Mə saf hidiy cike wayza pərak pərak!
2
Galmayɗigiª, a hin mə yək zləgam ngə Yesu Kristu, Məmar yikwan njə gədan mordoy. Galmayɗigi, kadaban səna acin, mə gər kə wel hidiy a wel kwən. 2 Mana sla tik, hidi yah am lay hin mə ɓas. Sin awana avə desi ngə melenge, za ɓəw awana avə ləkwət səkəm tik ma tuwnha a kəsəm. Zəni hid njə sanha yah am ɓas səna təm. A təmah ləkwət mə kwahkwah a kəsəm. 3 Hin ɗiya cəcef hidi njə ləkwək mə lirlir səna lawlaw, hin luwenni: ‹‹A yah ɗewey koh am lay malaw nhi. ›› Zəni a hidi njə sanha təm hin luwenni: ‹‹A gar kaɗ awənhi, asənkwən a ɗew mgbərfəɗ a kayək a kibik ɗa. ›› 4 Mana hin tu ɗiy atəgo , hin mə wel hidiy a wel bəgwən vu? Hin mə mbaɗa kə hidi mə zliy dalgway avə ɓən mə ngavngav. 5 Galmayɗigi, mə ceh zlimiy lawlaw! Bayzlav acin mə wel hidiy təm sanha am talan mahayək kə ɗewiy kə hidiy mə njənja am yək zləgam ngetik. Bayzlav luwen a hidiy mə mayta av kə ɗewiy kə hidiy tu kə zəm bay atalan tan. 6 Za ngəkin, hin mə njə kə velek hidi təm sanha. Za maa hidiy mə njənjigi taniy acin mə njə kə rurohiy hin, za kə ceh hin wəla am dalgway kwən vu? 7 Yaw, taniy acin bah mə njə kə mbisiy atalan zlim malaw ngə Yesu Kristu, hidi Bayzlav mə zləneh hin kwən vu?8 Am deftere ngə Bayzlav, a ɗəɗefta: ‹‹ A may coloh mana hoh ta may talan koh.›› Nhi acin təkən Bayzlav mə may hidiy mə zlimiy ma ngetik kə ɗiyta, za mana hin tu ɗiy atəgo , hin mə ɗiy kəzəɗ malaw. 9 Zəni mana hin mə njə kə wel hidigi a wel wər, hin mə ɗiy mə ngavngav za. Mə taktak ngə Bayzlav av kə kawe hin am dalgway kadaban hin mə səb lawlaw bugwən. 10 Mana ko hidi ngayi tu səb mə taktak cike wayza, zəni takan tə dab tik a səb bəgwən wər, sin mə ɗiy mə ngavngav za pərak pərak a hidi mə tak səb mə taktakiy cike wayza. 11 Kata tə luw anhi kadaban Bayzlav mə luw: ‹‹Hoh gər kə wəzl hidi kwən ›› sin acin mə luw bah: ‹‹Hoh gər kə ɗiy vərndew kwən! ›› Ya, ko hoh ɗiy vərndew ɗahkwən, za hoh tu wəzl hidi, hoh səb mə taktak cike wayza bugwən. 12 Anhi acin, mə zləgam za ɓəw mə ɗew mana hidiy tu kə zlenta dalgway avə mə taktak mə njə kə ler hidi a mə mə ngavngav za. 13 Mana hidi a sən ndelek hidi ɗahkwən, Bayzlav av kə zla dalgway ngetik matak ndelek tik. Zəni hidi mə njə kə ndelek hidi a hovok avə dalgway kwən.
Hidi mə yək zləgam ngə Bayzlav say kə ɗiy kəzəɗ təm
14 Galmayɗigi, mana hidi tu luw: ‹‹Ta yək zləgam ngə Bayzlav, ›› zəni kəzəɗ ngetik a ɗef mana sin mə yək zləgam ngə Bayzlav səna ɗahkwən, zay tik ɗaha vu? Awwo! Zay tik ɗahkwən . 15 Mə zlimu, mana galmocoh mawəl asənkwən werti təm eklesiya a mariy ləkwət bugwən, hoyhoy təkən ngatan ngə zəm ɗahkwən . 16 Mana hidi takan tə dab kin təm luwenta: ‹‹Mə va avə zoy! Bayzlav mə vəle hin jan! Hin kə jan ləkwət ngə təm, mə jan təkən ngə zəm pas››, zəni a vəlenta ko mi taniy mə mayta bəgwən wər, zləgam ngatan ma kukuɗ a gendik dap, mətak mənta, zay tik ɗahkwən . 17 Wa səna a hidi mə yək zləgam ngə Bayzlav təm. Mana hoh tu vəl nəv koh a Bayzlav, zəni hoh ɗiy kəzəɗ mana zləgam səna mə luw ɗahkwən, vəl nəv koh a Bayzlav səna mə mbaɗa kə təkən may may. 18 Zəni hidi kwəl kə luw: ‹‹Hoh, hoh vəl nəv a Bayzlav, kata, kata tə njə kə ɗiy kəzəɗ! Kata təv kə zlawenni anhi: ‹‹A ɗefek mana aceki hoh mə vəl nəv koh a Bayzlav, za hoh ɗiy kəzəɗ malaw ɗahkwən, zəni kata təv kə ɗefe kəzəɗiy ɗa malaw kə jan hoh kə saf mana aceki kata mə vəl nəv ngaɗa a Bayzlav. ›› 19 Za hoh mə sən za Bayzlav wər sin a gendik palpal vu? Asəna law! Musurufiy təm mə sənta za atəgo , zəni a nənəhigi. 20 Hoh may kə ceɗigi kə yək zləgam ngə Bayzlav mətak ɗiy kəzəɗ zay tik ɗahkwən vu? Hoh hidi mətak bərngəzl talan cah! 21 Asəna acin, mə ɓən atalan Didi ngiykwan Ibrahima. Bayzlav a saf kə hidi malaw a kibik tik aceki ? Avə kəzəɗ malaw sin mə ɗiyu. Kadaban sin mə vəl kərti tik Isyaku kə bənen a Bayzlav, a səna kwən vu? 22 Tanjinhi hoh mə sən za mana aceki yək zləgam ngə Bayzlav ngetik mə lap avə kəzəɗ ngetik. Kəzəɗ sin mə ɗiy səna, tu vəlen gədan kə vəl nəv ngetik cike a Bayzlav. 23 Asəna acin, təkən səna tu ɗiy tiɗtiɗe mana deftere ngə Bayzlav mə luw taməcek: ‹‹Ibrahima tu vəl nəv tik a Bayzlav, Bayzlav təm saf sin kə hidi malaw a kibik tik, za ɗefenma kə ngwalay tik. ›› 24 Mə safu acin, Bayzlav a njə kə saf hidi kə hidi malaw təm makavay hidi ta vəl nəv ngetik a Bayzlav a gendik kwən, amma kadaban kəzəɗ ngetik gəzza.
25 Wa səna təm, a barlaw werti zlim tik Rahab. Sin yək a de ngetik hidiy Isirayiligi mə yiy kə hezliy lay. Za tu mənta a hidiy Israyila mə yiy kə hezliy lay avə kə ɗef mozlokotuf məpərmay kə jan kə leriy tan a liɓde Yeriko za. Bayzlav saf sin kə hidi malaw kadaban kəzəɗ ngetik 26 Yaw, mana hidi mətak micin, mə mbaɗah kə mimci. Wa səna təm vəl nəv a Bayzlav mətak kəzəɗ mə mbaɗa kə təkən may may.