Zləgam atalan Malkisadaka masay ngə Bayzlav
7
Hid mə njə kə luwta Malkisadaka nhi, amicek sin bay ngə liɓde Salem. Za sin təm masay ngə Bayzlav maa fal. Am mandal Ibrahima mə yahtik aa mə vurum am sin mə dayen gədan a bayigi, Malkisadaka va gbamenni, za ɗiyen ngərbayª. 2 Ibrahima vəlen təkən takan takan am gəɓ am təkəniy sin mə janah təm vurum cike wayza. Zlim Malkisadaka səna a gər kə luwakaɗ, ‹‹bay mə njə kə ɗiy təkəniy cike a mozlokotuf tik,›› za sin təm bah bay Salem, mana kə luw kaɗ ‹‹bay ngə zoy.›› 3 Hid mə sən bahbay tik asənkwən mahmay tik ɗahkwən. Za ko səban tik, hid mə sən tik ɗahkwən. Pic mbuw ngetik avə pic məc ngetik, hid mə zləgam atalan tik ɗahkwən. Sin wa Kər ngə Bayzlav, sin masay təm jik Bayzlav ko apu.4 Mə safu mana aceki zay ngə Malkisadaka! Ko Ibrahima didi ngiykwan, sin mə vəlen təkən takan takan am gəɓ ngə təkəniy cike sin mə janah taa mə vurum za. 5 Mə jawjaw ngə Musa a zləgam atalan wəriy ngə Lewi masayiy anhi: Say taniy kə yəkiy təkən takan takan am gəɓ am təkəniy cike wayza hidiy Israyiliy məmarta. A luw atalan hidigi, mana kə luw kaɗ vəniytan, zəɗər ma taniy wəriy ngə Ibrahima. 6 Malkisadaka səna, sin səban ngə Lewi kwən, zəɗər Ibrahima tu vəlen təkən takan takan am gəɓ ngə təkəniy cike sin mə janah təm vurum. Za sin ɗiyen ngərbay a Ibrahima, hid Bayzlav mə luw av kə vəlen təkən. 7 Yikwan maa sən wayza, hid maa day acin mə njə kə ɗiyen ngərbay a hid mendez. 8 Masayiy səban ngə Lewi mə njə kə yəkiy təkən takan takan am gəɓ angər vəniytan səna, taniy ɗaw kə məcigi. Amma Malkisadaka mə yək təkən angər Ibrahima wər, zləgam ngə Bayzlav a ceɗ yikwan, sin awana micin. 9 Yikwan kwəl kə luw, səban ngə Lewi mə njə kə yək təkən takan takan am gəɓ angər hidiy Israyiliy sənan səna, taniy təm mə vəliy ngatan za a Malkisadaka, kadaban Ibrahima mə vəlen təkən a Malkisadaka səna dehen tan. 10 Mana kə luw kaɗ, mandal Ibrahima mə gbamen a Malkisadaka səna, a mbuw kər ko takan gesin bəgwən, za acin wəriy sin tu kə mbuwata mə vəlenta za təm aa ngər tik za.
11 Bayzlav a vəl mə jawjaw aa hidiy Israyila. Mə jawjaw səna a luw, say hidiy kə weliy masayiy təm jik Bayzlav hidiy təm səban ngə Lewi mana Haruna. Amma kəzəɗ ngə masiyiy təm jik Bayzlav taniy taa ɗiyta səna, a ɓəs kə way təkəniy cike Bayzlav mə mayu bəgwən. Mana a wayta zaba, mbək masay mordoy mana Malkisadaka a pətah ɗaba. 12 Mana Bayzlav tu zlambaɗ masayiy par aa təm səban ngə Lewi, mə jawjaw təm say sin kə zlambaɗ kaɗ. 13 Zləgamiy nhi cike a zləgamiy atalan Məmar Yikwan. Sin awan am səban par, za am səban səna, ko hid takan mə ɗiy kəzəɗ mana masay ɗahkwən. 14 Hidiy a sənta wayza, Məmar yikwan a mbuwta am səban ngə Yahuda. Za am mandal Musa mə zləgam atalan masayigi, sin a zləgam atalan səban səna ɓahbəgwən.
