidiy cike wayza. Mə ɗew ɗew maa kweɗek. Asənkwən, hin mə lim Bayzlav Məmar hidi kwən. 15 Mə kaw talan kin lawlaw, ko hid takan tə dab kin mə gər kə zel marɓən ngə Bayzlav kwən. Hid mə gər kə ɗew adab kin mana pay njə ndərəzl kə ngav ɗew ngə hidiy kwən. 16 Mə kaw talan kin! Ko hid takan adab kin mə gər kə ɗew kə hid mə ɗiy vərndew kwən! Ko hid takan mə gər kə jərəv təkəniy mə yiy tangər Bayzlav za, mana Isuwa mə ɗiyu kwən, makavay mogoɗo ma tantan, sin aa ɗew ngetik ngə mazay beren kaɗ a galmən mendez! 17 Hin mə sən za, adəwən səna, sin tu jəway kə jan ngərbay angər bahbay tik, zəni bahbay tik a ngəm ɓahbəgwən. Sin təl təl avə han kə jan bahbay tik kə buw ɓən kaɗ, amma a jan ɓahbəgwən.
18 Mə sən kaɗ, lay hin mə gar təkimin akibik Bayzlav səna, a mbaɗ mana wurum hidiy Israyila taməcek mə kərəɓiy abər tik bəgwən. Wurum səna hid kwəl kə mbəlem tik. Abəgo taniy limiy, kuhu a zlaw, giɗ giɗ giɗ, lay ɗiya ɗiy kpizlik kpizlik nha həriya a lim ɗahkwən, ɓəw mbiɗ aca a gədan viw, viw, viw, 19 za taniy zlimiy a mbiziy falam, za zlimiy wəl ngə Bayzlay. Hidiy Israyila maa zlimiy wəl səna za, taniy ɗiya hovokigi, aa mayiy Bayzlav səna kə zləgamenta ɗaba. 20 A mayiy Bayzlav kə zləgamenta bəgwən, kadaban zləgam səna day gədan ngatan, zləgam səna a luw anhi: ‹‹Ko hid ngayi mə mbəlem ngəra am wurum nhi, hidiy kə ndəta a gugwən kə wəzlta kaɗ. Ko təkən huvu acin mə mbəlem tik, hidiy kə ɗiyta atəgo.›› 21 Təkəniy Israyiliy mə limta səna, mbir nəv godokwən. Ko Musa talan tik ɗiya luw: ‹‹Kat mə hovoko za, kata nənə.››
22 Amma ngəkin wər, atəgo kwən. Hin mə kərəɓ abər wurum ta luwta Siyona ɓəw abər liɓde ngə Bayzlav məmar micin. Liɓde səna Ursalima tə didizlav am lay ma mbaslayiy ngə Bayzlav day godokwən awaniy abəgo, a ɗiyiy məmbəlwa. 23 Hin mə pət adab mgbəw ngə mazayiy ngə Bayzlav zlim ngatan mə ɗəɗefeh kaɗ a dibizlav. Hin mə kərəɓ abər Bayzlav məv kə zla dalgway ngə talan mahayək cike wayza. Hin mə kərəɓ abər hidiy maa tiɗtiɗe maa Bayzlav mə mbaɗta kə hidiy maa kweɗek kweɗek. 24 Hin mə kərəɓ abər Yesu. Sin wa məkslel am walan ngiykwan avə Bayzlav, ngə jawbərngəzl ndawyan Bayzlav mə ɗiy tik avə yikwan. Za hin mə kərəɓ abər ɓiɓiz ngetik, sin mə zek kə ɗiy yikwan kweɗek kweɗek akibik Bayzlav. Ɓiɓiz səna a ceɗ yikwan təkən day kə ngə Habilaª.
25 Asəna acin, mə kaw talan kin lawlaw. Mə gər kə ɓon kə teh zlimi kə zlim zləgam ngə hid taa ceɗehin ləbar kwən! Musa a zlərenta zlimi a Israyiliy zaba, zəni taniy ɓoniy kə tehenta zlimi, za a leriy am dalgway ngə Bayzlav bəgwən. Ngiykwan ɗər, Bayzlav a zləgam yikwan aa dibizlav za. Mana yikwan tu ɓon kə zlim zləgam ngetik, sin av kə zla yikwan dalgway mindiwin tik. 26 Amicek, wəla ngə Bayzlav a kəz hayək zaba. Amma apicah, Bayzlav mə luw za av kə ɗiy yikwan təkən. Sin a luw: ‹‹Təv kə kəz hayək baha, amma hayək agendik dap kwən, təv kə kəz aa dibizlav tik.›› 27 Sin mə luw: ‹‹baha nhi›› a gər kə luw anhi: təkiniy cike Bayzlav mə ndənu av kə kəzigi, za av kə wayigi, za təkəniy cike maa sin a kəzta bəgwən avə kə ɗewiy tan ko apu.