Ɗerewel hid məpərmay
mə ɗəɗefen a ibraninkigi
Bayzlav a zləgam yikwan avə ma ngə Kərti tik
1
Amicek, Bayzlav tu zləgamen a didiy ngiykwan a mozlokotuf parpar jəɓ ndas. Sin a zləgamenta a ma ngə mokotufiy tik. 2 Tanjinhi am talan mahayək maa mbeh kə way nhi, sin zləgam yikwan a ma ngə Kərti tik. Sin a ndən talan mahayək cike wayza avə Kərti tik səna. Za sin vərək Kərti tik səna, kə zəm bay atalan təkəniy cike wayza. 3 Hidiy ɗaw kə limiy gədan mordoy ngə Bayzlav angər Kərti tik səna. Za sin wa Bayzlav aa talan tik. Za zləgam təm ma ngetik awana gədan, sin ɗaw kə kaw təkəniy təm talan mahayək cike a zləgam səna, kə jan taniy kə ɗewiy lawlaw. Za sin goh mə ngavngav ngə hidiy cike waykaɗ, kə jan taniy kə ɗewiy kweɗek kweɗek. Za acin, sin vətik a dibizlav, ɗewey tik aa mə ngərzəm ngə Bayzlav məmar gədan cike wayza.Kər ngə Bayzlav day mbaslayiy ngə Bayzlav cike wayza
4 Zay ngə Kər ngə Bayzlav day ngə mbaslayiy ngə Bayzlav, lay Bayzlav mə vəlen zlimi maa day kə ngə mbaslayiy tik cike wayza. 5 Bayzlav a luwen anhi a mbaslay tik ko takan bəgwən, səna a luwen a Kərti tik anhi:
‹‹Hoh acin Kərti ɗa.
Apicah, kat mə mbaɗa kə bahbay kohª.››
Sin a zləgamen a mbaslay ngetik:
‹‹Kat təv kə mbaɗ kə bahbay tik,
za sin av kə mbaɗ kə kərti ɗaª.››
a luw atəgo bəgwən. 6 Amma mandal Bayzlav mə zlənah Kərti tik tizin mbuw ngetik am talan mahayək, sin tu luw atalan tik:
‹‹Mbaslayiy ngə Bayzlay cike mə səbanta.››
7 Atalan mbaslayiy wər, Bayzlav a luw:
‹‹Kat təv kə ɗiy kəzəɗ avə tanigi.
Wa kat ta njə kə ɗiy tik avə mbiɗ, za taniy av kə ɗiyakta kəzəɗ mana gana kuhu taa zlawª.››
8 Amma atalan Kərti tik wər, Bayzlav a luw:
‹‹Hoh acin Bayzlav, hov kə mar lay ko apu,
za hov kə mar hidiy koh aa mozlokotuf tik.
9 Hoh may təkən mə njə kə ɗiy a mozlokotuf tik.
Hoh njə kə zel təkəniy mə ngavngav.
Kadaban səna acin, kat Bayzlav, kat Bayzlav koh, kat tu weloh, hoh kə ɗiyak kəzəɗ,
za kat zekeh ɗawa atalan kə vərəkoh kə bay,
kat ɗiy hoh day kə colohigi.››
10 Bayzlav luw baha:
‹‹Am diw təkəniy cike, hoh acin Bayzlav mə ndən talan mahayək,
Za hoh talan koh acin mə ndən dibizlav.
11 Təkəniy cike hoh mə ndənu, av kə wayigi,
amma hoh wər, hov kə ɗewey koh ko apu.
Dibizlav avə talan mahayək av kə ngaviy wa mbusur ləkwət.
12 Hov kə paɗta kaɗ mana maslaga,
taniy av kə zlambaɗiy mana hidiy ta njə kə zlambaɗiy ləkwət.
Amma hoh, hov kə ɗewey koh dapkoh dapkoh,
za hoh məc kwən ko apuª.››
13 Bayzlav a luwen a mbaslay tik ko takan:
‹‹A yah ɗewey koh aa mə ngərzəmɗa za,
hos am pic kata tu kə vəl calmosumiy koh,
hoh kə bacenta ngaz am wəla.››
A luw atəgo bəgwən.
14 Mbaslayiy ngə Bayzlav wər, taniy mbiɗiy mə njə kə ɗiyiy kəzəɗ ngetik. Bayzlav a njə kə zlənta, taniy kə viy kə məniy hidiy sin tu kə mbəlta kaɗ.