6
Asəna acin, nəmkwan kə jəgwan sən maa kpəm atalan Kristu, wa hidiy mogroy ta njə kə ɗiyta. Yikwan mə gər kə zlay talan am təkəniy yikwan mə jəgwan taməcek atalan tik kwən. Yikwan mə ɗiy mbasl ngə jəgwan səna wayza, ya yikwan mə gər kə diwekaɗ ɗaba. Jəgwan ngə tizin səna acin: Kə buw dəwən aa təkəniy taa tep hid am məc, za kə vəl nəv a Bayzlav. 2 Jəgwan ngə tizin səna bah acin: Kə juroɓen baptisma a hid aceki, kə ɗiyen ngərbay a hid aceki? Bayzlav av kə mbəlah hidiy aa mə məc za aceki, ɓəw av kə zla dalgway kə way talan mahayək aceki ? 3 Tanjinhi geleɓ nəmkwan kibik kibik avə ɗiy jəgwan ngə hidiy mogroy, mana Bayzlav tu geɗ yikwan mozlokotuf.4 Hidiy mə limiy zləzlaɗ ngə Bayzlav, mə dezliy təkən malaw Bayzlav mə vəlen a hidigi, mə janiy mbiɗ ngə Bayzlav am nəv ngatan, 5 taniy aa səniy ndurum ngə zləgam ngə Bayzlav lawlaw, taniy aa səniy gədan tu kə yah am ɗew təkibik, 6 amma taniy buwenta dəwən a Bayzlav ɗər, wirwir ngə mən hidiy səna kə jan taniy kə buwiy kə ciy ngər kaɗ ɗahɗaba. Wirwir ngə mən hidiy səna ɗahkwən kadaban təkəniy taniy mə ɗiyta nhi, wa taniy a kpawiy Kər ngə Bayzlav bah am pay maa zləngrak jəɓ mə saray tik, za taniy a geɗenta mozlokotuf a hidiy sənan kə rəta təm.
7 Mə ɓən atalan tuz, mandal van tu za, təkəniy ngə zəm ɗaw kə ɗiyiy akimin lawlaw kə jan kə mən hid mə bizbiz, mana kə luw kaɗ, Bayzlav tu ɗiy ngərbay atalan tuz səna. 8 Amma mana tuz tu təv kidikiɗigi avə hiziɗ agendik dap wər, zay tik ɗahkwən. Gwedek Bayzlav av kə ngav kaɗ, za am way tik sin av kə kəɗaw təkəniy təkimin waykaɗ.
9 Galmayɗiy kat mə mayta, ko yikwan maa luw anhi, yikwan mə sən za, hin maa səb mozlokotuf maa law, za Bayzlav av kə mbəlehin makavay səna. 10 Bayzlav wər hid maa tiɗtiɗe, talan tik slekke am kəzəɗ ngəkin. Za a njə kə ɓən atalan hin taa maytik. May səna, hin mə ɗef tik aa hin mə ɗiyen kəzəɗ a celenikin mə səbiy Yesu tamicek, za ko tanjinhi təm bah hin maa ɗiyenta. 11 May ngiykwan wər, hin kə ɗiy kəzəɗ səna atəgo, hin mə gər kə dangar kwən hos am way tik. Za acin, təkəniy cike hin taa bəbəc atalan tik, Bayzlav av kə vəlehin. 12 Məsəfay mə gər kə ɗiyehin kə zlim zləgam ngə Bayzlav kwən. Amma mə səb ngar ngə hidiy mə vəliy nəv ngatan məpəlpəla a Bayzlav, za taa musufigi. Hidiy səna acin ngə janiy təkən maa law, Bayzlav mə luw av kə vəlen a hidiy ngetik.
Təkən Bayzlav mə luw kə vəlen a hidiy ngetik a zlambaɗ kaɗ kwən
13 Mandal Bayzlav mə luw av kə vəlen təkən a Ibrahima, Bayzlav səna luw mbeɗi avə zlim ngetik gendik, kadaban hid mə day tik, za sin kə luw mbeɗi avə zlim ngetik ɗahkwən. 14 Sin a luw: ‹‹Mindiwin, kata luw mbeɗi, təv kə ɗiyoh ngərbay day godokwən, za təv kə vəloh wəriy dolom.›› 15 Ibrahima musuf, puw puw, za Bayzlav ɗiyen təkən sin mə luw kə ɗiyen səna. 16 Hidiy taa njə kə luwiy mbeɗi, a njə kə jariy hid maa day kə tanigi kə jan kə luwiy mbeɗiy avə zlim ngetik, kə jan mbeɗ taniy mə luwta kə way ngəway atalan zləgam səna. 17 Wasəna a Ibrahima ɓəw hidiy mə mbuwiy taa madabah tik, Bayzlav a may kə ɗefen mgban mgban təkən sin mə luw av kə ɗiyenta səna, a zlambaɗ ɓən kaɗ kwən, kadaban səna sin luw mbeɗi atalan zləgam səna. 18 Təkəniy saray ɗahiy maa a zlambaɗiy ɗahkwən, taniy acin: təkən Bayzlav mə luw mbeɗi ɓəw təkən sin mə luw av kə vəl yikwan. A zlambaɗ kwən kadaban Bayzlav aa ngawma ɗahkwən. Makavay səna, yikwan mə siy kə ɓah angər tik, zləgam səna a vəl yikwan gədan kə bəbəc hoyhoy atalan təkən sin mə luw av kə ɗiy yikwan. 19 Bəbəc ngiykwan atalan təkən Bayzlav mə luw kə vəl yikwan səna, tu kaw micin ngiykwan, wa gugwən mordoy maa a kəz am lay tik za ɗahkwən. Asəna acin, yikwan mə gara kaɗ toytoy am mozlokotuf ngə Bayzlav, za yikwan mawana mozlokotuf ngə pət aa dəwən godo mə zen zen kə titeh lay maa kweɗek kweɗek Bayzlav mə ɗew, yikwan kə hos akibik Bayzlav səna. 20 Yesu pət məpəlpəla kə yikwan am lay səna. Sin a pət təm makavay ngiykwan. Bayzlav vərək kə ɗew kə Bay mordoy ngə mordoy ngə masayiy təm jik ngetik ko apu mana Malkisadaka tamicek.