Hidiy taməcek mə vəliy nəv ngatan a Bayzlav
11
Vəl nəv a Bayzlav, a gər kə luwakaɗ, təkən hid taa bəbəc atalan tik, mindiwin av kə jan tik. Təkən maa hid a lim gesin ɓahbəgwən, maa hid taa vərək ɓən ngetik a talan, zəni sin aa sən tik təkən səna ɗaha. 2 Hidiy taməcek mə səbiy Bayzlav vəlenta nəv ngatan a Bayzlav atəgo, kadaban səna acin nəv ngetik fet a tanigi.3 Yikwan vəl nəv ngiykwan a Bayzlav, makavay səna acin yikwan sən Bayzlav a ndən talan mahayək avə zləgam ngetik. Asəna acin, təkəniy cike wayza yikwan taa lim tik, Bayzlav a pətahta aa mə təkəniy maa hid aa lim ɗahkwən.
4 Habila vəl nəv ngetik a Bayzlav, makavay səna Bayzlav saf vəl ngetik law day ngə Kaynu. Lay sin mə vəlen nəv ngetik a Bayzlav səna, nəv ngə Bayzlav fet avə vəl ngetik, za sin vərək kə hid maa tiɗtiɗe akibik tik. Habila tu məc, amma makavay vəl nəv ngetik a Bayzlav səna, a ɗef yikwan mozlokotuf yikwan kə səb ngar ngetik.
5 Anuhu vəl nəv ngetik a Bayzlav, makavay səna acin Bayzlav wət a dibizlav a məc a məc bəgwən. Hid mə lim tik ɗahkwən, kadaban Bayzlav taa tep kaɗ a jagwar tik a dibizlav. Deftere a luw: Mandal Bayzlav a tep gesin a dibizlav bəgwən, sin a njə kə ɗiy təkən mə fet nəv ngə Bayzlav. 6 Yikwan mə sən za, mana hid a vəl nəv ngetik a Bayzlav bəgwən, nəv ngə Bayzlav a fet a hid səna kwən. Hid mə kərəɓ mbeh a Bayzlav səna, sin kə sən kaɗ Bayzlav ɗaha, za av kə vəlen gədmazlən a hidiy mə njə kə jarta.
7 Nuhu vəl nəv ngetik a Bayzlav, makavay səna Bayzlav ceɗen təkən məv kə hosohoh akibik maa sin a lim gesin bəgwən. Nuhu zlimenma a Bayzlav, za sin ɗiya kpaw pay mordoy ngə zlan maza, za sin avə hidiy təde ngetik pətiy akimin, za Bayzlav kə mbəlta kaɗ. Lay sin mə ɗiy atəgo, dalgway ngə Bayzlav kaw hidigi. Za makavay sin mə vəlen nəv ngetik a Bayzlav, Bayzlav vərək kə hid maa tiɗtiɗe akibik tik.
8 Ibrahima vəl nəv ngetik a Bayzlav, makavay səna sin zlimenma, za sin sliɗ, va am hayək Bayzlav mə luw kə vəlen a sin maa nwa. Sin av səna, a sən lay səna ɓahbəgwən. 9 Sin vəl nəv ngetik a Bayzlav, makavay səna, sin va ɗewey tik wa mbuluk am hayək Bayzlav mə luw kə vəlenni. Sin a ɗewey tik a madaba bla, Isiyaku ɓəw Yakubu a ɗewiy təm atəgo. Hayək Bayzlav mə luw av kə vəlen a Ibrahima səna, av kə vəlen a wəriy tik təm. 10 Ibrahima a ɗiy atəgo səna, kadaban sin aa puw angər Bayzlav, liɓde məmar mbasl maa gbingbin Bayzlav aa talan tik mə ndunu.
11 Saratu təm vəl nəv ngetik a Bayzlav, makavay səna ko sin mə ɗə mbusur wayza, za sin midil werti, sin ɗəliɓi. A ɗiy asəna, kadaban sin mə sən za mana Bayzlav tu luw kə vəlen təkən a hidi, av kə velenni mindiwin. 12 Kadaban səna acin, ko mandal Ibrahima mə mbusuroh za, sin mbuw wərigi. Za diw a sin takan dap, zəni wəriy tik səna tu fulfuliy day godokwən wa cuwzlerekiy tə dibizlav asənkwən wa vəgaɗ tə maza, za hid ɓəs kə nəfta kwən.
