Ɗerewel,
Yakuba
mə ɗəɗefu
1
Kata Yakuba, mə ɗiy kəzəɗ ngə Bayzlav ɓəw ngə Məmar Hidi Yesu Kristu, kata ɗen mbeli a səban Israyila ma gəɓ atalan saray mə cakwayiy təm talan mahayək.Zləgam atalan yəkma avə musuf təm takwan
2 Galmayɗigiª, ta ceɗeh hin, mana takwan par par tu jane hin wər, mə ɗew avə zəzay godokwən, 3 kadaban hin mə sən za, takwan atalan vəl nəv ngəkin a Bayzlav av kə dah ɓəs. 4 Zəni say ɓəs ngəkin kə pətah mgban mgban, kə jan hin kə mbaɗ kə hidiy ma cəcay mətak mə ngav ngav, mə dayiy gədan ngə mə ngavngav cike. 5 Mana sən təkən malaw ɓəw ma mindiwin tu gəɗaken a hid takan tə dab kin, say sin kə tar Bayzlav mə njə kə vəl təkəniy cike may may avə nəv takan, zəni Bayzlav av kə vəlenni mətak ɓon kə vəlen təkən. 6 Yo, hid səna mə gər kə wəzən am tar kwən, mə taru avə nəv ngetik cike Bayzlav av kə vəlenni. Hid mə njə kə wəzən am tar, nəv ngetik wa yəm təm torok mbiɗ ta njə kə kəz tik. 7-8 Hidi mə njə kə tar Bayzlav avə wəzən atəgo , mə gər kə ɓən av kə jan təkən angər Məmar Hidi kwən. A jan kwən kadaban am ɗew ngetik sin a ɗew avə ɓən səsaray. 9 Matakwan hidi mə səb mozlokotuf ngə Bayzlav mə zəzay kadaban Bayzlav tu kaf tik, kə vəlen lay malaw. 10 Wa səna təm, mana hidi mə njənja mə səb mozlokotuf ngə Bayzlav, mə zəzay təm kadaban Bayzlav av kə gəgəc tik. Mana kə luw kaɗ hidi mə njənja av kə ton mana fufon ngə pay ta yoɓ angaw. 11 Mana pic tu mbireheh a hərngəzl, lay tu ɗiy kwak, hiziɗ av kə kwal, fufoniy tik av kə yoɓigi, av kə lekiy avə malaw ngatan cike. Wa səna, hidi mə njənja av kə lek am kəzəɗ ngetik.
Zləgam atalan takwan tu kə hosohoh
12 Hidi mə musuf am sla, av kə jan ngər bay. Adəwən sla səna, av kə vəlen gəd mazlən, mana kə luw kaɗ micin mətak way Bayzlav mə luw av kə vəlen a hidiy ta mayta. 13 Mana sla tu jan hidi, ''mə gər kə luw: Bayzlav acin mə lebeɗekku kwən''. Mindiwin, hidi kwəl kə sla Bayzlav kə ɗiy mə ngavngav kwən, zəni Bayzlav təm a lebeɗ hidi ɗahkwən . 14 Ko hidi ngayi tamah ngetik mə ngavngav a njə kə lebeɗ tik, zəni kə ngazl tik am ɗiy mə ngavngav. 15 Adəwən səna, mana tamah səna tu fuful, av kə mbuh mə ngavngav. Mana mə ngavngav təm tu fuful, av kə tep tik am dalgway mətak way.
16 Galmayɗigi, mə gər kə jək talan kin kwən. 17 Təkəniy malaw ɓəw vəl malaw a njə kə yiy a wəzlav za. A njə kə yiy angər babay ngiykwan Bayzlav mə ndən pic avə cəwzlerekigi. Sin a zlambaɗ ɗahkwən, za kpizlik angər tik ɗahkwən təm. 18 Am may ngə Bayzlav, sin vəli yikwan micin a zləgam ngetik ma mindiwin. Bayzlav a ɗiy atəgo kə jan yikwan kə mbaɗ kə talan a dab təkənigi sin mə ndənta cike.
Kə zlim zləgam ngə Bayzlav za kə ɗiy mana sin mə luwu
19 Galmayɗigi, mə zlimu: Ko hidi ngayi mə sləsləɓ kə ceh zlimiy, mə gər kə vaz kə zləgam kwən, za mə gər kə bas nəv angaw kwən təm, 20 kadaban hidi mə njə kə ɗiy nəv angaw, a ɗiy təkən malaw a kibik Bayzlav kwən. 21 Asəna acin, mə geɗ təkən tu kə dəbəz hidi kaɗ ɓəw mə geɗ ɗiy təkən mə ngavngav kaɗ. Mə gəc talan kin kaɗ a kibik Bayzlav kə yək zləgam ngetik sin mə vəle hin am nəv. Zləgam səna kwəl kə mbəleh hin.
22 Galmayɗigi kə zlim zləgam ngə Bayzlav a gendik a hos gəga kwən, say kə ɗiy mana zləgam səna mə luwu təm. Asənkwən wər, hin mə jək talan kin. 23 Yaw, mana hidi tu zlim zləgam ngə Bayzlav zəni a ɗiy mana zləgam səna mə luwən bəgwən wər, sin wa hidi mə saf həriya ngetik am dərugwal. 24 Adəwən sin ma saf həriya ngetik za, və tik. Njoɗ adəwən səna talan tik tu zlay am təkən sin mə saf am dərugwal tafnan. 25 Zəni ngə hidi mə njə kə kwəsal mə taktak ma mindiwin ngə Bayzlav, za mə taktak mə njə kə ɗiy hidi kə mar talan tik, a səb a kə jangi tik, mana talan tik aa zlay a kimin ɗahkwən, talan tik slekeh a kimin. Gawal nhi av kə jan ngər bay am təkən sin ta ɗiy cike. 26 Yaw, mana hidi a saf talan tik kə hidi mə səb mozlokotuf ngə Bayzlav, zəni a cəcef zləgam sin ta zləgam ɗahkwən wər, sin a ngawenma atalan tik, mozlokotuf ngə Bayzlav sin ta səb səna mə mbaɗah kə təkən may may. 27 A zlimu: ‹‹ Kə ndelek təwehigi ɓəw wertiy mə cupcup mə zləniy takwan. Za ɓəw a kə puw talan tik am lebeɗ mətak dəbəz ɗew ngetik avə təkəniy təm talan mahayək. Yaw, nhi acin təkən ngə ɗiy ngə səb mozlokotuf ngə Bayzlav ma mindiwin ɓəw ma kweɗek mana Bayzlav mə mayu.