4
Bayzlav luw yikwan: ‹‹Hin məv kə hos am lay nəp ngaɗa.›› Zləgam sin mə luw səna, hos am pic tapicah sin av kə ɗiy tik. Kadaban səna acin, nəmkwan kə kaw talan ngiykwan lawlaw, yikwan mə gər kə zlay aa dəwən kə ɗew mətak pət am lay nəp Bayzlav mə luw kə vəl yikwan səna kwən. 2 Yikwan tu zlim Ləbar Malaw mana didiy ngiykwan mə zlimta amicek. Amma zay ngə ləbar səna a taniy ɗahkwən, kadaban a yəkiy ləbar səna a nəv takan bəgwən. 3 Amma ngiykwan wər, yikwan məv kə pət am lay nəp səna, kadaban yikwan tu yək ləbar səna. Bayzlav mə luw za atalan hidiy mə ɓoniy ma ngetik, sin a luw: ‹‹kat tu bas nəv, za kat tu luw mbeɗi,
ko a ɗiy aceki, hidiy səna a pətiy am lay nəp,
kat mə sləsləɓenta kwən.››
Mindiwin, hid ngə luw nəp ɗahkwən wər ɗahkwən. Zəɗər Bayzlav a way kəzəɗ ngetik dəga am mandal sin mə ndən talan mahayək. 4 Am deftere ngə Bayzlav, am lay məpərmay, a zləgamiy atalan wan mə cisaray tik anhi: ‹‹Bayzlav a ɗiy kəzəɗ wan kwəh, am wan mə cisaray tik, sin nəp.›› 5 Za am lay səna Bayzlav a luw baha: ‹‹Hidiy səna ko a ɗiy aceki, taniy a hosiy am lay nəp kat mə sləsləɓenta kwən. 6 Hidiy mə zlimiy Ləbar Malaw məpəlpəla taməcek a yəkiy ləbar səna ɓahbəgwən, kadaban səna, taniy a jan kə pətiy am lay nəp Bayzlav mə sləsləɓenta bəgwən. Asəna acin, hidiy məpərmay kwəl kə pətiy am lay nəp səna. 7 Kadaban səna acin, Bayzlav zla wan məpərmay, wan səna acin apicah. Di das adəwən səna, Bayzlav zləgam avə ma ngə Dawda atalan pic nəp səna. Am lay təm deftere tafnan, sin a luw:
‹‹Mana hin tu zlim wəla ngə Bayzlav apicah,
mə gər kə nek zlim kin kaɗ kwən!››
8 Mana Yosuwa a ngazl didiy ngiykwan am lay nəp Bayzlav mə sləsləɓenta səna zaba, mbək Bayzlav a zləgam atalan pic nəp məpərmay ɗaba. 9 Asəna acin, mana kə luw kaɗ, nəp ɗaha bah a hidiy ngə Bayzlav. Nəp səna wa Bayzlav mə nəp am wan mə cisaray tik. 10 Hid mə nəp am lay Bayzlav mə sləsləɓ tik, sin a nəp am kəzəɗiy cike sin mə ɗiy təm, mana Bayzlav mə nəp am kəzəɗiy sin mə ɗiyu. 11 Kadaban səna acin, nəm kə təlkwan a gədan ngiykwan cike wayza, kə jan yikwan kə pət am lay ngə nəp səna. Hid mə gər kə ɓon ma ngə Bayzlav za kə ndəv mana didiy ngiykwan mə ɗiyta kwən.
12 Zləgam ngə Bayzlav wər a njə kə vəl micin a hidigi, za awana gədan mordoy. Sin day masalam mə zəmzəm gozlum səsaray tik. Zləgam səna ɗaw kə pət hos am nəv ngə hid maa ndernder mana masalam mə njə kə rəsl kirngizl hos am zingwin. A njə kə gudoroh tamah ɓəw ɓən mə ɓahɓah təm nəv ngə hid ngə ɗiy təkənigi, kə ɗef tik am lay maa varak. 13 Akibik Bayzlav wər, ko təkən takan mə ɓahɓah ɗahkwən. Təkəniy cike sin mə ndənu mgbannga akibik tik. Za yikwan məv kə zlawenma atalan kəzəɗiy ngiykwan cike wayza.
Yesu acin bay mordoy ngə masayiy təm jik Bayzlav
14 Yikwan mawana bay ngə masayigi, sin acin Yesu Kər ngə Bayzlav. Sin taa vətik a dibizlav, mə ɗeweh kaɗ a jagwar Bayzlav. Asəna acin, nəmkwan kə gar lawlaw am vəl nəv ngiykwan a Bayzlav. 15 Bay masay ngiykwan aa sən fəsək ngiykwan wayza, kadaban sin təm Bay musuruf mə lebeɗ za avə təkəniy parpar, amma sin a ɗiy mə ngavngav ɓahbəgwən. 16 Kadaban səna acin, nəmkwan kə kərəɓ mbeh a Bayzlay mətak wəzən. Sin awana gədan mordoy, za sin aa may yikwan. Sin av kə geɗ yikwan mə ngavngav kaɗ, av kə ɗiy yikwan malaw, za sin av kə mən yikwan hoyhoy am mandal yikwan maa may mən.