13 Hidiy səna cike vəliy nəv ngatan hoyhoy a Bayzlav hos am məc ngatan. Taniy a janiy təkəniy Bayzlav mə luw kə vəlenta səna bəgwən, amma taniy mə limta za a gaf tik, za ɗiya zəzayiy atalan tik. Za taniy luwta mgban mgban, taniy məwəlayigi asənkwən hidiy mə ɗiy mbuluk am talan mahayək. 14 Avə taniy mə luwta atəgo, a ɗefta mgban mgban taniy a gəriy lay ngatan halla. 15 A ɓəniy atalan hayək ngatan taniy mə geɗehta taa dəwən ɓahbəgwən. Asənkwən, taniy kwəl kə buwiy adəwən am hayək tan! 16 Amma mindiwin wər, taniy a jariy hayək maa law day kə ngatan, mana kə luw kaɗ lay tə dibizlav. Kadaban səna acin, mana hidiy tu luwta, hidiy nhi hidiy ngə Bayzlav, weli ɗah atalan Bayzlav kwən, kadaban sin mə ndənenta de za a dibizlav.
17 Ibrahima vəl nəv ngetik a Bayzlav. Amma Bayzlav slə nəv ngetik, a luw sin kə bən Isiyaku, za kə vəlenni. Za acin Ibrahima vəlen kərti tik malay səna, zəmaa Bayzlav acin mə luw av kə vəlen kər səna. 18 Bayzlav a luwenni: ‹‹Wəriy kat mə luwoh hoh tu kə jan səna, Isiyaku acin ngə mbuwta.›› 19 Amma Ibrahima ɗiya ɓən, za nap luw: ‹‹Bayzlav awana gədan ngə mbəlah hidiy aa mə məc za.›› Kadaban səna acin, Bayzlav geɗen kər səna kaɗ, wa a sleɗekeh aa mə məc za.
20 Isiyaku vəl nəv ngetik a Bayzlav, kadaban səna sin ɗiyen ngərbay a Isuwa avə Yakubu. Za ceɗenta təkən tu kə hosohoh atalan tan.
21 Yakubu vəl nəv ngetik a Bayzlav, kadaban səna acin, mandal sin mbeh kə məc, sin ɗiyen ngərbay a wəriy Yusufu saray tik. Sin a dagdaga ngetik kaw, gar a gar, za ɗiya mbəzl Bayzlav.
22 Yusufu vəl nəv ngetik a Bayzlav, kadaban səna acin, mandal sin mbeh kə məc, sin luwen a hidiy Israyiligi, taniy av kə pətiy tan aa mə hayək Misra za. Za sin ceɗenta bah mana aceki taniy tu kə ɗiyiy avə kirngizliy tik.
23 Bahbay ngə Musa avə Mahmay tik vəliy nəv ngatan a Bayzlav. Kadaban səna acin, taniy maa mbuwiy kərti tan za, taniy ɓahta kaɗ tər makaɗ. Taniy safta kər səna law godokwən, a hovokiy kə ɓon mə taktak ngə bay ngə hayək səna bəgwən.
24 Musa vəl nəv ngetik a Bayzlav, kadaban səna acin, sin maa gəl za, aa may hidiy kə luwta, sin kər ngə kərtaza ngə bay Misra kwən. 25 Sin a may kə sa takwan avə hidiy ngə Bayzlav ɗər, law day kə ɗew ɗew malaw ngə wan gwedek am lay ngə ɗiy təkəniy mə ngavngavigi. 26 A sin wər, hidiy kə jərəvta mana mə jərəviy Kristu, law day kə jan aray təm hayək Misra ɗər. Sin a ɗiy asəna kadaban sin a cəhəriya gaf atalan gədmazlən təkibik. 27 Musa vəl nəv ngetik a Bayzlav, kadaban səna acin, sin pət tik aa mə hayək Misra za, a hovok a bay mə bas nəv atalan tik bəgwən. Sin sok nəv kaɗ, sin ɗiy wa sin aa lim Bayzlav maa hidiy aa limta ɗahkwən. 28 Lay sin mə vəl nəv ngetik a Bayzlav, sin luwen a Israyiliy kə ɗiyiy məmbəlwa taa luwta Paska, ɓəw kə gboriy ɓiɓiz ngə təkəniy huvu am mijijik ngatan. Anhi acin, mbaslay ngə Bayzlav mə njə kə wəzl hid mimci a wəzl tizin ngə mbuw ngə Israyiliy kwən.
