Ɓiɓiz ngə təkəniy huvu kwəl kə vəvay mə ngavngav ngə hidiy kwən
10
Mə jawjaw ngə Musa mə mbaɗa kə mazaɓəl ngə təkəniy malaw tu kə ɗiy dap, a mbaɗ kə təkəniy maa cekcek yikwan tu kə jantik am ɗew təkibik bəgwən. Kə di kə di, masayiy təm jik Bayzlav ɗaw kə fatenta təkəniy huvu a Bayzlav, fat za fat, fat za fat, kə jan hidiy kə mbaɗiy kə hidiy maa tiɗtiɗe akibik Bayzlav, amma ɗiy atəgo aa goh mə ngavngav ngə hidiy səna ɗahkwən. 2 Mana təkəniy huvu hidiy ta njə kə fattenta a Bayzlav səna tu hos gəga kə vəvay mə ngavngav tə talan tan kaɗ mindiwin wər, mbək a ɓəniy atalan mə ngavngav tan ɗaba. Za taniy a fatiy təkəniy huvu a Bayzlav ɗaba. 3 Amma a səna kwən. Taniy ta njə kə fatiy təkəniy huvu a Bayzlav səna, ɗaw kə slekenta talan kə di kə di am mə ngavngav ngatan ɗər. 4 Kadaban ɓiɓiz ngə wəriyvəlen avə ngə zuviy kwəl kə vəvay mə ngavngav ngə hidiy ɓahkwən.5 Kadaban səna, mandal Yesu Kristu mə yah am talan mahayək, tu luwen a Bayzlav:
‹‹Hoh wər, hoh may hid kə fatoh təkəniy huvu
ɓəw kə vəloh təkən maa parpar kwən.
Asəna acin, hoh ɗiy kata kə mbaɗ kə hidmemblen.
6 Təkəniy huvu ta njə kə kəɗawta am lay ngə kəɗawoh təkən,
za ɓəw təkəniy huvu hidiy ta njə fatiy kə geɗ mə ngavngav ngatan,
aa feteh nəv ɗahkwən təm.
7 Kadaban səna, kat tə luwoh:
‹kata anhi, kat tə yah am talan mahayək kə ɗiy təkən hoh mə mayu,
mana mə ɗəɗefta atalan ɗa,
am Deftere kohª.›››
8 Tizin tik Kristu a luw: ‹‹Hoh may hidiy kə bəniy təkəniy huvu, kə vəliy təkənigi asənkwən kə kəɗawiy vəren ngə təkəniy huvu am lay ngə kəɗawoh təkən kwən. Hoh may hidiy kə fatiy təkəniy huvu ngə vəvay mə ngavngav ngatan kwən. Təkəniy səna cike aa fetiy nəv ɗahkwən.›› Zəɗər, hidiy a njə kə ɗiyta mana mə jawjaw ngə Musa mə luwu. 9 Kristu luw baha: ‹‹Kata anhi, kat tə yah am talan mahayək kə ɗiy təkən hoh mə mayu.›› Kristu mə luw atəgo səna, a ɗef yikwan mana aceki sin mə lek jawbərngəzl taməcek kaɗ, sin zlambaɗ kaɗ avə ndawyan. 10 Lay Kiristu mə ɗiy təkən mana Bayzlav mə mayu, za ɓəw avə sin mə vəl talan tik kə məc jəɓ takan dap, za wayza. Sin tu zlambaɗ yikwan cike wayza aa mə mə ngavngav za.
11 Ko Masay ceki təm jik Bayzlav a njə kə gar hoyhoy kə ɗiy kəzəɗ ngə Bayzlav. A njə kə faten təkəniy huvu hoyhoy a Bayzlav, za maa təkəniy sin mə fattenta səna, a gohiy mə ngavngav ngə hidiy ɓahkwən. 12 Amma Kristu wər, sin vəl talan tik jəɓ takan dap kə jan kə vəvay mə ngavngav ngə hidigi. Adəwən səna, sin va ɗeweytik am ngərzəm ngə Bayzlav ko apu. 13 Tanjinhi, sin a puw mandal Bayzlav tu kə vəlen mosumiy tik, sin kə bacenta ngaz am wəlaª. 14 Avə Kristu mə vəl talan tik jəɓ takan dap, sin ɗiy zlerma am walan Bayzlav avə hidigi, za taniy kə ɗewiy kə hidiy maa kweɗek kweɗek akibik Bayzlav ko apu.
15 Mbiɗ ngə Bayzlav təm ɗef yikwan mgban mgban təkəniy səna mindiwin. Sin luw zagway:
16 ‹‹Bayzlav a luw:
‹Adəwən wan səna, anhi jawbərngəzl kat tu kə ɗiy tik avə hidiy ngaɗa.
Təv kə ɗiy mə jawjaw ngaɗa am nəv ngatan,
za təv kə ɗəɗef tik am bərngəzl ngatan.›››
17 Za sin ɗiya luw baha:
‹‹Kat tə slek talan am mə ngavngav ngatan ɓəw kəzəɗiy mə ngavngav taniy mə ɗiyta ɗabaª.››
18 Asəna acin, Bayzlav tu geɗ mə ngavngav ngə hidiy way kaɗ. Kadaban səna, zay ngə vəl təkən ngə vəvay mə ngavngav ɗahɗaba.
