Yesu acin Bay mordoy ngə masay təm jik Bayzlav
8
Anhi ma maa zay tik day am zləgam yikwan mə luwu: Masay ngiykwan mordoy mana yikwan mə luw səna ɗaha, sin mə ɗewe kaɗ a dibizlav a mə ngərzəm ngə Bayzlav məmar gədan cike wayza. 2 A njə kə ɗiy kəzəɗ am lay maa kweɗək kweɗek Bayzlav mə ɗew, mana kə luw kaɗ a madaba bla maa cekcek. Bayzlav Məmar hidi acin mə la bla səna, hidmemblen acin mə lətik kwən.3 Ko mordoy ngə masay ceki, kəzəɗ ngetik acin kə vəlen təkən a Bayzlav ɓəw kə bənen təkəniy huvu. Asəna acin, say Yesu masay mordoy ngiykwan kə mar təkən ngə vəlen a Bayzlav təm səka. 4 Mana Yesu awan am talan mahayək, mbək sin a mbaɗ kə masay təm jik Bayzlav kwən, kadaban masayiy məpərmay mə njə kə vəlenta təkən a Bayzlav mana mə jawjaw ngə Musa mə luw ɗahiy dəga amicek za. 5 Masayiy səna ɗaw kə ɗiyiy kəzəɗ am jik Bayzlav. Amma jik Bayzlav səna mə mbaɗa wa mazaɓəl ngə dihir jik Bayzlav tə dibizlav. Mandal Musa taa lə bla, Bayzlav a luwenni: ‹‹A zlim lawlaw, a va, ma lə bla səna ceceh a kat mə ɗefeh tə talan wurumª.›› 6 Asəna acin, kəzəɗ Bayzlav mə vəlen a Yesu kə ɗiytik, zay tik day ngə masayiy taməcek godokwən. Sin ɗew am walan ngə Bayzlav avə hidigi, kə jan kə ɗiy jaw bərngəzl maa day kə tamicek, kadaban təkən Bayzlav mə luw kə vəl yikwan am jaw bərngəzl səna, zay tik day kə təkən yikwan mə jan tamicek.
7 Mana jaw bərngəzl ngə tizin a hos gəga kə ɗiy hidiy kə ɗewiy kweɗek kweɗek akibik Bayzlav zaba, mbək sin a jaw mə saraytik kwən. 8 Amma a hos gəga bəgwən, kadaban yikwan maa zlim Bayzlav a ndəl hidiy ngetik atalan mə ngavngav taniy mə ɗiyta, za a luwenta: ‹‹
Mə zlimu, kat Bayzlav Məmar hidi, ta ceɗehin, pic tik avə kə hos,
təv kə ɗiy jaw bərngəzl ndawyan,
avə Isirayiligi ɓəw Yahudigi.
9 Jaw bərngəzl kat tu kə ɗiy tik səna,
av kə ɗiy par avə taməcek kat mə jaw avə didiy tan,
mandal kat mə kawta am ngəra,
kə ngazlahta kaɗ aa mə hayək Misra za.
Amma a dəwən səna, taniy ngaviy jaw bərngəzl yikwan mə jaw avə taniy səna kaɗ.
Yo kadaban səna, kat tə cəcefta bəgwən.
Kat Bayzlav Məmarta, kat tə luwenta atəgo.
10 Anhi jaw bərngəzl kat tu kə jawtik avə hidiy Israyila am mandal səna,
kat kə zlərenta bərngəzl, taniy kə səniy mə jawjaw ngaɗa,
za təv kə ɗəɗef mə jawjaw səna am nəv ngatan.
Təv kə ɗew kə Bayzlav ngatan,
za taniy təm av kə ɗewiy kə hidiy ngaɗa.
11 Hid ngəv kə luwen a celen: ‹A yah, kat kə ɗefeh Bayzlav Məmar hidi, hoh kə səntik,› ɗahkwən,
kadaban hidiy cike wayza av kə sənakta,
ko mogroy, ko wərigi.
12 Za təkəniy mə ngavngaviy taniy mə ɗiyta cike, təv kə geɗenta way kaɗ,
za tə slek talan am mə ngavngav ngatan ɗabaª.››
13 Mana Bayzlav tu luw atalan jaw bərngəzl ndawyan anhi wər, mana kə luw kaɗ jaw bərngəzl ngə tizin tu ɗəmbusur. Yikwan mə sən za, mana təkən tu ɗəmbusur, av kə lek.