29 Israyiliy vəliy nəv ngatan a Bayzlav, kadaban səna acin, maz mordoy ta njə kə luwta maz maa pren, zlər akibik tan, bin, za taniy zlanigi, wa taniy aa viy atalan hayək a səna. Amma Misriy maa təliy kə səbta kə kaw za, yəm ɗiya təz atalan tan lekta kaɗ, ɗəɗək.
30 Israyiliy vəliy nəv ngatan a Bayzlav, kadaban səna acin, taniy nap tərlaniy liɓde Yeriko wan cisaray, za gəlməɗ ngə liɓde səna gom, girmimim.
31 Rahap, barlaw werti, vəl nəv ngetik a Bayzlav, kadaban səna acin, mandal Israyiliy mə wəzliy mosumiy ngə Bayzlav, a wəzliy wer səna kaɗ bəgwən, kadaban mandal taniy mə viy kə hezliy liɓde səna, sin mə yəkta za lawlaw ade ngetikª.
32 Kat kə luw bah mi? Lay gəɗak mana kat kə zləgam atalan Gedeyon, Barak, Samson, Yefta, Dawda, Samuyila ɓəw atalan mokotufiy ngə Bayzlav. 33 Hidiy səna cike wayza mə vəliy nəv ngatan za a Bayzlav. Kadaban səna acin taniy tu jəgəmiy a bayiy parpar, za taniy mə dayenta gədan za. Taniy tu ɗiyiy təkən maa tiɗtiɗe akibik Bayzlav, taniy tu janiy təkən Bayzlav mə luw kə vəlenta, za ko ma ngə moboriy taniy tu pekta. 34 Taniy tu məciy kuhu taa zlaw, giɗgiɗgiɗ, kaɗ. Hidiy tu gər kə wəzlta kaɗ a masalam, za taniy tu leriy talan tan. Taniy tu daligi, za Bayzlav tu vəlenta gədan. Am mandal vurum, taniy tu sokigi, za tu gamiy hidiy məpərmay mə yiy kə jəgəmiy a tanigi. 35 Wertiy sənan tu vəliy nəv ngatan a Bayzlav. Kadaban səna acin taniy limiy hidiy ngatan mə məcməcigi a micin, kadaban Bayzlav mə mbəlah hidiy ngatan səna aa mə məc za. Hidiy məpərmay wər tu si takwan dayday, zəni a mayiy hidiy kə lereta kaɗ aa mə takwan səna ɓahbəgwən. Taniy a mayiy kə məciy am takwan səna, kə jan Bayzlav kə mbəlata kaɗ aa mə məc za. Za taniy kə janiy ɗew malaw day.
36 Hidiy sənan təm baha, hidiy tu camenta micicew ɓəw tu zarta. Taniy tu jawta a selelen, za tu pekta am jik jaw. 37 Hidiy məpərmay baha, hidiy tu ndəta a gugwən nha taniy micigi. Hidiy məpərmay təm tu wanjalta a dabdaba asənkwən tu wəzlta kaɗ a masalam. Hidiy məpərmayiy tu tiwiriy am lay parpar, a kwəliy bagwəla ngə təmak asənkwən ngə gənaw kə ləkwət. Hidiy səna təkəniy tu ndakenta. Hidiy tu gbezlerentəma, za tu zlənenta takwan day godokwən. 38 Hidiy səna, talan mahayək a hos gəga taniy kə ɗewiy akimin bəgwən. Taniy tu tiwiriy am lay parpar, adab donu, atalan wurumigi, za taniy tu waniy a budum ɓəw a wili.
39 Hidiy səna cike mə vəliy nəv ngatan za a Bayzlav, kadaban səna acin nəv ngə Bayzlav tu fet. Ko asəna, taniy a janiy təkən Bayzlav mə luw av kə vəlenta bəgwən, 40 kadaban Bayzlav a sləsləɓ kə vəl yikwan təkən malaw day. Sin a may yikwan kə mar nəv maa kweɗek witik witik avə hidiy səna, kə diw kə vəl yikwan təkən sin mə luwu.