Kristu mə zlər mozlokotuf ndawyan za
19 Galmayɗiy mə səbiy Yesu, makavay Yesu mə zek ɓiɓiz ngetik, yikwan mawana bəbəc kə pət am lay maa kweɗek kweɗek Bayzlav mə ɗew. 20 Sin kwah godo ngə təteh hidiy a lay maa kweɗek kweɗek Bayzlav mə ɗew, sin zləren mozlokotuf ndawyan a hidiy kə pətiy abəgo, kə janiy micin. Godo sin mə kwah səna, mana kə luwkaɗ kəsəm ngetik hidiy mə kpawta am pay maa zləngərak. 21 Za yikwan mawana a masay mordoy ngiykwan, sin acin bay atalan hidiy ngə Bayzlav cike wayza. 22 Kadaban səna acin, nəmkwan kə kərəɓ angər Bayzlav avə nəv malaw, za nəmkwan kə vəl nəv ngiykwan cike, makavay ɓiɓiz ngə Yesu tu goh nəv ngiykwan cike aa mə ɓən mə ngavngav za, za sin tu goh kəsəm ngiykwan kaɗ avə yəm maa kweɗek. 23 Nəmkwan kə ceɗ bəbəc ngiykwan a hidiy hoyhoy mətak dangar, kadaban Bayzlav a luw av kə vəl yikwan təkən, za av kə ɗiy tik tiɗtiɗe mana sin mə luwu. 24 Nəmkwan kə kaw kəsəm ngiykwan kə jan kə vəl gədan + \fr 10.24 \ft ngə may kəsəm ngiykwan ɓəw kə ɗiy təkəniy malaw hoyhoy. 25 Yikwan mə gər kə geɗ kə yah am mgbəw mana hidiy sənan mə geɗta kwən. Geleɓ yikwan kə vəl gədan am walan ngiykwan hoyhoy ɗər, kadaban hin mə sən za, pic ngə Yesu Məmar yikwan tu kə jəɓahah mbeh kə hos.
26 Yikwan mə jəgwan kə sən mindiwin za. Adəwən səna, mana yikwan tu ɗiy mə ngavngav nguray tik wər, ko yikwan tu bənen təkən huvu a Bayzlav kə vəvay mə ngavngav ngiykwan, zay tik ɗahkwən. 27 Mə fəsiy yikwan wər, say kə puw dalgway ngə Bayzlav avə hovok, dalgway səna acin kə pət am kuhu maa a way ɓahɗahkwən tu kə kəɗaw mosumiy ngə Bayzlav. 28 Mana hid a səb mə jawjaw Bayzlav mə vəlen a Musa lawlaw bəgwən, za hidiy saray asənkwən makaɗ tu mbəzliy ma atalan tik, za tu luwta sin mə ngavma za, say hidiy mə wəzlta kaɗ mətak saf kaymah ngetik. 29 Mana təkən səna tu ɗiy atalan hid mətak səb mə jawjaw ngə Musa wər, yah av kə ton atalan hid mə jərəv Kər ngə Bayzlav aceki ? Kadaban hid səna a cəcef ɓiɓiz ngə Yesu, Bayzlav mə ɗiy jawbərngəzl ndawyan mə ler sin a mə ngavngav za ɓahbəgwən. Sin a rə Mbiɗ ngə Bayzlav mə njə kə ɗiy yikwan kə sən malaw ngə Bayzlav. Dalgway ngə hid səna av kə ɗiy lem day ngə hidiy cike wayza. 30 Bayzlav atalan tik a luw: ‹‹Hidiy mə ɓoniy ma ngaɗa, kata acin ngə ndə dəwatik, kata təv kə zlen dalgway a hidiy tiɗtiɗe avə kəzəɗ taniy mə ɗiyta!›› Sin luw baha: ‹‹Bayzlav Məmar Hidi av kə zlen dalgway a hidiy ngetik.›› 31 Takwan ɗaha godokwən atalan hid dalgway ngə Bayzlav məmar micin mə kaw tik.
32 Mə ɓən atalan təkən mə ton tə talan kin tamicek. Mandal səna, hin mə jan zləzlaɗ ngə Bayzlav za. Adəwən səna, hin tu sa takwan dayday, amma hin tu musuf. 33 Hidiy tu riy hin am pic məpərmay, za tu zlənehin takwan akibik hidiy cike wayza. Za pic sənan, hin tu mən hidiy mə siy takwan təm. 34 Ya za acin, hin tu sa takwan avə hidiy mə pekta am jik jaw lay mə yəkiy Kristu. Hin ngəm a zəzay hidiy kə mohiy arayiy kin, kadaban hin mə sən za, hin mawana nja malaw maa away ɗahkwən ko apu. 35 Za acin mə gər kə geɗ kə vərək ɓən kin atalan Bayzlav kaɗ kwən, avə kə vərək ɓən kin səna, sin av kə vəlehin gədmazlən mordoy. 36 Lawlaw hin kə musuf kə ɗiy may ngə Bayzlav, za hin məv kə jan təkən sin mə luw av kə vəlehin. 37 Kadaban Deftere a luw:
‹‹A fəs gwedek dap, a vah kwən,
hid məv kə yah, av kə yah.
Sin ɗa kə vah kwən!››
38 Bayzlav a luw baha:
‹‹Hid maa tiɗtiɗe, mə vəlak nəv ngetik, av kə jan micin mətak way.
Amma mana sin tu jəɓ adəwən, nəv ngaɗ a fet a sin ɗabaª.››
39 Amma yikwan wər, yikwan ɗah adab hidiy mə jəɓiy adəwən, za kə lekiy kwən. Yikwan mə vəl nəv ngiykwan za a Bayzlav, za sin av kə mbəl micin ngiykwan.