5
Yikwan mə sən za, kala bay ngə masay təm jik Bayzlav, a njə kə welta adab hidigi, kəzəɗ ngetik acin kə ɗiyen kəzəɗ a Bayzlav am lay ngə hidigi. Sin a njə kə vəlen təkən a Bayzlav ɓəw kə bənen təkəniy huvu ngə goh mə ngavngaviy taniy mə ɗiyta. 2 Sin təm awana fəsəkiy parpar, asəna acin, sin kwəl kə saf kaymah ngə hidiy maa a səniy mozlokotuf ngə Bayzlav ɗahkwən, hidiy taa lekigi. 3 Makavay sin talan tik awana fəsək, say sin kə bənen təkəniy huvu a Bayzlav kə geɗ mə ngavngav ngetik kaɗ. Sin ɗah kə bən tik makavay mə ngavngav ngə hidiy dap kwən. 4 Hid aa vərək talan tik kə hid mordoy aa talan tik kə masay mordoy təm jik Bayzlav ɗahkwən. Say Bayzlav tu wel tik mana mə wel Haruna amicek. 5 Kristu təm wasəna, sin acin mə wel talan tik gendik kə hid mordoy, kə ɗew kə bay mordoy ngə masay təm jik Bayzlav kwən. Bayzlav acin mə wel tik, za luwenni:‹‹Hoh acin Kərti ɗa.
Apicah, kata acin bahbay koh.››
6 Bayzlav luw am lay məpərmay baha:
Hov kə ɗew kə masay təm jik Bayzlav ko apu,
mana masay zlim tik Malkisadaka.››
7 Mandal Kristu mə ɗew atalan mahayək, sin tu tar Bayzlav, ɓəw sin tu pəl tik avə cəwəla ɓəw avə han, kadaban sin mə sən za Bayzlav kwəl kə ler tik aa mə məc za. Za Bayzlav zlaw tar ngetik, makavay sin mə zlimenma. 8 Ko kadaban sin Kər ngə Bayzlav, sin sa takwan kə jan sin kə jəgwan zlimenma a Bayzlav. 9 Sin maa way kəzəɗ Bayzlav mə vəlen za, Bayzlav vərək sin kə hid mə mbəl hidiy mə zlimentəma kə janiy micin maa a way ɗahkwən. 10 Mindiwin, Bayzlav vərək Kristu kə bay mordoy ngə masayiy təm jik Bayzlav mana Malkisadaka.
Mə kaw zləgam ngə Bayzlav lawlaw
11 Yikwan mawana təkəniy dolom ngə ceɗehin atalan Malkisadaka, amma tuwah godokwən a yikwan kə pəslehin madaba mətik, kadaban hin maa zlim təkəniy njoɗ ɗahkwən. 12 Lawlaw tanjinhi wər, hin tu hos gəga kə jəgwanen zləgam ngə Bayzlav a hidiy sənan, kadaban hin mə jəgwan zləgam səna dəga amicek. Zəɗər nha tanjinhi hin maa may hidiy kə jəɓ kə ceɗehin təkəniy təm zləgam ngə Bayzlav hin mə jəgwan tamicek! Hin kwəl kə zəm gəda gesin kwən, hin wa wəriy mawariy taa siy wa ngə mahmay tan. 13 Hid maa a geɗ kə sə wa kaɗ ɗahkwən, sin kər mawar. Hid mana təgo kwəl kə pətar təkən malaw avə təkən mə ngavngav kwən. 14 Amma gəda wər ngə hidiy mogroy, kadaban am ɗew ngatan taniy tu jəgwaniy təkən, tu səniy pətar təkən malaw avə təkən mə ngavngav.