Yesu avə Musa
3
Galmayɗiy hidiy ngə Kristu, hin acin hidiy Bayzlav mə ɗefentəma kə ɗewiy kə hidiy ngetik. Mə cəhəriya atalan Yesu hoyhoy. Bayzlav a zlənahah, sin acin mordoy ngə masayiy təm jik Bayzlav, za yikwan mə vəl nəv ngiykwan cike a sin, za yikwan maa ceɗ ləbar ngetik a hidigi. 2 Za sin tu zlimenma a Bayzlav mə vərək tik kə mordoy ngə masayiy təm jik tik, wa Musa mə zlimenma amicek a Bayzlav am kəzəɗ ngetik. 3 Hidiy ɗaw kə həməniy hid mə ndən jik day kə jik səna. Pərak pərak asəna ngə Musa avə Yesu təm. Law hidiy kə vəlenta mordoy a Yesu day kə Musa. 4 Ko jik ceki, hid acin taa njə kə ndən tik. Amma hid mə ndən təkəniy cike wayza acin Bayzlav. 5 Amicek Musa tu ɗiy kəzəɗ ngə Bayzlav a mozlokotuf tik. Sin wər hid mə ɗiy kəzəɗ dap. Kəzəɗ ngetik ngə zləgamen a hidiy atalan təkən tə kibik Bayzlav tu kə ɗiy tik. 6 Amma tanjinhi, Kristu Kər ngə Bayzlay, Bayzlav vərək sin kə mar jik ngetik. Jik ngetik səna acin yikwan. Asəna acin, say yikwan kə zəzay a təkən yikwan taa bəbəc atalan səna.Bayzlav vəlen nəp a hidiy ngetik
7 Kadaban səna acin, Bayzlav mə zləgama za avə Mbiɗ ngetik, sin a luw:
‹‹Apicah mana hin tu zlim zləgam ngaɗa,
8 Mə gər kə nek zlimi kin kaɗ kə ɓon kə yək ma ngetik,
mana didiy kin mə ɓoniy kə yək tik amicek kwən.
Taniy a ɓoniy mandal mə sliy nəv ngə Bayzlav aa kə ɗiy mə ngavngav adab donu.
9 Za Bayzlav luw:
‹Adab donu səna,
didiy kin tu sliy nəv ngaɗa.
A mayiy kə sənta, ko təv kə ɗiy aceki .
Zəni nəv ngaɗa bas atalan tan.
Za kat ɗiya luw: ‹Nəv ngatan ɗaw kə tepta am lek hoyhoy,
a mayiy kə səniy təkən kat taa gər angər tan bəgwən.›
11 Am kat mə bas nəv səna, kat luw mbeɗi anhi:
‹Ko aceki, hidiy səna a hosiy am lay nəp,
kat mə sləsləɓenta kwən.›››
12 Galmayɗigi, mə kaw talan kin lawlaw. Hid mə gər kə mar nəv mə ngavngav kə ɓon kə yək Bayzlav kwən, ɓəw kə mar nəv maa toytoy kə buwen dəwən a Bayzlav məmar micin kwən. 13 Amma mə vəl gədan am walan kin hoyhoy, kə jan Bay musuruf kə lebeɗehin kə ɗiy mə ngavngav, za hin kə ɓon ma ngə Bayzlav kwən. Mə ɗiy atəgo hoyhoy, kadaban Bayzlav aa may kə zləgam yikwan tanjinhi təm. 14 Mana yikwan tu gar lawlaw am mozlokotuf ngə Bayzlav, za yikwan maa səb aa kə vəlen nəv ngiykwan hos am way tik wər, yikwan hidiy ngə Kristu mindiwin.
15 Zləgam ngə Bayzlav a luw am deftere:
‹‹Mana hin tu zlim wəla ngə Bayzlav a picah,
Mə gər kə nek zlim kin kaɗ,
mana didiy kin tamicek
mə nekiy zlim ngatan kaɗ kə ɓoniy ma ngetik kwən.››
16 Ya hidiy mə zlimiy zləgam ngə Bayzlav, za ɓoniy səna acin yi? Taniy acin, hidiy Musa mə ngazlahta aa mə hayək Misra za. 17 Ya Bayzlav a bas nəv di ngərfoɗ atalan hidiy ngayi? Sin a bas nəv atalan hidiy mə ɗiyiy mə ngavngav, za mə məciy adab donu. 18 Mandal Bayzlav mə luw mbeɗi, mə luw: ‹‹Ko aceki, hidiy nhi wər a hosiy am lay nəp ngaɗ kwən.›› Sin a luw atalan hidiy ngayi? Sin a luw atalan hidiy tafnan, mə ɓoniy kə yək ma ngetik. 19 Yikwan mə sən za, taniy a hosiy am lay nəp ngə Bayzlav bəgwən, kadaban taniy a vəlenta nəv ngatan a Bayzlav bəgwən.