Kəzəɗ ngə masayiy təm jik Bayzlav ɓəw ngə Yesu
9
Am jaw bərngəzl ngə tizin, təkən mə jawjaw ɗaha atalan aceki kə səban Bayzlav. Lay təm ɗaha hidiy mə sləsləɓta kə tar Bayzlav abəgo. 2 Hidiy liy bla, za wəzakta kaɗ a dabdaba avə godo. Lay ngə tizin centa zlimi, lay maa kweɗek kweɗek. Am lay səna, təkən ngə vərək cibelbel, ɓəw tabəl ngə ɗer bəret hidiy mə dahenta a Bayzlav awaniy abəgo. 3 Lay mə saraytik a dəwən godo səna, ciy zlim tik lay maa kweɗek kweɗek Bayzlav mə ɗew. 4 Am lay maa kweɗek kweɗek Bayzlav mə ɗew səna, lay ɗaha ngə ɗiyen vəl a Bayzlav abəgo, a ɗiyta a melenge. Masayiy a njə kə kəɗawiy təkən njif tik maa nek mana dorson am lay səna. Akoti ngə jaw bərngəzl ngə Bayzlav avə hidigi awan abəgo təm, mə klaɓah waykaɗ avə melenge. Am akoti səna, təkəniy ɗahiy parpar aliɓ tik. Perlek mə ɗiy ɗiy ta melenge awan liɓtik. Aliɓ perlek səna, a zekiy təkən ngə zəm tamicek, zlim tik mahnu akimin. Tutok ngə Haruna mə ɗiy fufon awan aliɓ akoti səna. Za kəlamiy Bayzlav mə ɗəɗef mə jawjaw ngetik akimin, awaniy təm aliɓ akoti səna. 5 Za atalan akoti səna, təkəniy mə ɓəslɓəsl a kopok a kəsəm, wa mbaslayiy ngə Bayzlav ta luwta keruba awaniy akimin aa vəlen sən a hidigi, Bayzlav talan tik awan am jik səna. Kopok ngatan cip atalan akoti, ɗaw kə dəp lay ngə masay mordoy ta njə kə wis ɓiɓiz ngə təkən huviy akimin za Bayzlav kə geɗ mə ngavngav ngə hidiy kaɗ. Amma tanjinhi, mandal ngə pəslehin madaba ma tik takan takan kwən.6 Hidiy a sləsləɓiy təkəniy səna cike atəgo, masayiy a njə kə pətiy hoyhoy a madaba bla mə tizin tik, taniy ɗaw kə ɗiyiy kəzəɗ ngatan abəgo. 7 Amma lay mə saray tik ngə Bayzlav səna, say masay mordoy acin mə njə kə pət abəgo agendik dap. Za kə di kə di, sin ɗaw kə pət jəɓ takan dap. Sin a njə kə pət avə ɓiɓiz ngə təkən huvu, kə vəlen a Bayzlav, za Bayzlav kə geɗ mə ngavngav ngə masay səna kaɗ, ɓəw kə geɗ mə ngavngav hidiy cike mə ɗiyta avə may ngatan kwən. 8 Anhi təkən Mbiɗ ngə Bayzlav mə may kə ceɗ yikwan avə təkəniy səna: Mana lay ngə tizin tə madabah bla ɗaha zagway, mozlokotuf ngə pət am lay maa kweɗek kweɗek Bayzlav mə ɗew mə zləra gesin ɗahkwən. 9 Təkən səna tu mbaɗ kə mazaɓəl ngə təkəniy taa toniy tapicah. A gər kə luw kaɗ: Təkən yikwan ta njə kə vəlen a Bayzlav, ɓəw təkəniy huvu yikwan ta njə kə fatenni, a hosiy gəga kə goh nəv ngə hid kə ɗiy kweɗek kweɗek akibik Bayzlav bəgwən. 10 Təkəniy səna a ɗiyiy yikwan jəgwan atalan təkən ngə zəm, atalan təkən ngə sa ɓəw atalan mə zugzugwa ngə goh təkəniy maa parpar kə jan kə ɗiyiy kweɗek kweɗek dap. Təkəniy səna hidmemblen acin mə ɗiyta dap, Bayzlav a geɗ taniy kə vahiy ngə wan gwedek dap, hos am mandal sin tu kə zlambaɗa təkəniy cike kə mbaɗiy kaɗ ndawyan.