Masay Mordoy məpərmay təm jik Bayzlav mana Malkisadaka
15 Təkən məpərmay mə njə kə ɗef yikwan ma səna mgban mgban anhi: Masay məpərmay mana Malkisadaka mə yah za. 16 Sin a mbaɗ kə masay mana mə jawjaw mə luw atalan səban ngə Lewi bəgwən. Amma sin a mbaɗ kə masay səna avə gədan ngə ɗew avə micin ko apu. 17 Mana mə ɗəɗefta, deftere ngə Bayzlav a luw atalan masay səna: ‹‹
Hov kə ɗew kə masay təm jik Bayzlav ko apu
mana Malkisadakaª.››
18 Asəna acin, Bayzlav vəvay mə jawjaw sin mə vəlen taməcek a Musa kaɗ, kadaban mə jawjaw səna gədan tik ɗahɗaba, za a mənen a hidiy ɗaba. 19 Mə jawjaw səna a hos gəga kə zlambaɗ ɗew ngə hidiy kə ɗiy kweɗek kweɗek akibik Bayzlav bəgwən. Amma tanjinhi təkən ɗaha yikwan taa bəbəc atalan tik, təkən səna day kə mə jawjawiy səna. Za sin acin taa mən yikwan kə va angər Bayzlav.
20 Təkən məpərmay təm bah ɗaha, am mandal Bayzlav mə vərək Yesu kə ɗew kə masay mordoy təm jik Bayzlav, sin luw mbeɗi atalan tik zagway. Za mandal mə ɗiyiy hidiy təm səban Lewi mə ɗewiy kə masay təm jik Bayzlav, Bayzlav a luw mbeɗi atalan tan ɓahbəgwən. 21 Amma a Yesu wər, Bayzlav luwen mbeɗi ɗiya luw: ‹‹
Kat Bayzlav Məmar Hidi, kata luw mbeɗi,
hov kə ɗew kə masay təm jik ɗa ko apu.
Tə buw ma kaɗ kwən.››
22 Mana kə luw kaɗ, jaw bərngəzl ndawyan, Bayzlav mə ɗiy yikwan avə Yesu day kə jaw bərngəzl tamicek.
23 Təkən məpərmay təm bah ɗaha, masayiy təm səban Lewi wər taniy ndas, kadaban taniy ɗaw kə məcigi, za ɗaw kə geɗiy kəzəɗ ngatan a celenitan məpərmay. 24 Amma ngə Yesu wər, atəgo kwən. Sin a məc kwən, za av kə ɗiyay kəzəɗ tik ngə masay təm jik Bayzlav dap ko apu. 25 Kadaban səna acin, hoyhoy sin awana gədan ngə mbəl hidiy mə yiy angər Bayzlav avə zlim ngetik, makavay sin awana micin, hoyhoy sin ɗaw kə taren Bayzlav a hidiy ngetik.
26 Yesu acin masay mordoy yikwan mə mayu. Sin wər ɗew ngetik kweɗek kweɗek, liya a kəsəm tik ɗahkwən, za a ɗiy mə ngavngav ɓahbəgwən. Bayzlav pətar kaɗ a hidiy mə ɗiyiy mə ngavngav, za tep a dibizlav maa fal a jagwar tik. 27 Masayiy mogroy məpərmayiy təm jik Bayzlav ɗaw kə bəniy təkən huvu hoyhoy a Bayzlav. Ɗaw kə bənta makavay mə ngavngav ngatan zagway, za a dəwən səna kə bənta makavay mə ngavngav ngə hidigi. Amma ngə Yesu wər atəgo kwən. Sin wər a bənen huvu a Bayzlav jəɓ takan dap za wayza. Huvu səna acin talan tik gendik sin mə məc. 28 Masayiy hidiy mə vərəkta mana mə jawjaw ngə Musa, taniy hidiymemblen. Taniy ɗaw kə ɗiyiy mə ngavngav. Amma Bayzlav maa luw mbeɗi za, mbeɗi səna ɓiy lay ngə mə jawjaw ngə Musa, za Bayzlav vərək kərti tik kə Bay mordoy ngə masayiy təm jik tik. Bayzlav mbaɗ sin kə ɗew kə hid mə ɗiy kəzəɗiy ngetik cike wayza ko apu mana Bayzlav mə mayu, za təkən mə ndaken ɗahkwən.