Ɗah law kə jərəv zləgam ngə Bayzlav kwən
2
Asəna acin, nəmkwan kə kaw zləgam yikwan mə zlim səna lawlaw, asənkwən yikwan məv kə lek mozlokotuf. 2 Zləgam Bayzlav mə luwen a mbaslayiy tik kə ceɗen a hidiy taməcek səna, sin zləgam maa mindiwin. Hidiy məpərmay a yəkiy zləgam səna ɓahbəgwən, za a səbta bəgwən. Za Bayzlav zlenta dalgway tiɗtiɗe ngə mə ngavngav taniy mə ɗiyta. 3 Amma yikwan wər, yikwan mə zlim zləgam Bayzlav tu kə mbəl yikwan avə sin za. Mana yikwan tu jərəv zləgam səna, yikwan kwəl kə ler am dalgway ngə Bayzlav acin vu? Zləgam səna, Yesu Məmar Hidi acin mə diw kə ceɗ tik məpəlpəla. Za acin, hidiy mə zlimiy zləgam səna, luwta zləgam səna mindiwin. 4 Bayzlav atalan tik ɗiy təkəniy maa tuwah parpar dolom ɓəw təkəniy mogroy kə jan kə ɗefen a hidigi, zləgam hidiy məpərmay mə ceɗenta səna, mindiwin. Za Bayzlav vəl gədan ngetik a hidigi avə mbiɗ ngetik kə jan taniy kə ɗiyiy təkəniy maa parpar mana may ngetik.Yesu a məc kə mbəl hidiy cike wayza
5 Bayzlav wər a vərək mbaslayiy tik kə mariy talan mahayək ndawyan, yikwan mə zləgam tə talan tik nhi kwən. 6 Amma, am lay məpərmay am deftere ngə Bayzlav mə ɗəɗefta za, a luwta:
‹‹Hidmemblen wər yi Bayzlav ɗa,
nha hoh kə ɓən atalan tik nhi?
Hidmemblen wər yi,
nha hoh kə mən tik nhi?
7 Hoh ɗiy Hidmemblen mbaslayiy koh kə day ta gwedek dap avə zay.
Zəni hoh kwəlen gədan mordoy avə zay.
8 Hoh ɓiy təkəniy cike wayza,
hoh vəl am nəv ngəra ngetikª.››
Bayzlav vərək hidmemblen kə zəm bay atalan təkəniy cike wayza. Sin a geɗ ko təkən takan kə day gədan ngə hidmemblen ɓahbəgwən. Amma tanjinhi, yikwan maa lim tik, hidmemblen a mar gədan atalan təkəniy cike wayza gesin bəgwən. 9 Za yikwan mə lim təm, Bayzlav tu gəgəc Yesu kaɗ ngə wan gwedek atalan mbaslayiy tik, amma tanjinhi sin mə vəlen mordoy ɓəw zay kaɗ. A vəlen lay sin mə sa takwan ɓəw sin mə məc. Sin a məc kə jan Bayzlav kə saf marɓən ngə hidiy cike wayza. 10 Bayzlav acin mə ndən talan mahayək, za talan mahayək a ɗew mbel mbel sin. Za sin aa may hidiy tik dolom kə pətiy am mordoy ngetik. Asəna acin, makavay Yesu tu kə mbəl hidigi, Bayzlav geɗ sin kə sa takwan kə jan sin kə way kəzəɗ səna.
11 Yesu acin mə njə kə ɗiy hid kə ɗew kweɗek kweɗek akibik Bayzlav. Sin mə njə kə ɗiy ɗew ngə hidiy kweɗek kweɗek ɓəw hidiy sin mə ɗiyta kweɗek kweɗek səna, bahbay tan takan. Kadaban səna acin, weli a ɗiyen kə ɗefenma a hidiy səna galmayɗigi ɗahkwən. 12 Yesu a luwen a Bayzlav anhi:
‹‹Aw Bayzlav ɗa,
təv kə zləgamen a galmayɗigi atalan koh.
Təv kə səbanoh adab mgbəw ngə hidigi.››
13 Yesu luwen a Bayzlav baha:
‹‹Təv kə vəloh nəv ɗa cike wayza.››
Za luw baha:
‹‹Kat anhi avə wəriy,
Bayzlav mə vəlakku.››
14 Wəriy Yesu mə zləgam tə talan tan səna, hidmemblen njə vəren ɓəw ɓiɓiz a kəsəm. Bay musuruf awana gədan ngə wəzlta kaɗ. Kadaban səna acin, Yesu təm mbaɗ kə hidmemblen mana tanigi. Sin məc kə jan kə dayen gədan a Bay musuruf məmar gədan atalan məc. 15 Amicek hidiy mbaɗiy wa bahlamigi, lay mə hovokiy avə məc. Tanjinhi acin Yesu məc zlambaɗata kaɗ aa mə məc za. 16 Asəna acin, Yesu wər a yah kə mən mbaslayiy ngə Bayzlav kwən, amma sin a yah kə mən hidiy təm səban ngə Ibrahima. 17 Kadaban səna acin, say sin kə mbaɗ wa galmay ngə hidiy am təkəniy cike wayza, kə jan sin kə mbaɗ kə mordoy ngə masay təm jik Bayzlav kə saf kaymah ngə hidigi. Sin awana gədan mordoy ɓəw ɗew maa tiɗtiɗe am kəzəɗ ngə Bayzlav, za Bayzlav kə geɗ mə ngavngav ngə hidiy kaɗ. 18 Mindiwin, Yesu atalan tik mə sa takwan za, Bay musuruf mə lebeɗ za. Asəna acin, sin kwəl kə mən hidiy Bay Musuruf mə lebeɗta kə ɗiy mə ngavngav, kə lerta kaɗ təm.