11 Tanjinhi Kristu mə yah za. Sin masay mordoy təm jik Bayzlav, sin acin mə dah yikwan təkəniy malaw. Sin ɗaw kə ɗiy kəzəɗ ngetik am lay mordoy malaw day lay kə madabah bla hidiy mə ləta tamicek. Hidiy acin mə ndəniy lay səna kwən, Bayzlav aa ndənu. Bayzlav a ndən lay səna am talan mahayək nhi ɓahbəgwən. 12 Kristu a pət am lay maa kweɗek kweɗek Bayzlav mə ɗew səna jəɓ takan dap, za wayza. Sin a pət avə ɓiɓiz ngə zuvu ɓəw ngə kərvəlen am ngəra kə vəlen a Bayzlav bəgwən. Amma sin vəl ɓiɓiz ngetik gendik a Bayzlav. Za mbelmbel ɓiɓiz ngetik səna acin, Bayzlav mbəl yikwan kaɗ, yikwan kə ɗew avə micin ko apu. 13 Amicek hidiy a njə kə bəniy zuvu ɓəw kərvəlen, za kə ɓiyiy ɓiɓiz tik, kə wisenta a hidiy mə ngaviy mə zugzugwa a kəsəm. A njə kə fatiy cavazla, za kə kəɗawta kaɗ, za kə pupukenta heleci tik a hidiy səna a kəsəm təm. A njə kə ɗiyta atəgo, kə goh hidiy səna, za taniy kə mbaɗiy kə hidiy maa kweɗek akibik Bayzlav. 14 Mana ɓiɓiz ngə təkən huvu tu hos gəga kə goh hid aa mə ngavngav za wər, kambay ɓiɓiz ngə Kristu acin vu? Mə safu, Kristu wər a ɗiy mə ngavngav bəgwən. Mbiɗ ngə Bayzlav maa a məc ɗahkwən mənenni, sin vəl talan tik a Bayzlav. Ɓiɓiz ngetik av kə goh nəv ngiykwan kaɗ kweɗek kweɗek aa mə ngavngav taa lek micin ngiykwan, kə jan yikwan kə ɗiy kəzəɗ ngə Bayzlav məmar micin.
15 Kadaban Kristu mə vəl talan tik səna, sin ɗew kə hid mə dah zlerma am walan ngə Bayzlav avə hidigi, kə jan Bayzlav kə ɗiy jawbərngəzl ndawyan avə tanigi. Za acin, hidiy Bayzlav mə ɗefentəma av kə janiy təkən sin mə luw av kə vəlenta. Sin av kə vəlenta maa nwa. Av kə ɗiy anhi, kadaban Kristu mə məca za. Məc ngetik tu ler hidiy aa mə ngavngav taniy mə ɗiyta mandal taniy awəleniy am jawbərngəzl tamicek.
16 Yikwan mə sən za, hid ta njə kə mbəzlma kaɗ, za kə məcay tik, mə zəm de ngetik, a njə kə zəm de səna, say hid mə mbəzlma səna tu məc zagway. 17 Asəna acin, hidiy a ɗiyiy kəzəɗ a zləgam hid mə mbəzl ma ngetik dəga sin awana micin gesin ɗahkwən, sey hid səna tu məc. 18 Kadaban səna acin, ko jawbərngəzl tamicek, a diw kə ɗiyiy kəzəɗ avə sin, say zekiy ɓiɓiz zagway. 19 Amicek, Musa tu ceɗen a hidiy cike mə jawjaw Bayzlav mə vəlen a hidiy cike wayza zagway. Adəwən səna, sin ɓiy ɓiɓiz ngə wəriyvilen avə ngə zuvigi, gavaɗ gavaɗ a yəm, za a vidiɗ zlim tik Isop ɓəw suson təmak maa wəzek, za juroɓ am ɓiɓiz səna, wiswis atalan deftere ngə mə jawjaw ngə Bayzlav, za wisenta a hidiy cike a kəsəm təm. 20 Za ɗiya luwen a hidiy acin: ‹‹Nhi acin ɓiɓiz ngə jawbərngəzl Bayzlav mə jaw tavə hin, za sin a luwehin hin kə kaw jawbərngəzl səna ngər səsarayª.›› 21 Za acin, Musa a ɓiɓiz tafnan wis təm am bla ɓəw atalan təkəniy cike hidiy ta njə kə ɗiyiy kəzəɗ avə sin kə mbəzl Bayzlav. 22 Mana mə jawjaw ngə Bayzlav mə luw wər, say kə wis ɓiɓiz am riy mordoy ngə təkəniy cike wayza kə jan təkəniy səna kə ɗiy kweɗek kweɗek akibik Bayzlav. Asəna acin, Bayzlav kə geɗ mə ngavngav ngə hidiy kaɗ wər, say taniy kə zekiy ɓiɓiz zagway.››
Ɓiɓiz ngə Kristu goh mə ngavngav ngə hidigi
23 Təkəniy cike mə njə kə mbəzliy Bayzlav avə sin tamicek, təkəniy səna mə mbaɗiy kə mazaɓəliy ngə təkəniy maa mindiwin tə dibizlav dap. Masay a njə kə wis ɓiɓiz am təkənigi, kə jan təkəniy səna kə ɗiyiy kweɗek kweɗek akibik Bayzlav. Amma ngə dihir təkəniy tə dibizlav wər, law kə wis ɓiɓiz ngə təkən zay tik maa day təkəniy huvigi, kə jan kə ɗiy kweɗek kweɗek akibik Bayzlav. 24 Kristu wər, sin a pət am lay maa kweɗek kweɗek Bayzlav mə ɗew hidiy mə ndənta angər ngatan bəgwən. Lay səna, mə mbaɗa wa mazaɓəl ngə dihir lay Bayzlav mə ɗew dap. Amma Kristu wər pət a dibizlav angər Bayzlav. Tanjinhi sin mə gara kaɗ akibik Bayzlav, za aa tartik makavay yikwan. 25 Yikwan mə sən za, kə di kə di, masay mordoy ngə Yahudiy a njə kə pət am lay maa kweɗek kweɗek Bayzlav mə ɗew. Sin a njə kə pət avə ɓiɓiz ngə təkəniy huviy am ngəra, za ɓiɓiz səna maa ngetik kwən. Amma Yesu Kristu wər, a vəl talan tik jəɓ takan dap, sin a vəl kə di kə di mana ngə mogroy ngə masayiy bəgwən. 26 Mana sin a vəl talan tik kə məc jəɓ ndas zaba, mbək av kə sa takwan jəɓ ndas təm dəga am pic Bayzlav mə ndən talan mahayək. Amma a sa takwan jəɓ ndas bəgwən. Tanjinhi am talan mahayək maa mbeh kə way, sin yah vəl talan tik a Bayzlav kə məc jəɓ takan dap, kə vəvay mə ngavngav tə talan hidiy cike waykaɗ. 27 Ko hid ngayi av kə məc jəɓ takan dap, adəwən səna, Bayzlav av kə zlen dalgway. 28 Asəna acin, Kristu təm vəl talan tik, məc jəɓ takan dap kə vəvay mə ngavngav tə talan hidiy dolom. Av kə jəɓaha. Am pic səna, sin ɗah kə vəvay mə ngavngav tə talan hidiy kaɗ ɗaba, av kə jəɓah kə mbəl hidiy mə puwta.